ទេសរដ្ឋមន្រ្តី ឱម យ៉ិនទៀង ៖ ក្នុងខែមេសា មានពាក្យប្តឹងចំនួន ២៩ ត្រូវបានពិនិត្យស្រាវជ្រាវដល់មូលដ្ឋាន ស្តាប់ការបំភ្លឺ-ពិនិត្យឯកសារ ពីភាគីរងការចោទប្រកាន់ ឃើញថា មិនមានពាក់ព័ន្ធដល់ សមត្ថកិច្ចនៃអង្គភាពប្រឆាំងអំពើពុករលួយ

ភ្នំពេញ ៖ ប្រធានអង្គភាពប្រឆាំងអំពើពុករលួយ(អ.ព.ប)​ បានមានប្រសាសន៍ថា​ ក្នុងខែមេសានេះមានពាក្យប្តឹង ចំនួន៥២ ត្រូវបានដាក់ចូលប្រជុំវិភាគ ក្នុងនោះពាក្យប្តឹងចំនួន ២៩ ត្រូវបានពិនិត្យស្រាវជ្រាវដល់មូលដ្ឋាន ស្តាប់ការបំភ្លឺ-ពិនិត្យឯកសារពីភាគីរងការចោទប្រកាន់ ឃើញថាមិនមានពាក់ព័ន្ធដល់ សមត្ថកិច្ចនៃអង្គភាពប្រឆាំងអំពើពុករលួយនោះទេ។

ក្រុមប្រឹក្សាជាតិប្រឆាំងអំពើពុករលួយ បានបើកកិច្ចប្រជុំលើកទី១១ អាណត្តិទី៣ ក្រោមអធិបតីភាពរបស់ ឯកឧត្តម តុប សំ និងលោកជំទាវកិត្តិសង្គហបណ្ឌិត ឧបនាយករដ្ឋមន្ត្រី ម៉ែន សំអន ព្រមទាំងសមាជិក សមាជិកា នៅថ្ងៃទី២៩ ខែមេសា ឆ្នាំ២០២២។

ឯកឧត្តមទេសរដ្ឋមន្រ្តី ឱម យ៉ិនទៀង ប្រធានអង្គភាពប្រឆាំងអំពើពុករលួយ សម្រេចបើកមើលឯកសារទ្រព្យសម្បត្តិ និងបំណុល តាមសំណូមពរស៊ើបអង្កេត ១៤ករណី។ ប្រធានអង្គភាពប្រឆាំងអំពើពុករលួយ បានថ្លែងថា​ ពាក្យប្តឹងដែលមានក្នុងខែមេសានេះមាន ចំនួន៥២ ត្រូវបានដាក់ចូលប្រជុំវិភាគ ក្រោយពីបានទទួល ១ ឬ ២ ថ្ងៃ។ ពាក្យប្តឹងចំនួន ២៩ អង្គភាពប្រឆាំងអំពើពុករលួយ បានពិនិត្យស្រាវជ្រាវដល់មូលដ្ឋាន ស្តាប់ការបំភ្លឺ-ពិនិត្យឯកសារពីភាគីរងការចោទប្រកាន់ ឃើញថាមិនមានពាក់ព័ន្ធដល់ សមត្ថកិច្ចនៃអង្គភាពប្រឆាំងអំពើពុករលួយ នោះទេ។

ពាក្យប្តឹង ចំនួន ១១ ត្រូវបានស្រាវជ្រាវរកឃើញថា មិនមានដូចការសង្ស័យរបស់ម្ចាស់បណ្តឹងទេ ហើយអង្គភាពប្រឆាំងអំពើពុករលួយ បានជម្រាបដល់ម្ចាស់បណ្ដឹងវិញនូវលទ្ធផល នៃការស្រាវជ្រាវទាំងនេះ។ ពាក្យប្ដឹងចំនួន ២៨ កំពុងរងចាំការបំភ្លឺពីសាម៉ីសា្ថប័ន/សាម៉ីខ្លួន រងការចោទប្រកាន់ អង្គភាពប្រឆាំងអំពើពុករលួយ បានកោះហៅឱ្យមកបំភ្លឺផ្ទាល់នៅអង្គភាព នូវជនពាក់ព័ន្ធទៅនឹងពាក្យប្តឹងចំនួន ៣។

