នេះជារឿងមួយដ៏ភ្ញាក់ផ្អើល និងអាចនិយាយបានថាថ្មីចែសតែម្តង នៅក្នុងប្រទេសឥណ្ឌា ខណៈដែលប្តីប្រពន្ធមួយបាននាំកូនប្រុសរបស់ពួកគេឡើងតុលាការ ដើម្បីទាមទារឱ្យកូនប្រុសនិងប្រពន្ធ បង្កើតចៅឲ្យបានមួយក្នុង១ឆ្នាំ ពុំនោះទេ នឹងត្រូវសងសំណងដល់ពួកគេចំនួន $ 650,000 សម្រាប់ការចំណាយជាច្រើនទៅលើកូនប្រុសរាប់តាំងពីការចំណាយទៅលើការរៀនសូត្រឡើងទៅ…។
Sanjeev និង Sadhana Prasad និយាយថា ពួកគេហត់នឿយក្នុងការសន្សំប្រាក់ និងចំណាយទៅលើការរៀនសូត្ររបស់កូនប្រុសរហូតក្លាយជាអ្នកបើកបរយន្តហោះ និងព្រមទាំងការចំណាយប្រាក់សម្រាប់អាពាហ៍ពិពាហ៍ដ៏ប្រណីតរបស់ពួកគេផងដែរ។
ប្តីប្រពន្ធមួយនេះបាននិយាយនៅក្នុងបណ្តឹងរបស់ពួកគេដែលបានដាក់ទៅតុលាការក្នុងទីក្រុង Haridwar កាលពីសប្តាហ៍មុនថា «កូនប្រុសរបស់ខ្ញុំបានរៀបការអស់រយៈពេល៦ឆ្នាំហើយ ប៉ុន្តែពួកគេនៅតែមិនទាន់មានគម្រោងបង្កើតកូន។ យ៉ាងហោចណាស់ប្រសិនបើយើងមានចៅ ដើម្បីចំណាយពេលជាមួយនោះការឈឺចាប់របស់យើងនឹងអាចរំសាយបាន»។
The Times of India បានរាយការណ៍កាលពីថ្ងៃព្រហស្បតិ៍ថា សំណង 50 លានរូពី (646,000 ដុល្លារ) ដ៏ច្រើននោះរួមមាន៖ ការចំណាយលើការទទួលភ្ញៀវក្នុងពិធីមង្គលការនៅក្នុងសណ្ឋាគារលំដាប់ផ្កាយប្រាំ រថយន្តទំនើបតម្លៃ 80,000 ដុល្លារ និងថ្លៃចំណាយសម្រាប់ការក្រេបទឹកឃ្មុំនៅក្រៅប្រទេស។
កាសែតនេះបាននិយាយថា ឪពុកម្តាយនេះក៏បានចំណាយប្រាក់ចំនួន 65,000 ដុល្លារ ផងដែរ ដើម្បីអោយកូនប្រុសរបស់ពួកគេបានហ្វឹកហាត់ជាអ្នកបើកបរយន្តហោះនៅសហរដ្ឋអាមេរិក ។
ប្តីប្រពន្ធនេះបាននិយាយថា៖ «យើងក៏ត្រូវខ្ចីប្រាក់គេ ដើម្បីយកមកសាងសង់ផ្ទះរបស់យើង ហើយឥឡូវនេះយើងកំពុងជួបការលំបាកផ្នែកហិរញ្ញវត្ថុជាច្រើន។ យើងពិបាកចិត្តណាស់ ព្រោះសព្វថ្ងៃនេះ ពួកយើងកំពុងរស់នៅតែពីរនាក់ប្តីប្រពន្ធប៉ុណ្ណោះ»។
មេធាវីរបស់ប្តីប្រពន្ធលោក Arvind Kumar បាននិយាយថា បណ្តឹងនេះ នឹងត្រូវលើកយកសម្រាប់សវនាការដោយតុលាការនៅភាគខាងជើងប្រទេសឥណ្ឌា នៅថ្ងៃទី១៧ ខែឧសភា។
គួរបញ្ជាក់ថា ប្រទេសឥណ្ឌាមានប្រព័ន្ធគ្រួសាររួមគ្នាដ៏រឹងមាំ ជាមួយមនុស្សជំនាន់ជាច្រើន រួមទាំងជីដូនជីតា ក្មួយប្រុស មីង និងពូ រស់នៅក្នុងគ្រួសារតែមួយ។
តែទោះជាយ៉ាងណា ក្នុងរយៈពេលប៉ុន្មានឆ្នាំចុងក្រោយនេះ និន្នាការនេះបានផ្លាស់ប្តូរ ដោយប្តីប្រពន្ធវ័យក្មេងរៀបការហើយ ចូលចិត្តផ្លាស់ទីឆ្ងាយពីឪពុកម្តាយ ឬបងប្អូនបង្កើតរបស់ពួកគេ ហើយប្រពន្ធដូចជាក្នុងករណីនេះ បានជ្រើសរើសធ្វើការជាជាងផ្តោតលើការមានកូន និងនៅផ្ទះ៕ រក្សាសិទ្ធិដោយ៖ លឹម ហុង
