ភ្នំពេញ៖ យុវជនម្នាក់ស្លាប់ភ្លាមៗក្នុងករណីគ្រោះថ្នាក់ចរាចរណ៍មួយកើតឡើង រវាងរថយន្តដឹកដីធុនធំមួយគ្រឿងបើកបុកម៉ូតមួយគ្រឿងដែលបើកបរដោយយុវជនម្នាក់រួចកិនអូសជាប់ខាងក្រោមកង់រថយន្តផ្នែកខាងមុខគួរឱ្យរន្ធត់ កាលពីល្ងាច ថ្ងៃទី៣ ខែវិច្ឆិកា ឆ្នាំ២០១៧ ស្ថិតនៅចំណុច ផ្លូវបេតុង ខាងជើងភូមិព្រែកកំរៀង សង្កាត់ព្រៃវែង ខណ្ឌដង្កោ ។
សមត្ថកិច្ចបានឲ្យដឹងថា៖ ជនរងគ្រោះដែលស្លាប់ខាងលើនេះឈ្មោះ ខន រ៉ាយុទ្ធ អាយុ២៤ឆ្នាំ មុខរបរជាសិស្ស ស្នាក់នៅភូមិស្រែក្នុង សង្កាត់កន្ទោក ខណ្ឌពោធិ៍សែនជ័យ។
អ្នកនៅកន្លែងកើតហេតុបានឲ្យដឹងថា៖ មុនពេលកើតហេតុ គេបានឃើញជនរងគ្រោះជិះម៉ូតូម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ ភ្នំពេញ 1DJ-8498 បើកបរតែម្នាក់ឯង ក្នុងទិសដៅពីជើងត្បូងតាមបណ្តោយផ្លូវបេតុងខាងលើលុះដល់ចំណុចកើតហេតុ ក៏ត្រូវរថយន្តបង្កប្រភេទរថយន្តដឹកដីធុនធំមួយគ្រឿងម៉ាកហ៊ីយ៉ាន់ដាយពណ៌ស ស្លាកលេខ ភ្នំពេញ 3D-3137 ដែលបើកបញ្ច្រាសទិសគ្នានោះបានជ្រុលចង្កូតទៅបុកចំពីមុខម៉ូតូអូសជាច្រើនម៉ែត្រហើយម៉ូតូកល់ជាប់ខាងក្រោមកង់រថយន្តកិនម្ចាស់ខ្ទេចជើងបែកក្បាលស្លាប់នៅខាងក្រោមកង់រថយន្តតែម្តង។តាមព័ត៍មានថា៖ជនរងគ្រោះជិះម៉ូតូទៅលេងពូជាប៉ូលិសនៅព្រៃស។ ក្រោយកើតហេតុអ្នកបើកបររថយន្តបង្ករបានចុះរត់គេចខ្លួនបាត់ទៅហើយបានបន្សល់ទុកតែរថយន្តបង្ករនៅនឹងកន្លែងកើតហេតុតែប៉ុណ្ណោះ៕ ដោយ៖កូឡាប
