នេះជាខណៈពេលដ៏រន្ធត់ គ្រាដែលបុរសឥណ្ឌាម្នាក់ ត្រូវខ្លារខិនមួយក្បាល ទាល់ច្រកដេញខាំ រត់ឡើងឡានសឹងពុំទាន់ ប៉ុន្តែ ត្រូវខ្លាខាំនៅត្រង់ជើង មិនដឹងរងរបួស ឬយ៉ាងណានោះទេ។
នៅក្នុងឃ្លីបបានបង្ហាញបុរស២នាក់ កំពុងឈរអើតមើលពីជញ្ជាំងទ្រូងផ្លូវម្ខាង ប៉ុន្តែ មួយសន្ទុះក្រោយមក ពួកគេក៏បាន «ដាក់មេប្រូច» ទាំងព្រលឹងចុងសក់ ដោយខណៈពេលដ៏អាសន្ននោះ បុរសពាក់អាវខៀវ បានគ្រប់គ្រងរត់ឡើងចូលក្នុងកាប៊ីនឡាន ខណៈបុរសម្នាក់ទៀតពាក់អាវស រត់បំណងចូលផ្ទះគេ ប៉ុន្តែ ពុំមានច្រកចូលបាន ក៏បកត្រឡប់មកឡានវិញ ស្របពេលខ្លារអិននោះផ្លោះជញ្ជាំងមកដល់ល្មម។
ភ្លាមៗនោះ ខណៈបុរសនោះកំពុងព្យាយាមតោងឡើងចូលក្នុងកាប៊ីនជាមួយមិត្តភក្តិ តែឡើងពុំផុត ក៏ត្រូវខ្លាចាប់ខាំទាញជើងតែម្តង។ ប៉ុន្តែ សំណាងហើយ ដែលគាត់ត្រូវបានមិត្តភក្តិជួយចាប់ទាញដៃ កុំអីមិនដឹងគ្រោះថ្នាក់យ៉ាងណានោះទេ។
បន្ទាប់មកខ្លារខិននេះ ក៏ត្រូវប្រឈមមុខនឹងសត្វឆ្កែមួយហ្វូង ដែលធ្វើឲ្យវាត្រូវគេចខ្លួន លោតឡើងជញ្ជាំង ប៉ុន្តែ ដោយសារតែឡើងពុំរួច វាក៏បានចុះមកវិញ ឈប់មួយសន្ទុះ រួចដើរសំដៅក្រោមឡាន និងបាត់ខ្លួនបាត់ទៅ។
វីដេអូឃ្លីបនេះ បន្ទាប់ពីត្រូវបានបង្ហោះលើបណ្តាញសង្គមរួចមក បានធ្វើអោយមនុស្សជាច្រើនមានការភិតភ័យជំនួសយ៉ាងខ្លាំង ព្រោះថា បើពុំមានឱកាសឡើងឡានទាន់ពេលនោះទេ បុរសរូបនោះប្រហែលអាចត្រូវខ្លារខិនសម្លាប់ហើយ។
ខ្លារខិន (Panthera pardus) ជាទូទៅ គឺពួកវាមានប្រវែងពី 1 ទៅ 2 ម៉ែត្រទម្ងន់ 30 – 90 គីឡូក្រាម។ ខ្លារខិនគឺជាសត្វមំសាសីដ៏មហិមា ដែលសត្វព្រៃជាចំណីរបស់ពួកវារួមមាន៖ ក្តាន់, ស្វា, ជ្រូកព្រៃ, ទន្សាយ និងសត្វដទៃទៀត។
ជាមួយនឹងទម្លាប់នៃការលាក់បាំងរបស់ពួកវា នោះពួកវាអាចចូលទៅជិតតំបន់លំនៅដ្ឋានរបស់មនុស្ស ដោយមិនត្រូវបានរកឃើញនោះទេ៕ រក្សាសិទ្ធិដោយ៖ លឹម ហុង