ចំពោះការងារអប់រំ អង្គភាពប្រឆាំងអំពើពុករលួយ បានផលិតវីដេអូអំពីសកម្មភាពការងារពាក់ព័ន្ធ នឹងការប្រយុទ្ធប្រឆាំងអំពើពុករលួយ ដើម្បីផ្សព្វផ្សាយជូនសាធារណជនតាមរយៈបណ្ដាញ សង្គមហ្វេសប៊ុក-ទូរទស្សន៍-វិទ្យុ និងកាសែត ។ល។ ក្រៅពីនេះ អង្គភាពប្រឆាំងអំពើពុករលួយ បានបើកវគ្គបណ្តុះបណ្តាលច្បាប់ស្ដីពីការប្រឆាំងអំពើពុករលួយ ជូនដល់កម្មសិក្សាការី វគ្គសុក្រឹតការវិជ្ជាជីវៈមេធាវី។

ការងារទប់ស្កាត់ អង្គភាពប្រឆាំងអំពើពុករលួយ បានសង្កេតការណ៍លើដំណើរការប្រឡង ជ្រើសរើសចៅក្រមផ្ទៃក្នុង ជំនាន់ទី២ និងបានពិនិត្យ និងផ្ទៀងផ្ទាត់ឯកសារនៃការធ្វើលទ្ធកម្ម សាធារណៈចំនួន ១៤៣ គម្រោង នៃអង្គភាពលទ្ធកម្មរាជធានី-ខេត្ត-ក្រសួង-ស្ថាប័ន -មន្ទីរ និងអង្គភាពនានាចំនួន ៤៦។

អង្គភាពប្រឆាំងអំពើពុករលួយ បានបើកវគ្គបណ្តុះបណ្តាលដល់មន្ត្រីរបស់ខ្លួនចំនួន ០៤វគ្គ ក្នុងនោះវគ្គបណ្តាលក្នុងប្រទេសចំនួន ៣ វគ្គ (១-វគ្គបណ្តុះបណ្តាលស្តីពីសុចរិតភាពមន្ត្រីរាជការ សាធារណៈ – ការប្រើប្រាស់បណ្តាញសង្គមឱ្យមានប្រសិទ្ធិភាព និងច្បាប់ស្តីពីការប្រឆាំងអំពើ ពុករលួយ ២- វគ្គបណ្តុះបណ្តាលស្តីពីមូលដ្ឋានគ្រឹះកុំព្យូទ័រ និង ៣ វគ្គបណ្តុះបណ្តាលស្តីពី ផែនការនិរន្តរភាពការងារ និងទទួលបានការបណ្ដុះបណ្ដាលក្រៅប្រទេសចំនួន ០១ វគ្គ ដែលរៀបចំដោយវិទ្យាស្ថានបណ្តុះបណ្តាល និងស្រាវជ្រាវ នៃអង្គការសហប្រជាជាតិ (UNITAR) គឺ វគ្គបណ្តុះបណ្តាលស្តីពីការប្រឆាំងអំពើពុករលួយ ការអភិវឌ្ឍន៍ប្រកបដោយនិរន្តរភាព និងការកសាងសង្គមប្រកបដោយតម្លាភាព។ ក្រៅពីការងារបណ្ដុះបណ្ដាល អង្គភាពប្រឆាំងអំពើ ពុករលួយ បានប្រជុំផ្ទៃក្នុង និងប្រជុំអន្តរក្រសួង លើការងារពាក់ព័ន្ធនឹងការប្រយុទ្ធប្រឆាំងអំពើ ពុករលួយ (ការងារប្រឆាំងការសម្អាតប្រាក់ និងហិរញ្ញប្បទានភេរវកម្ម – ការស៊ើបអង្កេត – ការបង្ការ ទប់ស្កាត់ការធ្វើលទ្ធកម្មមិនត្រឹមត្រូវ – ការអនុវត្តកម្មវិធីគ្រប់គ្រងហិរញ្ញវត្ថុសាធារណៈ ។ល។ ចំនួន ២៨ លើក៕ រក្សាសិទ្ធិដោយ ៖ សុទ្ធ លី