ជនបរទេសភាគច្រើនចូលចិត្តហាលថ្ងៃនៅលើឆ្នេរ ជាពិសេសនៅរដូវក្តៅ ប៉ុន្តែ អ្វីដែលមិននឹកស្មាននោះ គឺហេតុការណ៍ដ៏កម្រមួយ បានកើតឡើងនៅលើឆ្នេរមួយក្នុងប្រទេសអេស្ប៉ាញ ដោយសារតែជ្រូកព្រៃមួយក្បាលមិនដឹងចេញមកពីប្រភពណា បានរត់ឆ្លេឆ្លាវាយប្រហារទៅលើស្រ្តីចំណាស់ម្នាក់ឲ្យរងរបួស និងធ្វើឲ្យមនុស្សជាច្រើនមានការភ័យខ្លាចគ្រប់គ្នាតែម្តង។
កាសែត DailyMail បានចុះផ្សាយឲ្យដឹងថា ស្ត្រីអាយុ ៦៧ ឆ្នាំម្នាក់ បានរងរបួស និងត្រូវបានគេបញ្ជូនទៅមន្ទីរពេទ្យ បន្ទាប់ពីត្រូវបានវាយប្រហារដោយជ្រូកព្រៃ ខណៈពេលគាត់កំពុងងូតទឹកកំដៅថ្ងៃ នៅឯឆ្នេរ El Albir ភាគខាងជើងនៃ Benidorm ប្រទេសអេស្ប៉ាញ។
ហេតុការណ៍ដ៏គួរឲ្យភ្ញាក់ផ្អើលនេះ បានកើតឡើងគឺបន្ទាប់ពីសត្វចម្លែកមួយក្បាល បានរត់ចូលឆ្នេរ ទីកន្លែងមនុស្សម្នាកំពុងងូតទឹកហាលថ្ងៃ។ បុគ្គលិកឆ្នេរបានព្យាយាមដេញជ្រូកព្រៃ ដោយបន្លឺសំឡេងរោទិ៍ ខណៈសេវាសង្គ្រោះបន្ទាន់នៅលើឆ្នេរខ្សាច់ បន្ទាប់ពីឧបទ្ទវហេតុនេះកើតឡើង បាននាំស្ត្រីរងគ្រោះដែលត្រូវបានវាយប្រហារដោយជ្រូកព្រៃ ទៅកាន់មន្ទីរពេទ្យក្នុងតំបន់ភ្លាមៗផងដែរ។
ស្ត្រីចំណាស់នោះ គាត់បានរងរបួសជើងដោយមិនមានគ្រោះថ្នាក់ដល់អាយុជីវិតទេ ប៉ុន្តែ ដោយសាររបួសដាច់ជ្រៅពេកគាត់ត្រូវលេបថ្នាំផ្សះ ដើម្បីការពារការឆ្លងមេរោគ។
អ្នកការពារឆ្នេរបានគ្រប់គ្រង ដើម្បីបណ្ដេញសត្វនេះចេញពីតំបន់ឆ្នេរទេសចរណ៍ ភោជនីយដ្ឋាន និងហាងកាហ្វេ ដើម្បីកុំឲ្យវានៅតែអាចបង្កឱ្យមានការវាយប្រហារបន្ថែមទៀត។
ជ្រូកព្រៃនេះ ត្រូវបានគេយកទៅសួនធម្មជាតិ Serra Galada ប៉ុន្តែ គេមិនដឹងថា មូលហេតុអ្វីបានជាវារួចចេញ រត់មកចូលតំបន់ឆ្នេរបែបនេះ៕ រក្សាសិទ្ធិដោយ៖ លឹម ហុង
