ក្មេងប្រុសម្នាក់ ពិតជាសំណាងណាស់ ដែលបានរួចផុតពីគ្រោះរន្ទះបាញ់ដ៏រន្ធត់ នៅពេលដែលរូបគេកំពុងដើរទទូរឆ័ត្រ ខណៈមេឃកំពុងភ្លៀង។ យ៉ាងណាមិញ វីដេអូឃ្លីបនៃហេតុការណ៍នេះ ដែលត្រូវបានកត់ត្រាដោយកាមេរ៉ាសុវត្តិភាពផ្ទះមួយ កាលពីវេលាម៉ោង ៦ និង១០ នាទី ល្ងាចថ្ងៃទី៨ ខែមិថុនា ឆ្នាំ ២០២២ កំពុងរីករាលដាលនៅលើបណ្តាញសង្គម ទាក់ទាញការចាប់អារម្មណ៍យ៉ាងខ្លាំង ពីអ្នកនិយមលេងអ៊ីនធឺណិត។
តាមវីដេអូឃ្លីបបានបង្ហាញ ភ្លៀងកំពុងធ្លាក់នៅខាងក្រៅ ក្មេងប្រុសពាក់អាវកីឡាពណ៌ទឹកក្រូច បានដើរកាន់ឆ័ត្រនៅទីធ្លាសំយ៉ាបផ្ទះ។ ប៉ុន្តែ អ្វីដែលរន្ធត់នោះ គឺរំពេចនោះ ក៏ស្រាប់តែមានសំឡេងផ្ទុះយ៉ាងសន្ធោសន្ធៅ បែកផ្កាភ្លើងចំផ្នែកខាងឆ្វេងក្មេងប្រុសនោះតែម្តង។
ភ្លាមៗនោះ ក្មេងប្រុសរូបនោះ បានទម្លាក់ឆ័ត្រអង្គុយចុះឱនក្បាលនិងខ្ទប់ត្រចៀក ទាំងអារម្មណ៍តក់ស្លុតស្ទើរគាំងបេះដូង។ តែទោះយ៉ាងណា បន្ទាប់ក្រាបចុះ ក្មេងប្រុសនោះក៏ងើបទៅរកឆ័ត្រ រួចប្រញាប់ចូលទៅខាងក្នុងផ្ទះវិញយ៉ាងលឿន។
វីដេអូឃ្លីបនេះ ត្រូវបានចែកចាយតៗគ្នាយ៉ាងរហ័ស នៅលើបណ្តាញសង្គម មនុស្សជាច្រើនគិតថា ក្មេងប្រុសនោះពិតជាសំណាងណាស់ ពេលរន្ទះបាញ់ចំត្រចៀក ដោយមិនរងរបួស។ ជាមួយគ្នានេះដែរ ក៏មានមហាជនជាច្រើនបានចែករំលែកបទពិសោធន៍របស់ខ្លួនថា មិនគួរកាន់ឆ័ត្រឡើយ ជាពិសេស ចុងដែកចង្អុលរបស់វា ពេលទទូរដើរក្រោមភ្លៀង គឺប្រៀបដូចជារន្ទះអុីចឹង ដែលពិតជាគ្រោះថ្នាក់ខ្លាំងណាស់៕ រក្សាសិទ្ធិដោយ៖ លឹម ហុង
