នេះជាខណៈពេលមួយ ដែលឃើញហើយពិតជាហួសចិត្ត អស់សំណើចជាខ្លាំង គ្រាដែលចោរម្នាក់ ពុំត្រឹមតែប្លន់ស្រ្តីម្នាក់មិនបានសម្រេចទេ តែថែមទាំងស្លន់ រត់គេចខ្លួន បណ្តាលឲ្យដួលម៉ូតូឡើងដាបត្រដួសតែម្តង។ ហេតុការណ៍នេះ បានកើតឡើងកាលពីថ្ងៃទី២៩ ឧសភា នៅមុខគ្លីនិកឯកជនមួយកន្លែង នៅកណ្តាលទីក្រុង Teresina ប្រទេសប្រេស៊ីល។
ក្នុងវីដេអូឃ្លីបបានបង្ហាញ នៅមុនពេលកើតហេតុ នារីម្នាក់កាន់ទូរស័ព្ទកំពុងឈរនៅលើផ្លូវឆ្ពោះទៅកាន់គ្លីនិក ស្រាប់តែមានចោរម្នាក់ជិះម៉ូតូមួយគ្រឿង ចូលមកកៀក និងចាប់ទាញទូរស័ព្ទពីដៃរបស់នាង។
តែទោះយ៉ាងណា ប្រហែលចំថ្ងៃស៊យ ចោររូបនេះ ត្រូវបាននារីមាឌធំនោះ ចាប់ដៃជាប់កាច់ផ្តួលទៅនឹងដីភ្លាមៗតែម្តង។ អ្វីដែលគួរឲ្យអស់សំណើចនោះ គឺក្រោយដួលទៅនឹងដី ចោររូបនេះបានងើបឡើងស្រវារើសទូរស័ព្ទនិងកាបូបរបស់ខ្លួន រួចលើកម៉ូតូដួលឡើងច្រងាប់ច្រងិល និងមហាសែនស៊យទៀតនោះ គឺម៉ូតូក៏អត់ឆេះ បណ្តើរម៉ូតូរត់យ៉ាងត្រដាបត្រដួស។ តែទោះជាយ៉ាងណា ចោររូបនេះបានគេចខ្លួនទាំងព្រលឹងចុងសក់ ដោយសុវត្ថិភាព៕ រក្សាសិទ្ធិដោយ៖ លឹម ហុង