នៅថ្ងៃទី៦ ខែឧសភា ឆ្នាំ ២០២២ នេះ គេហទំព័រ Sinchew បានរាយការណ៍ថា រឿងហេតុដ៏ច្របូកច្របល់គួរឲ្យអស់សំណើចមួយ បានកើតឡើងនៅក្នុងពិធីមង្គលការមួយ នៅក្នុងភូមិ Lu’an ក្នុងខេត្ត Anhui ប្រទេសចិន ជាកន្លែងដែលគូស្នេហ៍ថ្មីថ្មោងពីរគូ បានរៀបអាពាហ៍ពិពាហ៍ក្នុងថ្ងៃតែមួយ ព្រោះថាទាំងកូនកំលោះ និងកូនក្រមុំគឺសុទ្ធតែជាកូនភ្លោះដូចគ្នា ហើយលើសពីនេះ មុខមាត់ដ៏ដូចគ្នាខ្លាំងទៀត ដែលធ្វើឲ្យសូម្បីសមាជិកគ្រួសាររបស់ពួកគេទាំងសងខាងក៏ពិបាកបែងចែក បើមិនកត់ចំណាំចំណុចសម្គាល់ណាមួយនោះ។
យោងតាមរបាយការណ៍ក្នុងស្រុក នោះភាគីកូនកំលោះភ្លោះបានយល់ព្រមថា កូនភ្លោះបងនឹងត្រូវស្លៀកឈុតងងឹតជាង។ ហើយកូនភ្លោះប្អូន ត្រូវចងក្រវាត់.កពណ៌ក្រហម ដើម្បីជាចំណុចសម្គាល់ងាយស្រួលចំណាំ ប៉ុន្តែកូនក្រមុំភ្លោះដែលពាក់រ៉ូបកូនក្រមុំពណ៌ក្រហម ពិតជាស្រដៀងនឹងគ្នាខ្លាំងណាស់ ដោយខុសគ្នាពីការរចនាម៉ូដរ៉ូបបន្តិចបន្តួចប៉ុណ្ណោះ ដែលធ្វើឲ្យពិបាកក្នុងការកត់ចំណាំយ៉ាងខ្លាំង។
ពិតណាស់ ដោយសារតែរឿងនេះ បានធ្វើឱ្យកូនកំលោះភ្លោះប្អូនបានគិតថា «បងស្រីថ្លៃ» ថាជាកូនក្រមុំកូនរបស់ខ្លួនក៏បានច្រឡំទៅឈរជាមួយតែម្តង។ មិនត្រឹមតែប៉ុណ្ណោះទេ សូម្បីតែម្តាយរបស់កូនកំលោះ ក៏ច្រឡំផងដែរ ដែលធ្វើឲ្យច្របូកច្របល់ភ្ញាក់ផ្អើលពេញរោងការ។ តែទោះជាយ៉ាងណា នៅពេលដឹងថា «បងស្រីថ្លៃ» មិនមែនជាកូនក្រមុំរបស់ខ្លួន កូនភ្លោះប្អូន ក៏ប្រញាប់ប្តូរទីតាំង ខិតរករកកូនក្រមុំជាប្អូនរបស់ខ្លួនវិញទាំងអៀនខ្មាសយ៉ាងខ្លាំង ដែលធ្វើឲ្យសាច់ញាតិ និងភ្ញៀវក្នុងពិធីនោះ ពិតជាអស់សំណើចគ្រប់ៗគ្នា។
បន្ទាប់ពីរូបភាពនៃព្រឹត្តិការណ៍អាពាហ៍ពិពាហ៍នេះ ត្រូវបានគេចែកចាយតាមអ៊ីនធឺណិត វាទទួលបានការចាប់អារម្មណ៍យ៉ាងឆាប់រហ័ស។ មនុស្សជាច្រើនឃើញហើយទប់សំណើចមិនបាន ដោយនាំគ្នាបញ្ចេញមតិនិយាយលេងសើចថា៖ “ល្អហើយ ដែលកូនកំលោះមានចំណុចខុសពីគ្នា បើមិនដូច្នេះទេ កូនក្រមុំក៏ច្រឡំដែរ, កុំរស់នៅផ្ទះតែមួយ បើមិនដូច្នោះទេ វានឹងមានបញ្ហា ជាពិសេសនៅពេលយប់ ហាហាហា»៕ រក្សាសិទ្ធិដោយ៖ លឹម ហុង
