រូបភាពនៃពស់ថ្លាន់ដ៏ធំ ព្យួរពីលើរថយន្តពណ៌ស កំពុងធ្វើដំណើរលើផ្លូវហាយវេមួយកន្លែង ស្ថិតនៅភាគខាងត្បូងប្រទេសចិន ដែលត្រូវបានថតបានដោយកាមេរ៉ាមុខរបស់រថយន្តពីក្រោយ កំពុងធ្វើឲ្យអ្នកនិយមលេងអុីនធើរណែតភ្ញាក់ផ្អើល។
វីដេអូនេះត្រូវបានថតនៅលើផ្លូវ Truong Sa – Zhangjiajie Expressway ឆ្លងកាត់ទីក្រុង Yiyang នៃខេត្ត Hunan កាលពីថ្ងៃទី៣ ខែកក្កដា។ នៅក្នុងវីដេអូនោះ ពស់ថ្លាន់ភូមាពណ៌លឿងប្រវែងជាង ៣ ម៉ែត្រ វារចេញពីឡានដែលកំពុងផ្លាស់ទី ហើយបន្ទាប់មកពស់ថ្លាន់បានដេកនៅពីលើដំបូលរថយន្ត។
តែទោះជាយ៉ាងណា នៅពេលរថយន្តធ្វើដំណើរឆ្ងាយ ពស់ថ្លាន់បានបន្តវារទៅខាងក្រោយរថយន្ត ប៉ុន្តែទីបំផុត វាបានធ្លាក់ពីរថយន្តទៅលើផ្លូវ បណ្តាលឲ្យរងរបួស។
បុគ្គលិកគ្រប់គ្រងផ្នែកនៃផ្លូវល្បឿនលឿន Truong Sa – Zhangjiajie ដែលឆ្លងកាត់ទីក្រុង Yiyang បានយកពស់ថ្លាន់ដ៏ធំនេះ ទៅកាន់ស្ថានីយ៍ប្រេងឥន្ធនៈក្បែរនោះ ដើម្បីសង្គ្រោះបឋម មុននឹងប្រគល់វាទៅក្រុមប្រឹក្សាគ្រប់គ្រងសត្វព្រៃ។
គេមិនច្បាស់ថា ម្ចាស់រថយន្តពណ៌សនោះបានដឹងពីវត្តមានពស់ថ្លាន់នេះ ឬយ៉ាងណានោះទេ ។ ឧបទ្ទវហេតុនេះ ក៏កំពុងធ្វើឲ្យអាជ្ញាធរចិន ស៊ើបអង្កេតផងដែរ៕ រក្សាសិទ្ធិដោយ៖ លឹម ហុង
