ភ្នំពេញ ៖ នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បើកវគ្គបណ្តុះបណ្តាលបំប៉នបន្ថែមលើដំណើរការ នៃការគ្រប់គ្រងប្រព័ន្ឋពិន័យអំពើល្មើសច្បាប់ ស្តីពីចរាចរណ៍ផ្លូវគោកនិងការដកពិន្ទុបណ្ណបើកបរ បង្កើនសមត្ថភាពមន្ត្រីនគរបាលចរាចរណ៍ទៅលើការប្រើប្រាស់បច្ចេកវិទ្យាថ្មី លើការគ្រប់គ្រងទិន្នន័យ ពិន័យអំពើល្មើសច្បាប់ស្តីពីចរាចរណ៍ផ្លូវគោក និងនីតិវិធីប្រតិបត្តិការប្រព័ន្ធ និងការប្រើប្រាស់ឧបករណ៍ពិន័យអំពើល្មើសច្បាប់ចរាចរណ៍ផ្លូវគោក នាថ្ងៃព្រហស្បតិ៍ទី០២ ខែមិថុនា ឆ្នាំ២០២២ នៅអគ្គស្នងការដ្ឋាននគរបាលជាតិ។
លោកឧត្តមសេនីយ៍ទោ ឡុង ធូ អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានមានប្រសាសន៍ផ្តាំផ្ញើដល់សិក្ខាកាមទាំងអស់ សូមយកចំណេះជំនាញទៅប្រើប្រាស់ឲ្យចំគោលដៅ និងដោយស្មោះត្រង់ ជាពិសេសសូមយកចំណេះជំនាញនេះ ទៅបង្ហាត់បង្រៀនបន្តដល់ មន្ត្រីនាយកដ្ឋាន ឬមន្ត្រីស្នងការដ្ឋាននគរបាលរាជធានី-ខេត្តសាមី។
លោកឧត្តមសេនីយ៍ទោ ឡុង ធូ បានបន្តថា គោលបំណង នៃវគ្គសិក្សានេះ មាន៣ចំណុចសំខាន់ ៖ ទី១-បង្កើនសមត្ថភាពមន្ត្រីនគរបាលចរាចរណ៍ទៅលើការប្រើប្រាស់បច្ចេកវិទ្យាថ្មី លើការគ្រប់គ្រងទិន្នន័យ ពិន័យអំពើល្មើសច្បាប់ស្តីពីចរាចរណ៍ផ្លូវគោក, ទី២-បង្ហាញនូវនីតិវិធីប្រតិបត្តិការប្រព័ន្ធ និងការប្រើប្រាស់ឧបករណ៍ពិន័យអំពើល្មើសច្បាប់ចរាចរណ៍ផ្លូវគោក និងទី៣-វិធីគ្រប់គ្រងព័ត៌មាន និងការរក្សាទុកទិន្នន័យនៃការពិន័យ។
សូមជម្រាបថា វគ្គបណ្តុះបណ្តាល ស្តីពី ប្រព័ន្ធគ្រប់គ្រងពិន័យអំពើល្មើសច្បាប់ ស្តីពី ចរាចរណ៍ផ្លូវគោក និងការដកពិន្ទុបណ្ណបើកបរ នេះមានរយៈពេល១ថ្ងៃ ដោយមានការចូលរួមពីមន្រី្តជំនាញមកពី នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ស្នងការដ្ឋាននគរបាលខេត្តកណ្តាល និងស្នងការដ្ឋាននគរបាលរាជធានីភ្នំពេញ សរុបចំនួន៦០នាក់៕ រក្សាសិទ្ធិដោយ៖ សុទ្ធ លី