ពិតជាគួរឲ្យរន្ធត់ណាស់ គ្រាដែលសត្វស្វាមួយក្បាល ត្រូវពស់ថ្លាន់ដ៏ធំមួយក្បាល រុំរឹតរហូតងាប់ ខណៈសត្វស្វាមួួយហ្វូងបានព្យាយាមជួយសង្គ្រោះមិត្តភក្តិរបស់ពួកវា ទាំងគ្មានសង្ឃឹម។ ហេតុការណ៍នេះបានកើតឡើងនៅផ្លូវឡើងភ្នំមួយកន្លែង ស្ថិតនៅក្នុងខេត្ត Prachuap Khiri Khan ភាគខាងត្បូងប្រទេសថៃ។
ក្នុងឃ្លីបបានបង្ហាញឲ្យឃើញពស់ថ្លាន់ធំមួយក្បាលកំពុងរុំរឹតស្វាមួយក្បាល ហើយនៅពេលនោះ មានសត្វស្វារាប់សិបក្បាលបានកំពុងឡោមព័ទ្ធក្នុងសកម្មភាព “បំភិតបំភ័យ” យ៉ាងស្លន់ស្លោ។
តែទោះបីស្វាច្រើនកុះករក៏ដោយ ក៏ពស់ថ្លាន់ហាក់មិនខ្លាចការគំរាមរបស់ហ្វូងស្វាទាំងនោះទេ។ ជាក់ស្តែង នៅពេលស្វាឆ្មក់ចូល ពស់ថ្លាន់ក៏ស្ទុះមកខាំ ព្រមានភ្លាមៗ។ តាមសាក្សីនៅកន្លែងកើតហេតុ បុរសអ្នកស្រុកម្នាក់បានយកមែកឈើវាយកំឡាពស់ថ្លាន់ឲ្យដោះលែងស្វា ប៉ុន្តែមិនបានសម្រេចនោះទេ។
យោងតាមនារីអ្នកទេសចរម្នាក់ ដែលមកលេងតំបន់នោះ បានឲ្យដឹងថា នាងពិតជាមានការភ្ញាក់ផ្អើលយ៉ាងខ្លាំង ជាមួយនឹងសកម្មភាពប្រមូលផ្តុំនៃហ្វូងស្វាដ៏ធំបែបនេះ។ តែទោះជាយ៉ាងណា សត្វដែលត្រូវពស់ថ្លាន់រុំរឹតនោះ មិនអាចរួចផុតជីវិតឡើយ។
អ្នកទេសចរស្រីរូបនេះបាននិយាយថា «វាពិតជាគួរឱ្យរំភើបណាស់ ដែលបានឃើញហ្វូងស្វារាប់សិបក្បាល បានប្រញាប់ប្រញាល់ជួយសង្គ្រោះបងប្អូនរបស់ពួកវា ប៉ុន្តែការប្រឹងប្រែងរបស់ពួកវាមិនបានជោគជ័យនោះទេ។
កន្លងមក ពស់ថ្លាន់យក្ស តែងតែមានភាពដ៏អស្ចារ្យ ជាមួយសមត្ថភាព រុំរឹតរហូតដល់ចំណីងាប់ រួចទើបលេបដោយមិនចាំបាច់ខាំអ្វីទាំងអស់។ វិធីសាស្ត្ររបស់ពួកវា គឺចូលទៅជិតសត្វព្រៃដោយស្ងៀមស្ងាត់ នៅពេលប្រទះឃើញ ហើយពួកវាចាប់ចំណីមិនឲ្យរួចផុតជីវិតរហូត 90% បើទោះជាសត្វព្រៃដែលសមល្មមវាលេបរួចនោះ តស៊ូយ៉ាងណាក៏ដោយ៕ រក្សាសិទ្ធិដោយ៖ លឹម ហុង
