ភ្នំពេញ ៖ ករណីមនុស្សឃាតដោយអចេតនា ក្នងឈ្លោះដណ្តើមកន្ត្រៃគ្នាពីរនាក់ប្តីប្រពន្ធ បណ្តាលឲ្យកន្ត្រៃមុតចំដើមទ្រូងប្តីហូរឈាមស្លាប់មួយរំពេច នាពាក់កណ្តាលអធ្រាត្រ ថ្ងៃព្រហស្បតិ៍ទី១៧ ខែឧសភា ឆ្នាំ២០១៨ ត្រង់ចំណុចបន្ទប់ជួលលេខ០១ ស្ថិតនៅភូមិខ្វា សង្កាត់ដង្កោ ខណ្ឌដង្កោ ។ ចំណែកស្រីជាប្រពន្ធត្រូវបានសមត្ថកិច្ចឃាត់ខ្លួន មកសាកសួរ។
នគរបាលមូលដ្ឋានសង្កាត់ដង្កោ បានបញ្ជាក់ថា ជនរងគ្រោះឈ្មោះ អៀង ជីវ៉ា ហៅ ពើន ភេទប្រុស អាយុ២៥ឆ្នាំ ជនជាតិខ្មែរ មុខរបរកម្មករធ្វើនំបញ្ចុកស្នាក់នៅបន្ទប់ជួលលេខ០១ ស្ថិតនៅភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ត្រូវជាប្តី។ ចំណែកជនសង្ស័យឈ្មោះ អឿន គឹមអាន ភេទស្រី អាយុ២២ឆ្នាំ ជនជាតិខ្មែរ មុខរបរនៅផ្ទះ ស្នាក់នៅបន្ទប់ជួលលេខ០១ ស្ថិតនៅ ភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ត្រូវជាប្រពន្ធ ។ ក្នុងពេលឃាត់ខ្លួន និងធ្វើកោសល្យវិច័យ សមត្ថកិច្ចបានរកឃើញវត្ថុតាងមាន៖ កូនកន្ត្រៃដងជ័រពណ៌ខៀវមួយ ។
នគរបាលមូលដ្ឋាន បានបញ្ជាក់ពីហេតុការណ៍មានដូចតទៅ ៖ កាលពីព្រហស្បតិ៍ ទី១៧ ខែឧសភា ឆ្នាំ២០១៨ វេលាម៉ោង០០និង៣០នាទី ជនរងគ្រោះត្រូវជាប្តីរបស់ជនសង្ស័យ បានត្រឡប់ពីផឹកស៊ីស្រវឹង មកដល់បន្ទប់ជួល ផ្ទះខាងលើ ពេលនោះជនសង្ស័យជាប្រពន្ធរបស់ជនរងគ្រោះ បានរអ៊ូដាក់ជនរងគ្រោះថា ឪវាឯងកុំផឹកស៊ីច្រើនពេក ដេកឲ្យច្រើនទៅ ខ្លាចឈឺ ព្រោះមានតែឪវាឯងម្នាក់ទេ ជាអ្នករកលុយចិញ្ចឹមគ្រួសារ បើឯងឈឺទៅបានអ្នកណា រកមកចិញ្ចឹមប្រពន្ធកូន ហើយជនរងគ្រោះ ក៏បានបិទភ្លើងចូល ដេកក្នុងមុង ជាមួយជនសង្ស័យ ដោយបានដាក់កូនស្រី អាយុ៣ខែកន្លះ នៅចន្លោះកណ្តាល ។
បន្ទាប់មកជនសង្ស័យ ក៏បាននិយាយពាក្យខាងលើដដែលៗជាមួយជនរងគ្រោះ ធ្វើឲ្យជនរងគ្រោះខឹងក៏បានទាញយកកូនកន្ត្រៃ ដែលដាក់នៅលើក្បាលដំណេករបស់កូនស្រី ខាងលើ កាន់នៅនឹងដៃ ។ ពេលជនសង្ស័យ ឃើញដូចនេះក៏បានស្ទុះទៅចាប់យកកន្ត្រៃពីដៃជនរងគ្រោះមកវិញ ហើយក៏មានការប្រទាញប្រទោងគ្នា ទៅវិញ ទៅមក រួចស្រាប់តែជនរងគ្រោះក៏បានស្រែកហៅជនសង្ស័យថា អាន (អឿន គឹមអាន) ជួយខ្ញុំផង