វីដេអូឃ្លីបនៃកាមេរ៉ាសុវត្ថិភាព នៅហាងមួយក្នុងសង្កាត់ 12 ទីក្រុងហូជីមិញ បានថតសកម្មភាពប្លន់ម៉ូតូឆៅៗ នៅចំពោះមនុស្សជាច្រើន នាវេលាម៉ោង ៨ និង ២១ នាទី យប់ថ្ងៃទី១០ ខែមិថុនា ឆ្នាំ ២០២២ ធ្វើឱ្យសហគមន៍អនឡាញមានការខឹងសម្បារ និងហួសចិត្តជាខ្លាំង។
តាមរយៈឃ្លីបបានបង្ហាញនៅខណៈពេលនោះ បុរស២នាក់ បានបើកម៉ូតូ មកឈប់នៅមុខហាងមួយ ហើយបុរសម្នាក់បានចុះពីម៉ូតូ ដើរសំដៅម៉ូតូ១គ្រឿងចតនៅក្បែរផ្ទាំងប៉ាណូ រួចប្រើឧបករណ៍កាច់.កម៉ូតូ។ ភ្លាមៗនោះ បុរសពាក់អាវយឺតសម្នាក់ បានដើរចេញពីក្នុងហាង ប៉ុន្តែហាក់ពុំចាប់អារម្មណ៍នោះទេ។
តែទោះយ៉ាងណា នៅពេលបុរសនោះដើរត្រឡប់រៀបឡើងម៉ូតូរបស់ខ្លួន ចេញដំណើរ ក៏បានចាប់អារម្មណ៍ ព្រោះចោរកំពុងខំប្រឹងព្យាយាមកាច់កម៉ូតូយ៉ាងខ្លាំង។
ប៉ុន្តែ អ្វីដែលគួរឲ្យហួសចិត្តនោះ គឺនៅពេលឃើញបែបនេះហើយ បែរជាបុរសនោះពុំស្រែកឆោឡោឡើងថា ចោរៗ ឲ្យគ្រប់គ្នានៅជុំវិញបានឮទេ ខណៈមនុស្សស្រី៤នាក់ទៀត បានត្រឹមឈរមើល ដោយទុកឲ្យចោរទាញម៉ូតូជិះចាកចេញយ៉ាងស្រួល។
ក្រោយពីបានឃើញទិដ្ឋភាពវីដេអូ សហគមន៍អនឡាញមានការខឹងសម្បារ ចំពោះសកម្មភាពរបស់ចោរប្លន់ និងហួសចិត្តយ៉ាងខ្លាំង ចំពោះប្រតិកម្មដ៏ទន់ភ្លន់របស់អ្នកដែលមានវត្តមាននៅកន្លែងកើតហេតុនៅពេលនោះ។
មតិមួយចំនួនរបស់អ្នកនិយមលេងអ៊ីនធឺណិត បានលើកឡើងថា៖ «បងប្អូនប្រុសស្រីទាំងនេះមានចិត្តល្អពេកហើយ សុខចិត្តឈរមើលបណ្តោយឲ្យចោរយកម៉ូតូយ៉ាងស្រួល ទើបនាំគ្នាផ្អើលឆោឡោ… ហើយបើចោរនោះមានកាំភ្លើង ទើបគួរឲ្យខ្លាច ពិតជាគួរឲ្យហួសចិត្តណាស់!»៕ រក្សាសិទ្ធិដោយ៖ លឹម ហុង
