អ្នកបើករថយន្តតូច១គ្រឿង ពុំត្រឹមតែមិនដឹងពីកំហុសរបស់ខ្លួនទេ តែថែមទាំងបើករត់គេច ដោយ «ដឹក» នាំយកទាំងប៉ូលីស ពោបលើក្បាលរថយន្ត គួរឲ្យភ្ញាក់ផ្អើល។ ហេតុការណ៍នេះបានកើតឡើងកាលពីថ្ងៃទី១៩ ខែមិថុនា នៅផ្លូវ Pal Link Road, Suryanagri ក្នុងទីក្រុង Jodhpur រដ្ឋ Gujarat ប្រទេសឥណ្ឌា។
ក្នុងឃ្លីបបានបង្ហាញ ប៉ូលិសម្នាក់ត្រូវបាន «ដឹក» លើគម្របរថយន្ត ធ្វើឲ្យគ្រប់គ្នារន្ធត់ជំនួសជាខ្លាំង ដែលគាត់អាចធ្វើទៅរួច ក្នុងការទប់ ខណៈរថយន្តនៅតែបន្តចលនាទៅមុខលឿនគួរសម។ តែទោះជាយ៉ាងណា សំណាងហើយ ដែលបានប្រជាពលរដ្ឋម្នាក់ប្រទះឃើញ ហើយបានប្រើម៉ូតូពាំងមុខរថយន្តដើម្បីសង្គ្រោះប៉ូលីសរាចរណ៍នោះ។
លោក Jaikishan Soni ប៉ូលិសប៉ុស្តិ៍ Devnagar បាននិយាយថា “ប៉ូលីសចរាចរណ៍ម្នាក់នោះ ខណៈកំពុងបំពេញកាតព្វកិច្ច នៅពេលនោះរថយន្តតូចពណ៌ស១គ្រឿង បានបើកឆ្លងកាត់ ហើយគាត់ក៏បានផ្តល់សញ្ញាឱ្យរថយន្តឈប់ ហើយចង្អុលទៅមនុស្ស។ តែទោះយ៉ាងណា អ្នកបើកបរបានប្រកែកថា គាត់បានពាក់ខ្សែក្រវ៉ាត់សុវត្ថិភាពត្រឹមត្រូវ។ បន្ទាប់ពីឈ្លោះគ្នា អ្នកបើកបរបានសម្រេចចិត្តបន្ថែមល្បឿនរត់គេច ទោះបីប៉ូលីសចរាចរណ៍រូបនោះ ឈរនៅពីមុខរថយន្តក៏ដោយ”។
លោក Soni បន្ថែមថា ភ្លាមៗនោះ មន្រ្តីប៉ូលីសរូបនោះបានស្ទុះឡើងពោបលើក្បាលរថយន្ត ហើយក៏ត្រូវបានអ្នកបើកបរល្មើសច្បាប់ «ដឹក» នាំយកទៅជាមួយតែម្តង។ តែទោះជាយ៉ាងណា រថយន្តនោះត្រូវបានបញ្ឈប់ដោយពលរដ្ឋម្នាក់ បន្ទាប់ពីបើករត់បានចម្ងាយដីជាង ១ គីឡូម៉ែត្រ ហើយអ្នកបើកបរនោះក៏ត្រូវបានឃាត់ខ្លួនផងដែរ៕ រក្សាសិទ្ធិដោយ៖ លឹម ហុង
