មេដឹកនាំមីយ៉ានម៉ា គឺអ្នកស្រីអង់សាន សូជី (Aung San Suu Kyi) បានធ្វើដំណើរទស្សនៈកិច្ចទៅរដ្ឋរ៉ាឃីន (Rakhine) ដែលមានការបង្ក្រាបរង្គាលលើជនជាតិដើមភាគតិចរ៉ូហ៊ីងយ៉ា ហើយនេះគឺជាការធ្វើទស្សនៈកិច្ចលើកដំបូងរបស់អ្នកស្រី ទៅកាន់រដ្ឋញាំញីដោយហឹង្សាមួយនេះ។
មន្ត្រីរដ្ឋាភិបាលបាននិយាយថា អ្នកស្រី សូជី កំពុងទស្សនៈកិច្ចទីក្រុង Sittwe និងក្រុងផ្សេងៗទៀតនៃរដ្ឋរ៉ាឃីន។ ដំណើរទស្សនៈកិច្ចនោះមានរយៈពេលតែមួយថ្ងៃ ហើយមិនត្រូវបានប្រកាសឲ្យដឹងនោះទេ។
មេដឹកនាំដែលឈ្នះពានរង្វាន់ណូបែលសន្តិភាពរូបនេះ ទទួលរងការរិះគន់ជុំវិញពិភពលោក ដោយសារតែកងកំលាំងរបស់រដ្ឋាភិបាលបានបន្តបង្ក្រាបលើជនជាតិដើមភាគតិចកាន់សាសនាអ៊ីស្លាមយ៉ាងឃោរឃៅ ហើយរដ្ឋាភិបាលមីយ៉ានម៉ាត្រូវបានគេរិះគន់ថា កំពុងបោសសម្អាតជាតិដើមរ៉ូហ៊ីងយ៉ា។
ចាប់តាំងពីមានអំពើហឹង្សាមក ជនជាតិរ៉ូហ៊ីងយ៉ាជាង ៦០០.០០០នាក់បានភៀសខ្លួនទៅកាន់ប្រទេសបង់ក្លាដេស។ អំពើហឹង្សាបានកើតឡើងដោយសារតែមានការវាយប្រហារលើប៉ុស្តិ៍ប៉ូលីសជាច្រើនកន្លែងទូទាំងរដ្ឋរ៉ាឃីនរបស់ក្រុមសកម្មប្រយុទ្ធ។
មនុស្សរាប់រាយនាក់ត្រូវបានសម្លាប់នៅក្នុងការបង្ក្រាប និងមានការចោទប្រកាន់ថាភូមិរបស់ជនជាតិរ៉ូហ៊ីងយ៉ាងត្រូវបានដុតបំផ្លាញ ចំណែកជនជាតិដើមនេះត្រូវបានកងកំលាំងរដ្ឋាភិបាលបណ្តេញចេញពីប្រទេស។
ប៉ុន្តែយោធាមីយ៉ានម៉ាបាននិយាយថា កិច្ចសហប្រតិបត្តិការរបស់ពួកគេមានគោលបំណងដើម្បីបំបាត់ឬសគល់របស់ក្រុមសកម្មប្រយុទ្ធប៉ុណ្ណោះ និងបានបដិសេធថាពួកគេមានគោលដៅលើជនស៊ីវិល។ ទោះយ៉ាងណាក៍ដោយ សាក្សី និងអ្នកកាសែតបានបដិសេធចំពោះការអះអាងរបស់ក្រុមយោធាមីយ៉ានម៉ា៕ ដោយ ៖ សុភ័ក្ត្រ