នេះជាហេតុការណ៍ដ៏រន្ធត់មួយ បានកើតឡើងនៅផ្ទះមួយកន្លែង ស្ថិតក្នុងស្រុក Nkangala ខេត្ត Mpumalanga អាហ្វ្រិកខាងត្បូង។
នៅក្នុងវីដេអូឃ្លីប បានបង្ហាញចោរម្នាក់ ខណៈកំពុងដើរលបៗចូលផ្ទះប្រជាពលរដ្ឋមួយ ស្រាប់តែត្រូវឆ្កែម្ចាស់ផ្ទះដ៏ធំមួយក្បាលឈ្មោះថា បូឡា ស្ទុះវាយប្រហារភ្លាមៗតែម្តង។ ឆ្កែនោះបន្ទាប់មក បានខាំដៃ និងជើងរបស់ចោរគ្មានដកថយនោះឡើយ បើទោះបីចោររូបនោះខំព្យាយាមទាត់ និងដាល់វាយ៉ាងក៏ដោយ ក៏វានៅតែសម្រុកខាំយ៉ាងសាហាវ។
លើសពីនេះ នៅពេលដែលចោររូបនោះព្យាយាមរើបម្រាស់ ស្រវេស្រវ៉ាយឡើងជញ្ជាំងដើម្បីរត់គេចខ្លួនយ៉ាងណា ក៏សត្វឆ្កែនេះបន្តវាយប្រហារ ដើម្បីរេរាំងមិនឱ្យរត់គេចខ្លួន។ ចោរបានបន្តតស៊ូជាមួយឆ្កែនៅក្នុងទីធ្លា មុនពេលរូបគេមានឱកាសអាចលោតឡើងលើតុខ្ពស់មួយ។
ប្រហែលមួយម៉ោងក្រោយមក ម្ចាស់ត្រឡប់មកវិញ ឃើញឆ្កែនៅតែឈរយាមក្បែរតុ ដោយមិនឲ្យចោររត់គេចខ្លួនបានឡើយ។
គេដឹងថា ចោររូបនេះ បានរងរបួសយ៉ាងធ្ងន់ធ្ងរ បន្ទាប់ពីត្រូវឆ្កែខាំ ហើយត្រូវបញ្ជូនទៅមន្ទីរពេទ្យ ដើម្បីព្យាបាល មុនពេលនឹងត្រូវប៉ូលីសចាប់ខ្លួន៕ រក្សាសិទ្ធិដោយ៖ លឹម ហុង
