ធ្វើដំណើរបណ្តើរ គិតបារម្ភបណ្តើរថា នឹងអាចបាក់រលំដើមឈើសង្កត់ឡានទៀតហើយ បើខ្យល់កន្រ្តាក់បក់បោកខ្លាំងយ៉ាងនេះ។ ពិតណាស់ ដូចការគិតមែន គឺនៅមុននេះបន្តិច (នាវេលាអំឡុងម៉ោង ៣រសៀល ថ្ងៃទី២៧ ខែឧសភា ឆ្នាំ២០២២) ខ្យល់កន្ត្រាក់បោកបក់ដ៏ខ្លាំងក្លាមុនពេលធ្លាក់ភ្លៀង បានបណ្តាលឲ្យរថយន្តចំនួន ៣ គ្រឿង នៅទីកន្លែងផ្សេងគ្នា ត្រូវដើមឈើបាក់រលំសង្កត់រងការខូចខាតយ៉ាងដំណំ។
នេះបើតាមប្រភពចែករំលែកព័ត៌មានបឋម នៅលើបណ្តាញសង្គម បានឲ្យដឹងថា រថយន្ត៣គ្រឿង ដែលត្រូវដើមឈើសង្កត់លើ គឺទី១. LEXUS 330 ពណ៍ស (ក្បែរអគារ COURTYARDS) ស្ថិតនៅផ្លូវ214, ទី២- នៅផ្លូវម៉ៅសេទុង កែងវត្តទួលទំពូង សង្កត់លេីរថយន្ត MAZDA និងទី៣- សង្កត់លេីរថយន្តស៊េរីទំនេីបពណ៍ខ្មៅ។
ក្រៅពីទីតាំងខាងលើ គឺនៅម្ដុំផ្សារនាគមាស ក៏បាក់រលំដើមឈើ១ដើមមកលេីផ្លូវផងដែរ។ ក្រោយករណីនេះបានកើតឡើង ភ្លាមៗនោះ គេក៏បានឃើញកម្លាំងសណ្ដាប់ធ្នាប់ខណ្ឌពាក់ព័ន្ធ បានចុះទៅកាន់កន្លែងកើតហេតុនីមួយៗ រួមជាមួយរណារ ដើម្បីកាត់ផ្តាច់ដើមឈើបាក់រលំចេញពីរថយន្តជាបណ្តើរៗ។
សូមបញ្ជាក់ថា ហេតុកាជាមួយគ្នានេះផងដែរ ក៏សូមបងប្អូនទាំងអស់គ្នា គួរតែមានការប្រុងប្រយ័ត្នខ្ពស់ ជាពិសេសចតរថយន្តឲ្យឆ្ងាយ ពីដើមឈើធំៗ ដែលប្រឈមនឹងការបាក់រលំ៕ រក្សាសិទ្ធិដោយ៖ លឹម ហុង
