ដោយសារសម្រស់ធម្មជាតិវាលស្រូវដ៏ទាក់ទាញ នៅទីប្រជុំជន Sekinchan ប្រទេសម៉ាឡេស៊ី អ្នកដើរលេងខ្វះការពិចារណាមួយចំនួន បានដើរជាន់បំផ្លាញស្រូវអ្នកភូមិ ព្រោះតែដើម្បីថតរូប ដែលឃើញហើយពិតជាគួរឲ្យហួសចិត្តខ្លាំងតែម្តង។
ថ្មីៗនេះ តាមរយៈទំព័រហ្វេសប៊ុក Inforoadblock បានចែករំលែករូបភាពមនុស្សឈរនៅខាងក្នុងវាលស្រែ ដើម្បីថតរូប ដែលបណ្តាលឱ្យស្រូវត្រូវរលំនៅក្រោមជើងរបស់ពួកគេ ដោយបានភ្ជាប់ Caption សរសេរថា «ទោះបីទីនោះ ជាកន្លែងទាក់ទាញភ្ញៀវទេសចរក៏ដោយ ក៏មិនត្រូវទៅបំផ្លាញស្រូវរបស់អ្នកដទៃបែបនេះឡើយ»។
នៅក្នុងរូបភាពដែលបានបង្ហាញ គេអាចឃើញមនុស្សឈរនៅខាងក្នុងវាលស្រែ តាមរយៈ «ផ្លូវ» ដែលបានបង្កើតឡើង បន្ទាប់ពីពួកគេបានដើរជាន់ និងបំផ្លាញដំណាំស្រូវ។
ក្រោយពីបានឃើញបែបនេះ អ្នកនិយមលេងអុីនធើរណិតបានថ្កោលទោសចំពោះទង្វើនេះ ដោយបានសង្កត់ធ្ងន់ថា «វាលស្រែ និងរុក្ខជាតិ ជាផ្នែកមួយនៃការចិញ្ចឹមជីវិតរបស់មនុស្ស ដូច្នេះហើយ ពួកអ្នកមិនគួរណាត្រូវធ្វើឲ្យខូចខាត ដោយសារការថតរូបនោះឡើយ, សិទ្ធិរបស់ប្រជាជននៅទីនោះ ជាកន្លែងដែលពួកគេបង្កើតរបរចិញ្ចឹមជីវិតតាមរយៈការធ្វើស្រូវ ហើយបើអ្នកមកធ្វើទង្វើបែបនេះ សួរថាតើពួកគេនឹងត្រូវខាតបង់យ៉ាងណា»។
អ្នកលេងម្នាក់បានបញ្ចេញមតិថា៖ «ហេតុអ្វីបានជាអ្នកបំផ្លាញជីវភាពអ្នកដ៏ទៃ? មានផ្លូវ (កំណត់) នៅទីនោះមែនទេ? ប្រសិនបើអ្នកចង់ចូល សូមប្រើផ្លូវទាំងនោះដោយភាពត្រឹមត្រូវ។ ចង់បំផ្លាញជីវភាពអ្នកដ៏ទៃដើម្បីអ្វី? ដោយសារទង្វើស្វាបែបនេះហើយ ទើបអ្នកដទៃមិនត្រូវបានអនុញ្ញាតឱ្យទៅកាន់ទីនោះ»៕ រក្សាសិទ្ធិដោយ៖ លឹម ហុង