Wednesday, January 26, 2022

ប៉ា​ប៉ាញូ​វ​គីណេ ទទួល​យក​អង្ករ​កម្ពុជា​

​​​ភ្នំពេញ​៖ អគ្គនាយកដ្ឋាន​កសិកម្ម បាន​និង​កំពុង​បន្ត​ប្រឹងប្រែង​ចរចា​បើក​ច្រក​ទីផ្សារ ក្នុង​បំណង​រក​ទីផ្សារ អង្ករ​ជូន​កសិករ​កម្ពុជា ដើម្បី​នាំចេញ​ទៅ​កាន់​ផ្សារ​នៃ​ប្រទេស​ប៉ា​ប៉ាញូ​វ​គីណេ ហើយ​បើ​តាម​លោក​អគ្គនាយក​បញ្ជាក់ថា ជា​លទ្ធផល​អង្គប្រជុំរ​វាង​កម្ពុជា​និង​ប៉ា​ប៉ាញូ​វ​គីណេ បានសម្រេច​ឯកភាព​ថា ភាគី​កម្ពុជា​ធានា​ផ្គត់ផ្គង់​អង្ករ​ប្រកបដោយ​គុណភាព និង​សុវត្ថិភាព ចំណែកឯ Papau New Gujnea ឯកភាព​ទទួលយក​អង្ករ​កម្ពុជា ។​

​ការស្វែងរក​ទីផ្សារ​អង្ករ​ថ្មី​នេះ ត្រូវ​បាន​បង្ហាញឡើង ក្នុង​ជំនួប​រវាង​លោក​បណ្ឌិត ហ៊ាន វណ្ណ​ហន ប្រតិភូ​រាជរដ្ឋាភិបាល​ទទួលបន្ទុក​ជា អគ្គនាយក​នៃ​អគ្គនាយកដ្ឋាន​កសិកម្ម ជាមួយ​ប្រតិភូ​ក្រុមហ៊ុន Amru Rice និង ក្រុមហ៊ុន Sun Rice រួម​ជាមួយ​ថ្នាក់ដឹកនាំ​ថ្នាក់​នាំ NAQIA (National Agricultural Quarantine and Inspection Agency) នៃ​ប្រទេស Papau New Gujnea នៅ​ព្រឹក​ថ្ងៃទី​១៨ ខែ​ឧសភា ឆ្នាំ​២០១៨​នេះ ដើម្បី​ពិភាក្សា​សម្របសម្រួល​ការនាំចេញ​អង្ករ​កម្ពុជា​ទៅ​ប្រទេស Papua New Guinea​។ នេះ​បើ​តាម​ការផ្សាយ​លើ​ផេក​ហ្វេស​ប៊ុក​ផ្លូវការ របស់​លោក​បណ្ឌិត ហ៊ាន វណ្ណ​ហន​។​

​លោក​បណ្ឌិត ហ៊ាន វណ្ណ​ហន ប្រតិភូ​រាជរដ្ឋាភិបាល​ទទួលបន្ទុក​ជា​អគ្គនាយក​នៃ​អគ្គនាយកដ្ឋាន​កសិកម្ម បានបញ្ជាក់​ថា កិច្ចពិភាក្សា​ផ្ដោតលើ គុណភាព​អង្ករ​កម្ពុជា បរិមាណ​ស្រូវ​និង​ស្ថានភាព​នាំចេញ​អង្ករ​កម្ពុជា លក្ខខណ្ឌ​តម្រូវ​នៃ​ការងារ​អនាម័យ និង​ភូតគាម​អនាម័យ​លើ​ការងារ​នាំចេញ​នាំចូល​ផលិតផល​កសិកម្ម ដែល​ជា​លទ្ធផល នៃ​ការ​វាយ​តំលៃ​ហានិភ័យ​នៃ​ការចម្លង​សមាសភាព​ចង្រៃ និង​ស្ថានភាព​ស្ដីពី​សមាសភាព​ចង្រៃ​និង​ការគ្រប់គ្រង​លើ​ដំណាំ​ស្រូវ​និង​ឃ្លាំង​ស្តុក​។​

​លោក​បាន​បន្តថា ជា​លទ្ធផល​អង្គប្រជុំ​បាន​សម្រេច​ឯកភាព​ជា​គោលការណ៍​ពីរ​ចំណុច រួមមាន ភាគី​កម្ពុជា​ធានា​ផ្គត់ផ្គង់​អង្ករ ប្រកបដោយ​គុណភាព​និង​សុវត្ថិភាព និង Papau New Gujnea ឯកភាព​ទទួលយក​អង្ករ​កម្ពុជា បន្ទាប់​ពី​បញ្ចប់​ការវាយតម្លៃ​ហានិភ័យ​ដោយ NAQIA និង បាន​ផ្លាស់ប្ដូរ​ព័ត៌មាន ទាក់ទង​នីតិវិធី​នាំចេញ នាំចូល​ស្រប​ទៅ​តាម​លក្ខខណ្ឌ​តម្រូវ​ប្រទេស​ទាំង​ពីរ​៕ ដោយ​៖​បញ្ញា​ស័ក្តិ​