ភ្នំពេញ៖ ក្រោមកិច្ចសហការជាមួយសាកលវិទ្យាល័យយ៉ុងណាម នៃសាធារណរដ្ឋកូរ៉េ មជ្ឈមណ្ឌលវប្បធម៌និងភាសា កូរ៉េ បានដាក់ឱ្យដំណើរការជាផ្លូវការ ក្នុងសាកលវិទ្យាល័យវេស្ទើន ដើម្បីឱ្យនិស្សិតកម្ពុជា បានសិក្សាពីភាសា វប្បធម៌ ស្ថានភាពរស់នៅរបស់ប្រជាជនកូរ៉េ មុននឹងចេញទៅបន្តការសិក្សានៅកូរ៉េ។
ឯកឧត្តម តែ ឡូរិន ប្រធានក្រុមប្រឹក្សាភិបាលនៃសាកលវិទ្យាល័យវេស្ទើន បានឱ្យដឹងថា ការបើកសម្ពោធមជ្ឈមណ្ឌលវប្បធម៌ និងភាសាកូរ៉េ ធ្វើឡើងក្នុងគោលបំណងដើម្បីឱ្យនិស្សិត ដែលកំពុងសិក្សានៅសាកលវិទ្យាល័យ វេស្ទើន បានមកសិក្សាអំពីភាសា និងវប្បធម៌កូរ៉រយះពេល២ឆ្នាំ ហើយបានយល់ដឹងពីស្ថានភាពរស់នៅរបស់ប្រជាជនកូរ៉េជាមុនសិន ដើម្បីត្រៀមលក្ខណៈឱ្យបានសមស្រប មុននឹងចេញទៅបន្តការសិក្សានៅសាកលវិទ្យាល័យយ៉ុងណាម ដែលជាសាកលវិទ្យាល័យដ៏ធំជាងគេនៅសាធារណរដ្ឋកូរ៉េ។
លោកបណ្ឌិត គៀង រតនា សាកលវិទ្យាធិការនៃសាកលវិទ្យាល័យវេស្ទើន បានឱ្យដឹងថា សាកលវិទ្យាល័យ បានសហការជាមួយសាកលវិទ្យាល័យយ៉ុងណាមនៃសាធារណរដ្ឋកូរ៉េ អស់រយះពេលជាច្រើនឆ្នាំមកហើយ ដោយបានចុះអនុស្សារណះយោគយល់គ្នា លើកម្មវិធីជាច្រើន ដែលផ្តោតសំខាន់លើការផ្លាស់ប្តូរបញ្ញវ័ន្ត សាស្ត្រាចារ្យ ក៏ដូចជាបុគ្គលិកជំនាញនៃសាកលវិទ្យាល័យទាំង២។ លើសពីនេះ ការផ្លាស់ប្ដូរនិស្សិតចាប់ពីថ្នាក់បរិញ្ញាបត្រ ដល់បរិញ្ញាបត្រជាន់ខ្ពស់ ការផ្លាស់ប្ដូរព័ត៌មាន និងសំភារៈសិក្សា ទៅវិញទៅមក ការផ្លាស់ប្ដូរកម្មវិធីសិក្សា និងរួមគ្នាអភិវឌ្ឍមជ្ឈមណ្ឌលវប្បធម៌ និងភាសាកូរ៉េ នៅសាកលវិទ្យាល័យវេស្ទើន ដែលត្រូវបានសម្ពោធដាក់ឲ្យដំណើរការនាពេលនេះ។
លោកបណ្ឌិត CHoi oe chool សាកលវិទ្យាធិការសាកលវិទ្យាល័យយ៉ុងណាមនៃសាធារណរដ្ឋកូរ៉េ បានមានប្រសាសន៍ថា ការជ្រើសរើសយកសាកលវិទ្យាល័យវេស្ទើន ជាដៃគូសហការដ៏សំខាន់មួយ ដោយសារលោកយល់ស្របលើទស្សនវិស័យអប់រំរបស់សាកលវិទ្យាល័យនេះ ហើយមកដល់ពេលនេះ លោកបានជួយបណ្តុះបណ្តាលដល់សាស្រ្តាចារ្យ និងនិស្សិតកម្ពុជាបាន 45នាក់ ដោយផ្តល់អាហារូបករណ៍សិក្សាទាំងស្រុង និងការចំណាយផ្សេងៗប្រចាំខែ ដែលគិតជាទឹកប្រាក់អស់ប្រមាណ១៥លានដុល្លារ។
គួរបញ្ជាក់ថា បើតាមលោកបណ្ឌិត CHoi oe chool លោកជឿជាក់ថា តាមរយះកិច្ចសហប្រតិបត្តិការរវាងសាកលវិទ្យាល័យវេស្ទើន និងសាកលវិទ្យាល័យយ៉ុងណាម នឹងនាំមកនូវការរីកចំរើន និងវឌ្ឍនភាពនៅកម្ពុជានាពេលខាងមុខនេះ៕
