ភ្នំពេញ ៖ នាព្រឹកវេលាម៉ោង ១១និង០០នាទីព្រឹកថ្ងៃទី១៨ ខែឧសភា ឆ្នាំ២០២២ មានករណីអគ្គិភ័យបានឆាបឆេះឃ្លាំងអេតចាយ មួយកន្លែង ផ្ទះលេខ១៦បេ ដែលស្ថិតនៅផ្លូវបេតុង ក្រុមទី៣ ភូមិស្លែងរលីង សង្កាត់អូរបែកក្អម ខណ្ឌសែនសុខ រាជធានីភ្នំពេញ។
ហេតុការណ៍អគ្គិភ័យឆាបឆេះនេះ បណ្តាលមកពីការ ឆ្លងចរន្តអគ្គិសនី បង្កជាអគ្គិភ័យ ហើយធ្វើឲ្យខូចខាតឆេះបន្ទប់ស្នាក់នៅចំនួន ៣បន្ទប់ ទំហំ ៣ម៉ែត្រ គុណ៦ម៉ែត្រ , ឆេះក្រដាសឡាំង និងសម្ភារៈប្រើប្រាស់មួយចំនួន និងពុំបានឆេះរាលដាលដល់ផ្ទះអ្នកជិតខាងឡើយ។
ចំណែកឯទីតាំងខាងលើ ជាប្រភេទសំណង់ ដែកប្រក់ស័ង្កសី ដែលមានទំហំ (១៣ម៉ែត្រ គុណ ២៥ម៉ែត្រ)។
អគ្គិភ័យខាងលើនេះ បានរលត់ទៅវិញទាំងស្រុងជាស្ថាពរនៅវេលាម៉ោង ១១និង៥៥នាទីនាថ្ងៃខែឆ្នាំដដែល ដោយប្រើប្រាស់រថយន្តការិយាល័យអគ្គិភ័យ រាជធានីភ្នំពេញ ចំនួន ៨គ្រឿង ប្រើប្រាស់ទឹកអស់ ៨ឡាន ស្មើនឹង ៣២ម៉ែត្រគូប៕ រក្សាសិទ្ធិដោយ ៖ សួង សាម
