លោក Nehammer បាននិយាយថា៖ «ការសន្ទនាជាមួយលោកប្រធានាធិបតី Putin គឺមានលក្ខណៈផ្ទាល់ បើកចំហ និងស្វិតស្វាញខ្លាំងណាស់»។
លោក Nehammer បានបន្ថែមថា សារសំខាន់បំផុតដែលលោកបានផ្ញើទៅកាន់លោក ពូទីន គឺការប្រយុទ្ធគ្នានៅអ៊ុយក្រែនត្រូវតែបញ្ចប់។ នាយករដ្ឋមន្ត្រីអូទ្រីសក៏បានបង្ហាញក្តីសង្ឃឹមថា លក្ខខណ្ឌសម្រាប់ជនស៊ីវិលនៅអ៊ុយក្រែនអាចត្រូវបានកែលម្អ។
ក្នុងនោះ លោកបាននិយាយថា “ខ្ញុំបានលើកឡើងអំពីឧក្រិដ្ឋកម្មសង្គ្រាមធ្ងន់ធ្ងរនៅក្នុង Bucha និងកន្លែងផ្សេងទៀត ហើយបានសង្កត់ធ្ងន់ថា អ្នកទទួលខុសត្រូវចំពោះឧប្បត្តិហេតុទាំងនេះត្រូវតែទទួលទណ្ឌកម្ម” ។
មេដឹកនាំអូទ្រីស ក៏បានប្រាប់លោក ពូទីន អំពីតម្រូវការសម្រាប់ច្រករបៀងមនុស្សធម៌ដើម្បី “នាំយកទឹក និងអាហារ” ទៅកាន់ទីក្រុងដែលឡោមព័ទ្ធ និងដើម្បីជម្លៀសស្ត្រី កុមារ និងអ្នករងរបួស។
មុននេះ Kiev បានចោទប្រកាន់ទាហានរុស្ស៊ីថា បានសម្លាប់ជនស៊ីវិលនៅក្នុងទីក្រុងជុំវិញ Kiev ប្រទេសអ៊ុយក្រែន។ ប៉ុន្តែ ទីក្រុងម៉ូស្គូបានបដិសេធការចោទប្រកាន់នេះ ដោយទទូចថាពួកគេមិនបានកំណត់គោលដៅជនស៊ីវិលទេ។
ចំពោះប្រធានបទនៃទណ្ឌកម្ម យោងតាមទីភ្នាក់ងារសារព័ត៌មាន AFP លោក Nehammer បាននិយាយថា លោកបានប្រាប់លោក ពូទីន ថា ទណ្ឌកម្មនឹងបន្តត្រូវបានពង្រឹង ប្រសិនបើជនស៊ីវិលនៅតែត្រូវបានសម្លាប់នៅក្នុងប្រទេសអ៊ុយក្រែន។
ប្រព័ន្ធផ្សព្វផ្សាយអូទ្រីស បានរាយការណ៍ថា ការសន្ទនាទល់មុខគ្នារវាងលោក Nehammer និងលោក Putin មានរយៈពេលប្រហែល ៩០ នាទី។ អ្នកនាំពាក្យ Nehammer បាននិយាយថា ជំនួបរវាងមេដឹកនាំអូទ្រីស និងរុស្ស៊ី បានធ្វើឡើងនៅឯគេហដ្ឋាន Novo-Ogaryovo របស់លោក ពូទីន នៅខាងក្រៅទីក្រុងម៉ូស្គូ។
នាយករដ្ឋមន្ត្រី Nehammer គឺជាមេដឹកនាំសហភាពអឺរ៉ុប (EU) ដំបូងគេ ដែលបានជួបប្រធានាធិបតីរុស្ស៊ី ចាប់តាំងពីទីក្រុងមូស្គូបានចាប់ផ្តើមប្រតិបត្តិការយោធានៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ នេះបើយោងតាមទីភ្នាក់ងារសារព័ត៌មាន Reuters ។
សរុបមក អូទ្រីស ត្រូវបានដឹងថា រក្សាទំនាក់ទំនងជិតស្និទ្ធជាមួយរុស្ស៊ី ជាងរដ្ឋសមាជិកសហភាពអឺរ៉ុបដទៃទៀត។
ទោះយ៉ាងណាក៏ដោយ ថ្មីៗនេះ លោក Nehammer បានបង្ហាញពីសាមគ្គីភាពជាមួយអ៊ុយក្រែន ទាក់ទងនឹងយុទ្ធនាការយោធារបស់ទីក្រុងម៉ូស្គូ។ លោកក៏ចោទប្រកាន់ថា មានឧក្រិដ្ឋកម្មសង្គ្រាមរុស្ស៊ីនៅអ៊ុយក្រែន ដែលក្រុងម៉ូស្គូបានបដិសេធម្តងហើយម្តងទៀត។
លើសពីនេះ ប្រទេសអូទ្រីស ក៏ចូលរួមជាមួយសមាជិកសហភាពអឺរ៉ុបផ្សេងទៀត ក្នុងការបណ្តេញអ្នកការទូតរុស្ស៊ីផងដែរ។
លោកនាយករដ្ឋមន្ត្រី Nehammer បាននិយាយថា លោកនឹងជូនដំណឹងដល់ដៃគូអឺរ៉ុបរបស់លោក អំពីខ្លឹមសារនៃកិច្ចប្រជុំរបស់លោក ជាមួយលោក ពូទីន ហើយនឹងពិភាក្សាជាមួយពួកគេនូវជំហានបន្ទាប់។
ទន្ទឹមនឹងនេះ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ភាគីអូទ្រីស បានស្នើសុំកិច្ចប្រជុំបិទទ្វារជាមួយលោក ពូទីន ហើយមិនមានសន្និសីទសារព័ត៌មានរួមគ្នា រវាងមេដឹកនាំទាំងពីរ បន្ទាប់ពីកិច្ចប្រជុំនោះទេ៕ រក្សាសិទ្ធិដោយ៖ លឹម ហុង
