កាលពីថ្ងៃទី៥ ខែមិថុនា ឆ្នាំ ២០២២ គេហទំព័រ China Press បានរាយការណ៍ថា ភ្ញៀវចូលរួមពិធីមង្គលការមួយនៅទីក្រុង Baoji ខេត្ត Shaanxi ប្រទេសចិន ពិតជាមានការភ្ញាក់ផ្អើល និងស្រឡាំងកាំង នៅពេលដែលគេដឹងថា កូនក្រមុំពីរនាក់ ក្នុងចំណោមពួកគេ ម្នាក់ខឹងសម្បារយ៉ាងខ្លាំង បានវាយបំបែករបស់របរ តុ កៅអី ធ្វើឲ្យកម្មពិធីមង្គលការបង្កភាពរញ៉េរញ៉ៃ ច្របល់តែម្តង។
តែទោះយ៉ាងណា ការពិតគឺនារីដែលទទួលខុសត្រូវចំពោះឧប្បត្តិហេតុនេះ មិនមែនជាកូនក្រមុំពិតប្រាកដនោះទេ ដោយនារីនោះគឺជាអតីតមិត្តស្រីរបស់កូនកំលោះ ដែលបានចូលរួមក្នុងពិធីមង្គលការ ប៉ុន្តែ មិនមកអបអរសាទរទេ បែរជាមករំខានដល់ពិធីមង្គលការ ដោយនាងបានស្រែកខ្លាំងៗថា “បើខ្ញុំមកថ្ងៃនេះហើយ ពិធីមង្គលការនេះគឺប្រាកដជាមិនចប់ទេ»។
តាមសេចក្តីរាយការណ៍បានឲ្យដឹងថា កូនកំលោះ និងអតីតមិត្តស្រីរូបនេះ បានលួចលាក់ទាក់ទងគ្នាជាច្រើនឆ្នាំមកហើយ រហូតជិតរៀបការ ប៉ុន្តែ សមាជិកគ្រួសារភាគីទាំងសងខាងមិនឯកភាពគ្នារឿងថ្លៃបណ្ណាការ ដូច្នេះហើយនៅទីបំផុតអ្នកទាំង២ ក៏ត្រូវបែកគ្នា។ ហើយមួយរយៈក្រោយមក ឪពុកម្ដាយរបស់ខាងប្រុស (កូនកំលោះ) ក៏បានណាត់ជួបកូនប្រុសជាច្រើនដង រហូតដល់រៀបការជាមួយអ្នកថ្មីយ៉ាងលឿន។
ពេលនារីជាអតីតសង្សារដឹងដំណឹងនេះភ្លាម ធ្វើឲ្យរូបនាងខឹងសម្បារយ៉ាងខ្លាំង ទើបនាងមិនអនុញ្ញាតឱ្យពិធីមង្គលការនេះទៅបានយ៉ាងរលូនឡើយ ដោយនាងបានស្លៀកឈុតមង្គលការដើម្បីលួចធ្វើជាកូនក្រមុំពិតប្រាកដ ហើយការខំប្រឹងរបស់នាងហាក់ទទួលបានផ្លែផ្កា គឺធ្វើឲ្យគ្រួសារខាងកូនកំលោះទទួលភាពអាអាម៉ាស់នៅចំពោះមុខភ្ញៀវជាច្រើនយ៉ាងខ្លាំង។
ទោះជាយ៉ាងនេះក្តី សេចក្តីរាយការណ៍មិនបានបង្ហាញឱ្យច្បាស់ថា តើពិធីមង្គលការនេះបញ្ចប់ដោយរបៀបណា ឬយ៉ាងណានោះទេ?៕ រក្សាសិទ្ធិដោយ៖ លឹម ហុង
