ភ្នំពេញ៖ ថ្មីៗនេះ ប្រធានសមាគមចិញ្ចឹមសត្វកម្ពុជា លោក ស្រ៊ុន ពៅ បានដាក់លិខិត ក៏ដូចជាលិខិត ឲ្យជួយទប់ស្កាត់ ការនាំសត្វចូលកម្ពុជា ដោយខុសច្បាប់ ពីសំណាក់ជនខិលខូចមួយចំនួន ដែលឆ្លៀតឱកាស គិតតែពីផលប្រយោជន៍ផ្ទាល់ខ្លួនភ្លេចពីប្រយោជន៍រួម។ ខេត្ត ដែលលោក ស្រ៊ុន ពៅ បានដាក់លិខិត គឺជាខេត្តដែលមានព្រំដែនជាប់និងប្រទេសវៀតណាម មានដូចជា ខេត្តតាកែវ, ព្រៃវែង, ត្បូងឃ្មុំ និងខេត្តស្វាយរៀង។
លោកបន្តថា ក្នុងចំណោមខេត្តទាំងនេះ មានតែខេត្តស្វាយរៀងមួយប៉ុណ្ណោះ ដែលបានសហការចូលរួមទប់ស្កាត់ តាមសំណើសុំរបស់សមាគមចិញ្ចឹមសត្វកម្ពុជា។ ក្រៅពីនេះ មិនទាន់មានការឆ្លើយតបទេ ខណៈដែលលោក បានដាក់លិខិតទៅបណ្តាខេត្តទាំងនោះ មាន រយៈពេលជិត១ខែទៅហើយ។
លោកស្រ៊ុន ពៅ បន្តទៀតថា ការនាំចូលសត្វខុសច្បាប់ ពិសេសជ្រូក គឺប៉ះពាល់ជាច្រើនដល់អ្នកចិញ្ចឹមក្នុងស្រុក ក៏ដូចជាពលរដ្ឋ ដែលហូចសាច់ជ្រូក គឺមានតម្លៃថ្លៃជាដើម ព្រោះជ្រូក ដែលនាំចូលខុសច្បាប់អាចមានជំងឺផ្សេងៗ ដែលធ្វើឲ្យជ្រូកចិញ្ចឹមក្នុងស្រុក ឆ្លងជំងឺឈឺងាប់ ឬបង្ខំឲ្យអ្នកចិញ្ចឹមក្នុងកសិដ្ឋានលក់ក្រោមតម្លៃទីផ្សារ ដើម្បីយកប្រាក់ដើមមកវិញបន្តិចបន្តួច ទោះបីលក់ខាតក៏ត្រូវបង្ខំចិត្តលក់ដែរ។
គួរបញ្ជាក់ថា បើតាមប្រធានសមាគមចិញ្ចឹមសត្វកម្ពុជា សមាគមចង់ឃើញអាជ្ញាធរនៅបណ្តាខេត្តតាមបន្ទាត់ព្រំដែន កម្ពុជា-វៀតណាម ចូលរួមសហការទប់ស្កាត់ការនាំចូលនេះឲ្យមានប្រសិទ្ធភាព ដើម្បីប្រយោជន៍រួមទាំងអស់គ្នា៕