កាលពីថ្ងៃទី១៦ ខែឧសភា ឆ្នាំ២០១៨ កាសែត New York Post បានរាយការណ៍ថា ក្រសួងធនធានធម្មជាតិកម្ពុជា បានស្នើឱ្យសាធារណជនបញ្ឈប់ការបេះផ្កា Nepenthes holdenii ឬដើមបំពង់ប្រឡោម ក្រោយពីឃើញនារីៗមួយក្រុមនាំគ្នាបេះផ្កាជិតផុតពូជនេះ មកលេងសើច រួចថតបង្ហោះនៅលើបណ្ដាញសង្គម ធ្វើឱ្យមានការភ្ញាក់ផ្អើលជាខ្លាំង។
ក្នុងវីដេអូឃ្លីប គេឃើញស្រីស្អាត៣នាក់ បាននាំគ្នាបេះផ្កា «ដើមបំពង់ប្រឡោម» នេះ ដោយនិយាយលេងសើចថា Nepenthes គឺដូចជា «របស់» មនុស្សអុីចឹង និងសូម្បីបង្ហាញអារម្មណ៍ព្រឺរោមទៀតផង។ ដោយទីកន្លែងកើតហេតុ ត្រូវបានគេជឿថា ស្ថិតនៅលើភ្នំបូកគោ ខេត្តកំពត ប្រទេសកម្ពុជា។
បន្ទាប់ពីឃ្លីបស្រីស្អាតមួយក្រុមនោះ នាំគ្នាបេះផ្កា Nepenthes បង្ហោះនៅលើបណ្តាញសង្គមរួចមក ក្រសួងធនធានធម្មជាតិ និងបរិស្ថាននៃប្រទេសកម្ពុជា ក៏បានចេញប្រតិកម្មមួយកាលពីថ្ងៃពុធ សបា្ដហ៍មុន ដោយបានលើកឡើងថា៖ «ឱផ្កាបំពង់ប្រឡោម អ្វីដែលពួកគាត់កំពុងធ្វើនេះ គឺខុសហើយ សូមកុំប្រព្រឹត្ដដូច្នេះទៀតនៅថ្ងៃក្រោយ! សូមអរគុណចំពោះការស្រឡាញ់ ធនធានធម្មជាតិ ប៉ុន្ដែកុំប៉ះដូច្នេះ វាទៅជាការបំផ្លាញវិញទេ»។
គួរបញ្ជាក់ថា Nepenthes holdenii ឬផ្កា ដើមបំពង់ប្រឡោម ត្រូវបានរកឃើញជាទូទៅនៅលើភ្នំ ភាគខាងលិចនៃប្រទេសកម្ពុជា។ វាត្រូវបានគេដាក់រហស្សនាមថា Penis Tree ដោយសារតែវាមានរូបរាងដូចអវៈយវៈភេទមនុស្សប្រុស និងមិនត្រូវបានការពារយូរមកហើយ។
តែទោះជាយ៉ាងណាក៏ដោយ ក្នុងរយៈពេលប៉ុន្មានឆ្នាំចុងក្រោយនេះ ទាំងអ្នកស្រុក និងអ្នកទេសចរ បាននាំគ្នាថតជាមួយផ្កានេះយ៉ាងរីករាយ រួចបង្ហោះរូបនៅលើបណ្តាញសង្គម៕ រក្សាសិទ្ធិដោយ៖ លឹម ហុង
