សេអ៊ូល៖ ប្រទេសកូរ៉េខាងជើងបានបាញ់មីស៊ីលផ្លោងរយៈចម្ងាយខ្លីចំនួន ៨ គ្រាប់ ឆ្ពោះទៅកាន់សមុទ្រ នៅឆ្នេរសមុទ្រភាគខាងកើតរបស់ខ្លួនកាលពីថ្ងៃម្សិលមិញ មួយថ្ងៃបន្ទាប់ពីកូរ៉េខាងត្បូង និងសហរដ្ឋអាមេរិកបានបញ្ចប់សមយុទ្ធយោធារួមគ្នា លើកដំបូងរបស់ពួកគេ ដែលមាននាវាផ្ទុកយន្តហោះអាមេរិកច្រើន ជាងបួនឆ្នាំមកនេះ។ អគ្គសេនាធិការចម្រុះរបស់កូរ៉េខាងត្បូងបាននិយាយថា មីស៊ីលទាំងនោះត្រូវបានបាញ់ចេញពីតំបន់ Sunan នៃរដ្ឋធានីព្យុងយ៉ាងរបស់កូរ៉េខាងជើង។
ទីភ្នាក់ងារព័ត៌មានក្យូដូរបស់ជប៉ុនដែលដកស្រង់សម្តីពីប្រភពរដ្ឋាភិបាល បាននិយាយដែរថាកូរ៉េខាងជើងបានបាញ់មីស៊ីលជាច្រើនគ្រាប់។ ការបាញ់បង្ហោះនេះក៏បានធ្វើឡើងបន្ទាប់ពីដំណើរទស្សនកិច្ចទៅកាន់ទីក្រុងសេអ៊ូលដើម្បីជជែកអំពីកិច្ចការរបស់កូរ៉េ ពីតំណាងពិសេសរបស់សហរដ្ឋអាមេរិកលោក Sung Kim ហើយលោកគីំ បានចាកចេញកាលពីថ្ងៃសៅរ៍។
លោកបានជួបសមភាគីកូរ៉េខាងត្បូង និងជប៉ុន គឺលោក Kim Gunn និង Funakoshi Takehiro កាលពីថ្ងៃសុក្រ ដើម្បីត្រៀមខ្លួនសម្រាប់ “គ្រប់កាលៈទេសៈ” ចំពេលមានសញ្ញាថាកូរ៉េខាងជើងកំពុងរៀបចំធ្វើតេស្តនុយក្លេអ៊ែរជាលើកដំបូងចាប់តាំងពីឆ្នាំ 2017 ។ លោក គីម បាននិយាយក្នុងអំឡុងដំណើរទស្សនកិច្ចនេះ ដែលបានបញ្ចប់កាលពីថ្ងៃអាទិត្យ ដោយកត់សម្គាល់ថា លោកមានឆន្ទៈក្នុងការពិភាក្សាអំពីចំណុចដែលចាប់អារម្មណ៍ចំពោះទីក្រុងព្យុងយ៉ាង ដូចជាការបន្ធូរបន្ថយទណ្ឌកម្មជាដើម។
កាលពីសប្តាហ៍មុន សហរដ្ឋអាមេរិកបានអំពាវនាវឱ្យមានការដាក់ទណ្ឌកម្មបន្ថែមទៀតរបស់អង្គការសហប្រជាជាតិលើកូរ៉េខាងជើង ជុំវិញការបាញ់មីស៊ីលផ្លោងរបស់ខ្លួន ប៉ុន្តែប្រទេសចិន និងរុស្ស៊ីបានវេតូការលើកឡើងនេះ។ ប្រធានាធិបតីកូរ៉េខាងត្បូង Yoon Suk-yeol ដែលចូលកាន់តំណែងកាលពីថ្ងៃទី១០ ខែឧសភា បានយល់ព្រមជាមួយលោកប្រធានាធបតីអាមេរិក ដើម្បីបង្កើនសមយុទ្ធយោធាទ្វេភាគី ដើម្បីរារាំងកូរ៉េខាងជើង។
ប្រទេសកូរ៉េខាងជើងបានរិះគន់សមយុទ្ធរួមគ្នាពីមុនថាជាឧបករណ៍នៃការបន្ត “គោលនយោបាយអរិភាព” របស់ទីក្រុងវ៉ាស៊ីនតោន ឆ្ពោះទៅកាន់ទីក្រុងព្យុងយ៉ាង ទោះបីជាមានការពិភាក្សាអំពីការទូតក៏ដោយ៕ ប្រភព៖រ៉យទ័រ
