Cha Deen ដែលជាតូបតែតូចមួយនៅ Lam Phlai ខេត្ត Songkhla របស់ប្រទេសថៃ ថ្មីៗនេះ បានធ្វើឲ្យកក្រើកប្រព័ន្ធផ្សាយក្នុងស្រុក ចំពោះគំនិតច្នៃប្រឌិតការវេចខ្ចប់តែដ៏មិនធម្មតា ដេីម្បីចូលរួមកាត់បន្ថយការប្រេីទុយោរប្លាស្ទីច។
ពិតណាស់ នៅក្នុងប្រទេសថៃ និងបណ្តាប្រទេសអាស៊ីផ្សេងទៀត ភេសជ្ជៈទឹកកដូចជា តែបៃតង ឬកូកាកូឡា ជាដើម ត្រូវបានលក់ច្រកក្នុងកែវជ័រថ្លាធម្មតា។ ប៉ុន្តែ សម្រាប់ថង់ Design ថ្មីនេះវិញ គឺបានធ្វើឲ្យប្រជាជនថៃភាគច្រើនពិតជាមានការភ្ញាក់ព្រឺតតែម្តង នៅពេលបានឃើញថង់មានរាងមិនធម្មតានេះ ដែលកំពុងត្រូវបានប្រើនៅតូបលក់ភេសជ្ជៈខាងលើតែមួយគត់នៅ Lam Phlai។ ជំនួសឱ្យថង់ប្លាស្ទិច និងទុយោស្តង់ដារ Cha Deen បានឌីហ្សាញថង់ផ្ទាល់ខ្លួន ដែលមានផ្នែកបន្ថែមមើលទៅពិតជាព្រឺសម្បុរ សូមមើលដោយខ្លួនឯង…។
រូបភាពថង់តែថ្មីរបស់ Cha Deen ថ្មីៗនេះ បានល្បីពេញបណ្ដាញសង្គមថៃ ហើយវាសឹងតែត្រូវបានគេពេញនិយមភ្លាមៗ ហើយក៏បានជំរុញឲ្យមានប្រតិកម្មពីអ្នកប្រើប្រាស់ជាច្រើន។ អ្នកខ្លះយល់ថា ថង់នេះមើលទៅក្នុងរូបភាពមិនល្អសោះ, រីឯអ្នកខ្លះទៀតគិតថាវាគួរឱ្យអស់សំណើច ខណៈមនុស្សភាគច្រើនយល់ស្របថា វាជាយុទ្ធសាស្ត្រទីផ្សារដ៏អស្ចារ្យ។
ថ្វីត្បិតតែរូបភាពថង់នេះ ទើបតែល្បីពេញបណ្តាញសង្គម កាលពីប៉ុន្មានថ្ងៃមុនក៏ដោយ ប៉ុន្តែប្រភពសារព័ត៌មានថៃ បានរាយការណ៍ថា Cha Deen ទទួលបានអតិថិជនមកទិញ ឃើញថាមានការហក់ឡើងយ៉ាងខ្លាំង៕ រក្សាសិទ្ធិដោយ៖ លឹម ហុង