ហើយ ជនសង្ស័យក៏បានស្រែកអោយឈ្មោះ អឿន គឹមអេង ភេទស្រី អាយុ១៩ឆ្នាំ ជនជាតិខ្មែរ (ត្រូវជាប្អូនស្រីបង្កើតរបស់ ជនសង្ស័យ) អោយបើកភ្លើង រួចក៏ឃើញ ឈាមបាញ់ចេញពីក្រោមដោះខាងឆ្វេងរបស់ជនរងគ្រោះយ៉ាងខ្លាំង ។ បន្ទាប់មកជនសង្ស័យក៏បានស្រែកហៅ អ្នកជិតខាង និងទូរស័ព្ទហៅកង់បីដឹកជនរងគ្រោះយកទៅសង្គ្រោះនៅ មន្ទីរពេទ្យរុស្សី ពេលទៅដល់មន្ទីរពេទ្យ គ្រូពេទ្យបានបញ្ជាក់ប្រាប់ថា ជនរងគ្រោះបានដាច់ខ្យល់ស្លាប់បាត់ទៅហើយ តែភ្លាមៗនោះក្រុមគ្រួសារនិង សាច់ញាតិរបស់ជនរងគ្រោះពុំបានរាយការណ៍ជូនសមត្ថកិច្ចភ្លាមទេ ។
លុះដល់វេលាម៉ោង៧ព្រឹក ថ្ងៃខែឆ្នាំដដែល ទើបសមត្ថកិច្ចទទួលព័ត៌មានករណីខាងលើ តាមរយៈ ប្រជាពលរដ្ឋដែលរស់នៅជិតខាង ហើយសមត្ថកិច្ចយើងក៏បានចុះទៅដល់កន្លែងកើតហេតុ ធ្វើការបំភ្លឺសាក្សី ប្រមូលវត្ថុតាង ឃាត់ខ្លួនជនសង្ស័យខាងលើ រួមនិងវត្ថុតាង យកមកធ្វើការសាកសួរនៅប៉ុស្តិ៍នគរបាលរដ្ឋបាល ដង្កោ ។
ក្រោយមកសមត្ថកិច្ចក៏បានរាយការណ៍ទៅការិយាល័យបច្ចេកទេស និងការិយាល័យព្រហ្មទណ្ឌ កំរិតធ្ងន់ នៃស្នងការដ្ឋាននគបាលរាជធានីភ្នំពេញ គ្រូពេទ្យតុលាការ អោយចុះមកសហការ ធ្វើកោសល្យវិច្ច័យលើសពជនរងគ្រោះ ឃើញមានស្នាមមុតចំនួន២កន្លែង ១.មុតក្រោមដោះខាងឆ្វេងមុតធ្លុះចូលទៅខាងក្នុងមួយកន្លែង ២.មុតឆូតត្រង់គន្លាក់ដៃខាងឆ្វេងមួយកន្លែង ក្រោយពីធ្វើកោសល្យវិច័យរួច សមត្ថកិច្ចយើងបានសន្និដ្ឋានថា ជនរងគ្រោះពិតជាបានមុតកន្ត្រៃចំក្រោមដោះខាងឆ្វេងចូលជ្រៅទៅខាងក្នុងបណ្តាលឲ្យស្លាប់ប្រាកដមែន ។ ហើយសមត្ថកិច្ចយើងក៏បានប្រគល់សពជនរងគ្រោះឲ្យទៅឈ្មោះ អៀង ម៉ាន ភេទស្រី អាយុ ៤៤ឆ្នាំ ត្រូវជាម្តាយបង្កើតរបស់ជនរងគ្រោះ យកទៅធ្វើបុណ្យតាមប្រពៃណីនៅឯស្រុកកំណើតខេត្តព្រៃវៃង។ រួចករណីខាងលើនេះម្តាយបង្កើត និងសាច់ញាតិរបស់ជនរងគ្រោះ ពុំមាននរណាម្នាក់ធ្វើការប្តឹងផ្តល់ទេ ។
បច្ចុប្បន្នជនសងសង្ស័យខាងលើកំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌដង្កោរាជធានីភ្នំពេញដើម្បីកសាសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធីច្បាប់៕ ដោយ៖បញ្ញាស័ក្តិ