ក្នុងកិច្ចខិតខំប្រឹងប្រែងដ៏នឿយហត់ ដើម្បីធ្វើឲ្យមិត្តស្រីជឿជាក់ ហើយនាងនឹងរៀបការជាមួយខ្លួន បុរសម្នាក់បានកំពុងនាំយកមិត្តស្រីជាទីស្រលាញ់របស់គាត់ ទៅកាន់កន្លែងផ្សេងៗនៅទូទាំងប្រទេសចិន តាមរយៈសកម្មភាពអូសឆៃកែវ ហើយឲ្យនាងជិះពីលើ ។
មិត្តប្រុសដែលមានការប្តេជ្ញាចិត្តមានឈ្មោះ Wang បានធ្វើដំណើរដ៏មានមហិច្ឆតា ដើម្បីឲ្យមិត្តស្រីរបស់គាត់ អាចទៅទស្សនាឆ្នេរសមុទ្រ និងទីកន្លែងដទៃទៀត នៅទូទាំងប្រទេស ។
Wang បានចាប់ផ្តើមអូសឆៃកែវ ដោយឲ្យមិត្តស្រីជិះលើ បានរយៈពេល១ខែមកហើយ ដោយនាំយកនាងទៅកាន់គោលដៅលើកដំបូងរបស់ពួកគេ នៅឯសមុទ្រមួយនៅក្នុង Weihei ខេត្ត Shandong ភាគខាងកើតចិន ។
ក្នុងរយៈពេលជាង ៤០ ថ្ងៃ និងប្រហែលចម្ងាយដី ១ពាន់គីឡូម៉ែត្រ គូស្នេហ៍នេះបានទៅដល់ Zhengzhou ក្នុងខេត្តភាគកណ្តាល Henan នៅថ្ងៃសុក្រ, នេះបើសេចក្តីរាយការណ៍ពី South China Morning Post ។
Wang ត្រូវបានដកស្រង់សម្តីដោយនិយាយថា៖ «មិត្តស្រីរបស់ខ្ញុំតែងតែចង់ឃើញសមុទ្រ ។ អស់រយៈពេលជាច្រើនឆ្នាំមកហើយ ខ្ញុំបានសន្យាថា ខ្ញុំនឹងអូសនាងដោយឆៃកែវ ដើម្បីទៅទស្សនាមាត់សមុទ្រ, ដូច្នេះឥលូវនេះ ខ្ញុំកំពុងគោរពតាមពាក្យសន្យារបស់ខ្ញុំហើយ» ។
មិត្តស្រីរបស់ Wang ដែលពុំត្រូវបានបញ្ជាក់ឈ្មោះ បានឲ្យសារព័ត៌មានក្នុងស្រុកដឹងថា នាងបានសន្យានឹងរៀបការជាមួយ Wang ប្រសិនជាគាត់អាចគ្រប់គ្រងអូសនាងនៅតាមដងផ្លូវទាំងអស់នៅទីនោះ ។
ដើម្បីបំពេញតាមបំណងចង់បានរបស់មិត្តស្រីខ្លួន បុរសរូបនេះត្រូវអូសឆៃកែវក្នុងចម្ងាយផ្លូវជាង ២ពាន់គីឡូម៉ែត្រ ។
យោងតាមមិត្តស្រីនោះៗ នាងតែងដើរតាម Wang ហើយគ្រាន់តែអង្គុយនៅលើឆៃកែវ នៅពេលនាងអស់កម្លាំង ។ ហើយនាងក៏បានប្តូរវេនគ្នាអូសដែរ នៅពេលដែលគាត់នឿយហត់ ។
គូស្វាមីភរិយានេះបាននិយាយថា ខណៈដែលការធ្វើដំណើរមានការលំបាកច្រើន នោះបទពិសោធន៍បានក្លាយជាការរីករាយមួយ ជាពិសេសបានមើលទេសភាពដ៏ស្រស់ស្អាតនៅតាមដងផ្លូវ ។
ក្នុងអំឡុងថ្ងៃមានភ្លៀងធ្លាក់ ពួកគេត្រូវសម្រាកនៅក្នុងសណ្ឋាគារ និងបន្តដំណើររបស់ពួកគេទៅមុខទៀត នៅពេលដែលអាកាសអំណោយផល ។ ក្រៅពីម្ហូបក្រៀមដែលពួកគេដាក់តាមខ្លួន នោះពួកគេក៏ទិញម្ហូបអាហារលក់របស់អ្នកស្រុក នៅតាមទីកន្លែងឈប់ជាច្រើន ៕ ចន្ទី