ដើមមៀនអាយុកាលជាង ១០០ ឆ្នាំ កំពុង «បង្ហូរទឹក» ឥតឈប់ឈរ ធ្វើឱ្យអ្នកដែលបានឃើញ មានការភ្ញាក់ផ្អើលស្ទើរមិនគួរឲ្យជឿ។
ដើមមៀនចំណាស់មួយដើមនេះ ដែលកំពុងបង្ហូរទឹកដោយខ្លួនវា មើលទៅដូចជាប្រភពទឹកពីចម្ងាយណាមួយ គឺមានទីតាំងនៅក្នុងក្រុង Dinoša ចម្ងាយប្រហែល ៥ គីឡូម៉ែត្រពី Podgorica ប្រទេសម៉ុងតេណេហ្គ្រោ។
បើតាមអ្នកស្រុកបានឲ្យដឹងថា ដើមមៀនដែលមានអាយុកាលជាង១០០ឆ្នាំ នេះ បាននិងកំពុងបញ្ចេញទឹកដ៏អាថ៍កំបាំង ដែលបានកើតឡើងដោយធម្មជាតិ និងមានតែមួយគត់នៅលើពិភពលោក។
ដើមឈើនេះបាន «បង្ហូរទឹក» ជាលើកដំបូងកាលពីជាង ២០ឆ្នាំមុន បន្ទាប់ពីមានភ្លៀងធ្លាក់ខ្លាំង។ នៅតំបន់នោះមានដើមឈើជាច្រើន ប៉ុន្តែមានតែដើមមៀនដែលមានអាយុ 100 ឆ្នាំ ប៉ុណ្ណោះ ដែលមានបាតុភូតដ៏ពិសេសនេះ។
ទឹកហូរចេញពីដើមមៀន មានកម្ពស់ប្រហែល ១,៥ ម៉ែត្រ។ ជារៀងរាល់ឆ្នាំ ភ្ញៀវទេសចរមួយចំនួនធំមកពីជុំវិញពិភពលោក បានមកទីនេះដើម្បីមើលដើមឈើហូរទឹកដ៏ចម្លែកនេះ ហើយពួកគេពិតជាមានការភ្ញាក់យ៉ាងខ្លាំងតែម្តង។
រហូតមកទល់ពេលនេះ មិនមាននរណាម្នាក់រកឃើញចម្លើយច្បាស់លាស់ថា ហេតុអ្វីបានជាដើមឈើនេះ បង្ហូរទឹកឥតឈប់ឈរយ៉ាងនេះ។ ទោះបីជាយ៉ាងណាក៏ដោយ អ្នកជំនាញ និងអ្នកស្រុកខ្លះជឿថា មានប្រភពទឹកក្រោមដីនៅក្រោមដើមឈើ និងកន្លែងដែលការផ្គត់ផ្គង់ទឹកហូរចេញ។
អ្នកជំនាញជឿថា ភ្លៀងធ្លាក់ខ្លាំងបានជន់លិចផ្លូវក្រោមដីបង្កឱ្យមានសម្ពាធកើនឡើង រុញទឹកឡើងតាមប្រហោងដើមឈើ បន្ទាប់មកតាមស្នាមប្រេះនៅគល់ឈើ ទឹកក៏ហូរចុះមក ។ ដើមឈើបាញ់ទឹកតែនៅពេលជាក់លាក់នៃឆ្នាំ។
អ្នកប្រើប្រាស់ Instagram ឈ្មោះ lokalnihodaci បានចែករំលែកវីដេអូបង្ហាញពីទឹកហូរចេញពីគល់ឈើ ខណៈបុរសម្នាក់កំពុងលាងមុខជាមួយទឹកហូរយ៉ាងរីករាយ ឃើញថាបានទាក់ទាញការចាប់អារម្មណ៍យ៉ាងខ្លាំង ពីអ្នកលេងអ៊ីនធឺណិត។
អ្នកនិយមលេងអ៊ីនធឺណិតបានបញ្ចេញមតិថា “អស្ចារ្យណាស់ ខ្ញុំមិនដែលឃើញដើមឈើបាញ់ទឹកបែបនេះទេ, ដើមឈើបាញ់ទឹកព្រោះវាដុះនៅជិតបំពង់ទឹកក្រោមដីនៅតំបន់នេះ ទឹកហូរចេញមកក្រៅតាមស្នាមប្រេះនៅដើមឈើ, ខ្ញុំបានឃើញផ្ទាល់ភ្នែករួចហើយ ពីបាតុភូតធម្មជាតិដ៏អស្ចារ្យនេះ”, “ធម្មជាតិតែងតែផ្តល់ឱ្យមនុស្សនូវការពេញចិត្តជាពិសេស ហេតុនេះយើងទាំងអស់គ្នាគួរតែបន្តខិតខំថែរក្សា,…”៕ រក្សាសិទ្ធិដោយ៖ លឹម ហុង
