បណ្តាញសង្គម បានផ្ទុះការរិះគន់ និងសើចចំអកយ៉ាងខ្លាំង ចំពោះវីដេអូឃ្លីបបុរសម្នាក់ ចតម៉ូតូខុសច្បាប់ ត្រូវបានមន្រ្តីសាលាស្រុក Minburi ធ្វើការឃាត់ខ្លួន ដែលធ្វើឲ្យគាត់ទប់លែងជាប់ «បន្ទោរបង់» នៅលើរថយន្តប៉ូលីសទាំងបង្ខំតែម្តង បន្ទាប់ពីមន្ត្រីមិនជឿពីការត្អូញ «ឈឺពោះ» ខ្លាំងរបស់គាត់។
ឃ្លីបនេះត្រូវបានអ្នកប្រើប្រាស់ហ្វេសប៊ុកដាក់ឈ្មោះថា “Nam Sutee Muangmeen” បង្ហោះឡើងលើបណ្តាញសង្គម និងប្រាប់ឲ្យដឹងថា សាលាស្រុក Minburi បានព្យាយាមឃាត់ខ្លួនបុរសម្នាក់ ដែលមិនច្បាស់ថា គាត់ខុសច្បាប់អ្វីនោះទេ។ ដោយសារគាត់មិនចង់ត្រូវបានឃុំខ្លួន គាត់ចង់ចចារប៉ុន្មាន? ប៉ុន្តែ មន្រ្តីទាំងនោះមិនព្រមចចារនោះទេ។
បុរសនោះបានសម្រេចចិត្តទុកម៉ូតូ ហើយដើរទៅកាន់រថយន្តប៉ូលីស។ ប៉ុន្តែ អ្វីដែលមិននឹកស្មានដល់នោះ គឺនៅពេលមន្រ្តីបើកទ្វាក្រោយរថយន្តឲ្យចូល បុរសនោះស្រាប់តែស្រាតខោ រួច «បាញ់» មួយគ្រាប់យ៉ាងធ្ងន់ឲ្យធូរស្រាល នៅលើកៅអីរថយន្តប៉ូលីស ក្នុងរយៈពេលមិនដល់ ៣ វិនាទីផង មុននឹងនិយាយទៅកាន់មន្រ្តីដែលព្យាយាមឃាត់ខ្លួនគាត់ថា៖ «ខ្ញុំបានប្រាប់ហើយថា ឈឺ…!»។
វីដេអូក៏បានបង្ហាញប៉ូលិសទាញបុរសនោះចេញពីរថយន្តទាំងដែលខោរបស់បុរសរូបនោះ មិនទាន់ធ្វើការលើកស្លៀកស្រួលបួលនៅឡើយ ខណៈភាគីទាំងពីរនៅតែធ្វើការបន្តឈ្លោះប្រទាញប្រទង់គ្នា។
ហេតុការណ៍នេះ បានកើតឡើងនៅត្រង់ចំណុចផ្លូវចូលមហាវីថី សយ រ៉ាមខេង 190 ក្នុងសង្កាត់ Minburi ក្រុងបាងកក។ បុរសនោះត្រូវបានគេដឹងថា គឺជាជាងជួសជុលទូ ATM ប៉ុន្តែ បានមកចតម៉ូតូនៅលើចិញ្ចឹមផ្លូវ ហើយប្រហែលចតខុសច្បាប់ ក៏ស្រាប់តែត្រូវបានប៉ូលីសឃាត់ខ្លួនតែម្តង។ តែទោះជាយ៉ាងណា បុរសរូបនោះ ត្រូវបានប៉ូលីសធ្វើការផាកពិន័យចំនួន ៧០០០ បាត ក្នុងនោះចតលើចិញ្ចើមផ្លូវខុសច្បាប់ចំនួន ៥០០០ បាត់ និងមួយទៀត ២០០០ បាត បន្ទោរបង់នៅទីសាធារណៈ៕ រក្សាសិទ្ធិដោយ៖ លឹម ហុង
