អ្នកលេង Instagram ដ៏ល្បីជនជាតិរុស្ស៊ី និងស្វាមីរបស់នាង ត្រូវបានបណ្តេញចេញពីកោះបាលី ប្រទេសឥណ្ឌូនេស៊ី បន្ទាប់ពីនាងបង្ហោះរូបថតអាក្រាតកាយរបស់នាង ដែលថតនៅក្រោមដើមឈើដ៏ពិសិដ្ឋអាយុកាល ៧០០ ឆ្នាំ។
នាង Alina Fazleeva ដែលមានអ្នកតាមដាន 18,000 នាក់នៅលើ Instagram បានថតស្រាតផ្អែកនឹងដើមពោធិដ៏ធំ ស្ថិតក្នុងបរិវេណប្រាសាទ ដែលថតដោយប្តីរបស់នាងឈ្មោះ Andrey Fazleev។ បើទោះជារូបភាពនេះត្រូវបានលុបចេញភ្លាមៗយ៉ាងណា ក៏វាបានបង្កឱ្យមានការខឹងសម្បារក្នុងសហគមន៍មូលដ្ឋាន បន្ទាប់ពីរូបភាពនេះបានរីករាលយ៉ាងលឿនកាលពីថ្ងៃទី១ ខែឧសភា។ សូមបញ្ជាក់ថា ដើមឈើ និងលក្ខណៈធម្មជាតិផ្សេងទៀត ត្រូវបានគេគិតថាជាលំនៅឋានរបស់ព្រះនៅក្នុងវប្បធម៌ហិណ្ឌូបាលី ហើយត្រូវបានចាត់ទុកថាពិសិដ្ឋ។
ប្តីប្រពន្ធនេះត្រូវបានបណ្តេញចេញពីកោះបាលី កាលពីថ្ងៃសុក្រសប្តាហ៍មុន ហើយត្រូវបានហាមឃាត់មិនឱ្យចូលកោះបាលីម្តងទៀត ដែលយ៉ាងហោចណាស់ប្រាំមួយខែ នេះបើយោងតាមទីភ្នាក់ងារសារព័ត៌មាន DPA។
ប្រធានអន្តោប្រវេសន៍របស់កោះបាលី លោក Jamaruli Manihuruk បានប្រាប់អ្នកយកព័ត៌មានថា “ពួកគេបានធ្វើសកម្មភាពដែលបង្កគ្រោះថ្នាក់ដល់សណ្តាប់ធ្នាប់សាធារណៈ និងមិនគោរពតាមបទដ្ឋានក្នុងតំបន់ ដូច្នេះពួកគេត្រូវបានដាក់ទណ្ឌកម្មដោយការបណ្តេញចេញនេះ។ ឈ្មោះរបស់ពួកគេ នឹងត្រូវបានបញ្ចូលក្នុងបញ្ជីហាមឃាត់ការចូលប្រទេស”។
តែទោះជាយ៉ាងណា មុននឹងចាកចេញពីប្រទេសឥណ្ឌូណេស៊ី ប្ដីប្រពន្ធដ៏គ្មានកេរ្តិ៍ខ្មាសនេះ បានត្រឡប់ទៅដើមឈើនោះវិញដើម្បីធ្វើពិធីសុំការអភ័យទោសផងដែរ៕ រក្សាសិទ្ធិដោយ៖ លឹម ហុង