ស្ត្រីវៀតណាមម្នាក់ បានធ្វើដំណើរចូលទៅក្នុងប្រទេសថៃ យ៉ាងពិសេស ដើម្បីក្លាយជាចោរ «បុកហោប៉ៅ» ដែលបានធ្វើសកម្មភាពបែបនេះជាច្រើនលើក ហើយក៏មិនដែលត្រូវបានចាប់ខ្លួនពីមុនមកទេ។ តែលើកនេះ ប៉ូលិសចាប់បាន បន្ទាប់ពីវីដេអូកាមេរ៉ាសុវត្ថិភាពចាប់បានស្តែងៗ ពីសកម្មភាពចោរស្រីដៃរហ័សរូបនេះ។
នេះជាទង្វើដ៏ខ្វះសីលធម៌ និងគ្មានតម្លៃជាមនុស្សសោះឡើយ ដែលស្រ្តីរូបនេះ បានចូលប្រទេសផ្សេង ព្រោះតែដើម្បីលុយលួចពីអ្នកដទៃ។ ប៉ូលីសប៉ុស្តិ៍ Jakwat បានចាប់ខ្លួន Tran Ti Ung អាយុ ៦២ ឆ្នាំ មកពីប្រទេសវៀតណាម កាលពីថ្ងៃទី២៤ ខែមិថុនា ឆ្នាំ២០២២។
Tran បានធ្វើដំណើរចូលទៅក្នុងប្រទេសថៃ សម្រាប់គោលដៅរកប្រាក់តាមរយៈវិធីតែមួយគត់គឺ «បុកហោប៉ៅ» នៅកន្លែងប្រជុំជន។ ស្រ្តីចំណាស់រូបនេះ ត្រូវធ្វើដំណើរទៅកាន់ផ្សារ Sampeng ហើយស្វែងរកជនរងគ្រោះដែលមិនចាប់អារម្មណ៍។ ផ្សារ Sampeng ជាផ្សារមួយក្នុងទីក្រុងបាងកក ដែលគេស្គាល់ថាជាផ្សារលក់ដុំ ដែលជាធម្មតាមានភាពមមាញឹកពេញមួយថ្ងៃ។
ប៉ូលីសនិយាយថា ជនសង្ស័យ Tran បានបុកហោប៉ៅលួចទូរស័ព្ទពីប្រជាពលរដ្ឋថៃម្នាក់នៅផ្សារខាងលើ។ បន្ទាប់មក ស្រ្តីចោរជើងចាស់នេះ បានជិះឡានក្រុងទៅផ្លូវបំបែក Klong Tan ។ ជនរងគ្រោះបានទៅដាក់ពាក្យបណ្តឹងនៅប៉ូលិស ហើយការស៊ើបអង្កេតក៏ចាប់ផ្តើមឈានដល់ការចាប់ខ្លួនតែម្តង។
Tran បានសារភាពទៅកាន់ប៉ូលីសថា គាត់បានធ្វើបែបនេះរាប់មិនអស់នៅទីតាំងផ្សេងៗគ្នា និងក៏បានប្រាប់ថា ជាមួយ «ជំនាញដៃរហ័ស» នេះ គាត់មិនដែលត្រូវបានចាប់ខ្លួនម្តងណាពីមុនមកទេ។ ស្រ្តីរូបនេះបានបន្តថា ដោយសារមិនមានការងារពិតប្រាកដដូច្នេះ ក៏បានសម្រេចចិត្តធ្វើដំណើរចូលទៅក្នុងប្រទេសថៃ ជាពិសេសដើម្បីលួចរបស់ទ្រព្យពីជនជាតិថៃ នៅតាមទីសាធារណៈ។
បច្ចុប្បន្ន ស្ត្រីរូបនេះ កំពុងរង់ការកាត់ទោសពីបទល្មើសរបស់ខ្លួន។ តែទន្ទឹមនឹងទង្វើដ៏គួរឲ្យស្អប់នេះផងដែរ គេសង្ឃឹមថា រឿងនេះជាការដាស់តឿនដល់ភ្ញៀវទេសចរដែលធ្វើដំណើរមកពីប្រទេសផ្សេងៗដោយចេតនាអាក្រក់ ដើម្បីលួចពីអ្នកដទៃ មិនថាអ្នកនៅទីណាទេ គឺមិនល្អនោះទេ៕ រក្សាសិទ្ធិដោយ៖ លឹម ហុង
