គ្រួសារជនជាតិអាមេរិកមួយ បានបង្កការភ័យខ្លាចយ៉ាងខ្លាំង នៅឯអាកាសយានដ្ឋានអន្តរជាតិ Ben Gurion ក្នុងទីក្រុង Tel Aviv នៃប្រទេសអ៊ីស្រាអែល កាលពីសប្តាហ៍មុន បន្ទាប់ពីបានបង្ហាញសំបកគ្រាប់បែកមិនទាន់ផ្ទុះ (យកទុកធ្វើជាវត្ថុអនុស្សាវរីយ៍) នៅឯការកន្លែងត្រួតពិនិត្យសន្តិសុខ។
សមាជិកម្នាក់នៃគ្រួសារនោះដែលមិនបញ្ចេញឈ្មោះ ត្រូវបានគេរាយការណ៍ថា បានយកគ្រឿងផ្ទុះនោះទុកជាវត្ថុអនុស្សាវរីយ៍ ក្នុងដំណើរទៅលេងតំបន់ Golan Heights ដែលកាន់កាប់ដោយអ៊ីស្រាអែល ហើយបានសម្រេចចិត្តថា វាជាគំនិតល្អក្នុងការយកវាទៅផ្ទះវិញ នៅសហរដ្ឋអាមេរិក។
យោងតាមសាក្សីដែលឃើញផ្ទាល់ភ្នែក បុរសម្នាក់នោះបានយក «សំបកគ្រាប់មិនទាន់ផ្ទុះ» ចេញពីកាបូបស្ពាយរបស់គាត់ ហើយបង្ហាញវាដល់បុគ្គលិកសន្តិសុខ ដោយសួរពួកគេថាតើវាអាចដាក់ក្នុងវ៉ាលីបានដែរឬទេ។
ដោយភ្ញាក់ផ្អើលនឹង “វត្ថុអនុស្សាវរីយ៍” ដ៏មិននឹកស្មានដល់នេះ មន្ត្រីសន្តិសុខម្នាក់បានបញ្ជាឱ្យ «បោសសម្អាត» ជុំវិញសំបកគ្រាប់ចាស់នេះជាបន្ទាន់ ប៉ុន្តែអ្នកដំណើរម្នាក់ទៀតមិនគោរពតាមបញ្ជានោះ ហើយចាប់ផ្តើមស្រែកថា “បាញ់ភេរវករ”។ ការភ័យស្លន់ស្លោបានកើតឡើងភ្លាមៗ ហើយវីដេអូខ្លីពីអាកាសយានដ្ឋានបង្ហាញមនុស្សបានស្រែក និងរត់ចេញពីតំបន់ check-in និងខ្លះទៀតដេកក្រាបនៅលើឥដ្ឋ រង់ចាំគ្រោះថ្នាក់ឆ្លងកាត់។
គ្រាប់បែកមិនទាន់ផ្ទុះនេះ ត្រូវបានគេជឿថា មានកាលបរិច្ឆេទក្នុងសម័យសង្គ្រាមអ៊ីស្រាអែល-ស៊ីរីឆ្នាំ ១៩៦៧។ សូមបញ្ជាក់ថា ភ្នំ Golan Heights ត្រូវបានបំផ្ទុះដោយការទម្លាក់គ្រាប់បែកនិងកាំភ្លើងធំក្នុងអំឡុងសង្គ្រាម៦ថ្ងៃ ហើយគ្រាប់មិនទាន់ផ្ទុះដែលមានអាយុរាប់ទសវត្សរ៍នៅតែត្រូវបានគេរកឃើញជាប្រចាំ។
ចំណែកគ្រួសារអាមេរិកនោះវិញ ពួកគេត្រូវបានឃុំខ្លួនដើម្បីធ្វើការសាកសួរភ្លាមៗ ប៉ុន្តែ នៅពេលដែលមន្ត្រីកំណត់ថា ពួកគេមិនមែនជាការគំរាមកំហែងណាមួយ ពួកគេក៏ត្រូវបានអនុញ្ញាតឱ្យឡើងយន្តហោះត្រឡប់ទៅផ្ទះវិញផងដែរ៕ រក្សាសិទ្ធិដោយ៖ លឹម ហុង
