ក្រោយពីជួបរឿងអាស្រូវគ្រឿងញៀនរួចមក តារាចមម្រៀងម្ចាស់ពាន The Voice Cambodia រដូវកាលទី១ លោក ប៊ុត សីហា ហាក់ដូចជាជួបនូវពាក្យសម្ដីមើលងាយ ប្រៀបដូចជាព្យុះភ្លៀងជាច្រើនបោកបក់មកលើរូបលោក រហូតដល់លោកប្រកាសលាឈប់ពីសិល្បៈចម្រៀង ដោយច្រៀងតែនៅតាមរោងការតូចៗប៉ុណ្ណោះ ។
ជាមួយគ្នានេះដែរ ក្រោយពីដំណើរចាកចេញរបស់តារាចម្រៀងកំព្រាឪពុករូបនេះ គេឃើញលោកបានចូលរួមនៅក្នុងសកម្មភាពមនុស្សធម៌យ៉ាងសកម្ម រហូតទទួលបានការចាប់អារម្មណ៍ជាថ្មីពីសំណាក់អ្នកលេងបណ្ដាញសង្គមហ្វេសប៊ុក ជាក់ស្ដែងដូចជាកាលពីពេលថ្មីៗនេះ គេបានឃើញលោកបង្ហោះរូបថតបង្ហាញពីសកម្មភាពមនុស្សធម៌ជាមួយកុមារតូចៗជាច្រើន ។
គួរបញ្ជាក់ដែរថា លោក ប៊ុត ស៊ីហា ត្រូវបានអង្គការ IKARE ផ្ដល់បទចម្រៀងអប់រំជាច្រើនបទ ឱ្យលោកច្រៀង ខណៈដែលពុំមានផលិតកម្មណាមួយ សូម្បីតែផលិតកម្មរស្មីហង្សមាស មិនអាចផ្ដល់ឱកាសឱ្យលោកបានច្រៀងយកប្រាក់ចិញ្ចឹមគ្រួសារ ប៉ុន្តែទោះជាយ៉ាងណា តារាចម្រៀងវ័យក្មេងរូបនេះ នៅតែតស៊ូដើរច្រៀងតាមរោងការ ដូចកាលពីពេលមិនទាន់បានកាន់ពាន The Voice Cambodia យ៉ាងដូច្នេះដែរ ៕ សាវុធ
