គូស្នេហ៍មួយគូ មកពីប្រទេសឥណ្ឌា បានកំពុងធ្វើឲ្យអ្នកលេងអុីនធើរណែត មានការភ្ញាក់ផ្អើលយ៉ាងខ្លាំង ព្រោះតែកូនកំលោះនិងកូនក្រមុំ មានមាឌតូចល្អិតដូចគ្នា ដែលមានកម្ពស់មិនដល់១ម៉ែត្រនោះទេ។ តែទោះជាយ៉ាងណា ពិធីមង្គលការរបស់ពួកគេ គឺពោរពេញដោយភាពសប្បាយរីករាយ។
កូនកំលោះមានឈ្មោះ Munna Bharti អាយុ ២៦ ឆ្នាំ (កម្ពស់ 91 cm) និងកូនក្រមុំឈ្មោះ Mamta Kumari អាយុ ២៤ ឆ្នាំ (កម្ពស់ 85 cm)។ ពួកគេទាំងពីរ មានស្រុកកំណើតជាមួយនៅ Bhagalpur ទីក្រុង Navgachia ប្រទេសឥណ្ឌា។ មនុស្សប្រហែល ១០០ នាក់ មានវត្តមាននៅក្នុងពិធីមង្គលការ ដើម្បីអបអរសាទរគូស្នេហ៍ពិសេសនេះ ដែលបានឆ្លងកាត់ការលំបាក និងឧបសគ្គជាច្រើន មុនពេលបានជួបគ្នាជាប្តីប្រពន្ធ។
ឪពុករបស់កូនកំលោះ បាននិយាយថា៖ កូនប្រុសខ្ញុំកម្ពស់ត្រឹមតែ ៩១ សង់ទីម៉ែត្រ ពិបាករកប្រពន្ធដែលសាកសមនឹងគាត់ណាស់ សំណាងហើយដែលគាត់បានជួបស្នេហាពិត ជាមួយប្រពន្ធដែលមានស្ថានភាពដូចគ្នា។ មានមនុស្សជាច្រើន បានមកជុំនៅផ្ទះរបស់ខ្ញុំដើម្បីប្រារព្ធពិធីមង្គលការរបស់ពួកគេ ខ្ញុំជាឪពុកពិតជាអគុណ និងសប្បាយចិត្តខ្លាំងណាស់»។
គ្រួសារកូនកំលោះ មិនបានចែករំលែកបន្ថែមពីមូលហេតុដែលធ្វើឱ្យគូស្នេហ៍នេះ មានរូបរាងចម្លែកបែបនេះទេ។
រូបថតកូនកំលោះកូនក្រមុំក្នុងឈុតប្រពៃណីពណ៌ក្រហមក្នុងពិធីមង្គលការបានល្បីពេញបណ្ដាញសង្គម។ អ្នកនិយមលេងអ៊ីនធឺណិតបានអបអរគូស្នេហ៍មួយគូនេះ និងបញ្ចេញមតិថា៖ «ពិតជារំភើប និងរីករាយនឹងពេលវេលានៃសុភមង្គលរបស់អ្នកទាំងពីរដែលសមនឹងទទួលបានវានាពេលនេះ, សូមអបអរសាទរនិងជូនពរអ្នកទាំងពីរមានសុភមង្គល និងស្រលាញ់គ្នារហូត»។
យោងតាមកំណត់ត្រាពិភពលោក ស្ត្រីខ្លីបំផុតដែលមានកម្ពស់ 62.8 សង់ទីម៉ែត្រគឺ Jyoti Amge កើតនៅឆ្នាំ 1993 មកពី Nagpur ប្រទេសឥណ្ឌា។
មូលហេតុដែល Jyoti Amge មានកម្ពស់ទាបបំផុតបែបនេះ គឺដោយសារតែរោគសញ្ញានៃការលូតលាស់មិនធម្មតា ដែលកើតឡើងអំឡុងពេលមានផ្ទៃពោះ។ ដោយមិនត្រូវបានរកឃើញទាន់ពេល ទើបក្មេងស្រីនេះកើតមកមានជំងឺតឿពីកំណើតបែបនេះទៅ។ នាងជាកូនពៅក្នុងគ្រួសារដែលមានកូន៥នាក់ គ្មានបងប្អូនបង្កើតណាម្នាក់មានជំងឺចម្លែកបែបនេះទេ។ ពួកគេធំឡើងមានសុខភាពល្អនិងធម្មតា។
ក្តីស្រមៃរបស់ Jyoti គឺចង់ក្លាយជាតារាបូលីវូដដ៏ល្បីល្បាញ។ ជាមួយនឹងការខិតខំប្រឹងប្រែងឥតឈប់ឈររបស់នាង Jyoti Amge បានចាប់អារម្មណ៍ និងយកឈ្នះមនុស្សគ្រប់គ្នា ឥឡូវនេះនាងត្រូវបានគេចាត់ទុកថាជាមនុស្សមានឥទ្ធិពលម្នាក់នៅលើបណ្តាញសង្គមនៅក្នុងប្រទេសឥណ្ឌា៕ រក្សាសិទ្ធិដោយ៖ លឹម ហុង