តាមរយៈរូបភាពស្រីស្អាត៣នាក់ នាំគ្នាលេងសើចកាច់ និងបង្អួត «ផ្កាបំពង់ក្រឡោម» ម្នាក់ៗឡើងរំជើបរំជួល ត្រូវបានគេចែករំលែកធ្វើឲ្យភ្ញាក់ផ្អើល អស់សំណើចពេញបណ្តាញសង្គមរួចមក ក្រសួងក្រសួងបរិស្ថានក៏បានចេញប្រតិកម្មថា នេះជាទង្វើរនៃការបំផ្លាញធនធានធម្មជាតិ និងសូមបញ្ឈប់ការកាច់លេងសើចបែបនេះទៀតទៅ។
នេះបើតាមទំព័រហ្វេសប៊ុកផ្លូវការរបស់ក្រសួងបរិស្ថាន កាលពីថ្ងៃទី១១ ខែមេសា ឆ្នាំ២០២២ បានបង្ហោះភ្ជាប់ជាមួយរូបថតស្រីស្អាត៣នាក់បេះបង្អួតផ្កាខាងលើនេះ ដោយបញ្ជាក់យ៉ាងដូច្នេះថា «ឱ! ផ្កាបំពង់ក្រឡោមអ្វីដែលពួកគាត់កំពុងធ្វើនេះ គឺខុសហើយនិងសូមកុំប្រព្រឹត្តដូច្នេះទៀតនៅថ្ងៃក្រោយ!។ សូមអរគុណចំពោះការស្រឡាញ់ធនធានធម្មជាតិ ប៉ុន្តែកុំបេះដូច្នេះ វាទៅជាបំផ្លាញវិញទេ!»។
ជាការពិតណាស់ «ផ្កាបំពង់ក្រឡោម» នេះ គឺបានទាក់ទាញភ្ញៀវទេសចរ ទៅលេងកម្សាន្តនៅរមណីយដ្ឋានបូកគោ នាំគ្នាចាប់អារម្មណ៍យ៉ាងខ្លាំង ព្រោះតែ «សន្តានរូបរាង» របស់វាដូចទៅនិងប្រដាប់ភេទបុរសអុីចឹង។ ឃើញចម្លែកប្លែកបែបនេះ ក្នុងនោះ ក៏មានភ្ញៀវទេសចរមួយចំនួនតូច ក៏បានកាច់ផ្កានេះលេងសើច ថតវីដេអូបង្ហោះនៅលើបណ្តាញសង្គម ដោយមិនខ្វល់ពីស្លាកហាមបេះផ្កានេះឡើយ។
លោក នេត្រ ភក្រ្តា អ្នកនាំពាក្យក្រសួងបរិស្ថាន ក៏ធ្លាប់បានបញ្ជាក់ថា ផ្កាបំពង់ក្រឡោមនេះ មានចំនួន១២៩ប្រភេទ ក្នុងនោះ៥ប្រភេទ មានដុះលូតលាស់នៅផ្នែកមួយចំនួននៅកម្ពុជា ដូចជាប្រភេទ Nepenthes bokorensis ជាប្រភេទដែលមានវត្តមាននៅតំបន់ភ្នំពពកវិល វាលស្រែ៥០០ វាលស្រែ១០០ នៃឧទ្យានជាតិព្រះមុនីវង្ស «បូកគោ»។
លើសពីនេះ លោកក៏បានអំពាវនាវ ដល់ភ្ញៀវទេសចរចូលរួមថែរក្សាអនាម័យបរិស្ថានដោយវេចខ្ចប់និងទុកដាក់សំណល់រឹងសំរាមឱ្យបានត្រឹមត្រូវ និងចូលរួមថែរក្សាជីវៈចម្រុះនានា ជាពិសេសគួរកុំបេះប្រភេទផ្ការុក្ខជាតិព្រៃ ដែលកំពុងរងគ្រោះជិតផុតពូជដើម្បីរក្សាពូជនិងសោភ័ណភាពរមណីយដ្ឋានឱ្យបានស្អាតសម្រាប់ការទស្សនាកម្សាន្តរបស់ភ្ញៀវទេសចរដទៃទៀតដែលចូលចិត្តនិងស្រឡាញ់ធម្មជាតិ៕ រក្សាសិទ្ធិដោយ៖ លឹម ហុង
