ឃ្លីបមួយដែលត្រូវបានថតនៅខេត្ត Bayan-Ölgii ប្រទេសម៉ុងហ្គោលី បានបង្ហាញសត្វចចកដ៏អស់សង្ឃឹមមួយក្បាល កំពុងត្រូវបានសត្វឥន្ទ្រី២ក្បាល ចាប់វាយប្រហារយ៉ាងសាហាវ។
នៅក្រោមក្រញ៉ាំដ៏មុតស្រួច និងចំពុះដ៏រឹងមាំរបស់សត្រូវ ចចកស្ទើរតែគ្មានឱកាសការពារ។ បន្ទាប់ពីតស៊ូបានមួយសន្ទុះ វាបានត្រឹមតែដេកនៅនឹងដី និងស៊ូទ្រាំនឹងការប្រយុទ្ធ។
គេបានដឹងថា សត្វឥន្ទ្រីមាសទាំងពីរនេះ ត្រូវបានចិញ្ចឹម និងបង្ហាត់ដោយពួកម៉ុងហ្គោលតាំងពីតូចមកម្ល៉េះ ក្នុងគោលបំណងបរបាញ់។ វាមានភ្នែកមុត ក្រញ៉ាំមុត និងចំពុះរឹងល្មមនឹងខាំស៊ីចំណីណាមួយបាន។
ឥន្ទ្រីមាសអាស៊ី ដែលត្រូវបានគេស្គាល់ថា ជាឥន្ទ្រីម៉ុងហ្គោលី គឺជាសត្វស្លាបមួយ ក្នុងចំណោមសត្វស្លាបដ៏ធំបំផុតនៅលើភពផែនដី។ ឥន្ទ្រីពេញវ័យមានទម្ងន់ប្រហែល 6,5 គីឡូក្រាម ប្រវែងដងខ្លួនគឺពី 66 ទៅ 102 សង់ទីម៉ែត្រ ស្លាបមានប្រវែងលើសពី 2 ម៉ែត្រ។
ឥន្ទ្រីមាសមានភ្នែកភ្លឺដោយការមើលឃើញរបស់ពួកវា គឺ៨ដងនៃមនុស្ស។ ពួកវាអាចឈានដល់ល្បឿនរហូតដល់ 250 គីឡូម៉ែត្រក្នុងមួយម៉ោង ហើយអាចហើរចុះក្រោម សូម្បីតែសត្វធំដូចជាចចក ជាមួយនឹងល្បឿនហោះហើររហូតដល់ 200 គីឡូម៉ែត្រ ក្នុងមួយម៉ោង។
ក្រញ៉ាំជើងរបស់ឥន្ទ្រីគឺកោង និងស្រួច។ ក្រញ៉ាំដ៏មុតស្រួចនេះ គឺជាអាវុធដ៏មានឥទ្ធិពលរបស់ពួកវាក្នុងការវាយលុក និងចាប់សត្វព្រៃ។ នៅពេលដែលពួកវាកំណត់គោលដៅបាន វានឹងពិបាកសម្រាប់សត្វព្រៃ ដើម្បីគេចផុតពីការស្លាប់ដ៏ឈឺចាប់។
ពួកវាបរបាញ់ទន្សាយ កំប្រុកដី កញ្ជ្រោង និងសត្វស្លាបតូចៗ ឬសត្វស្លាបធំៗដូចជាសត្វក្ងានព្រៃ និងសត្វក្រៀល។ ក្នុងករណីខ្លះ ពួកវាថែមទាំងអាចសម្លាប់សត្វចចកពណ៌ប្រផេះទៀតផង។ នៅពេលដែលអាហារខ្វះខាត ស្តេចបក្សីនេះអាចស៊ីសូម្បីតែសាកសពស្អុយរលួយ៕ រក្សាសិទ្ធិដោយ៖ លឹម ហុង
