ទោះបីជារថយន្តបានបែកកង់ខាងមុខ ដល់ថ្នាក់ធ្លាយសំបកចេញក្រៅ ហើយត្រូវបានមនុស្សដេញតាមក៏ដោយ ក៏នារីវ័យក្មេងរូបស្រស់ម្នាក់ នៅតែបើករថយន្តបន្តដំណើរទៅមុខទៀត ក្នុងចេតនាគេចពីការទទួលខុសត្រូវ នៅក្នុងហេតុការណ៍គ្រោះថ្នាក់ចរាចរណ៍បើកបុកម៉ូតូ។
បើតាមសមត្ថកិច្ចវៀតណាម បានឲ្យដឹងថា នៅម៉ោងប្រហែល៥ល្ងាច ថ្ងៃទី១០ ខែកក្កដា នារីវ័យក្មេងម្នាក់ ស្ថិតក្នុងសម្លៀកបំពាក់រ៉ូបក្រហម ស្ត្រីអ្នកបើករថយន្តទំនើប Range Rover ពាក់ស្លាកលេខ 93A-317XX ធ្វើដំណើរលើផ្លូវពីក្រុង Binh Long ទៅកាន់ Tan Hung (ស្រុក Hon Quan ខេត្ត Binh Phuoc)។ លុះមកដល់ចំណុចកើតហេតុភូមិក្វាន់ឡៃអា ឃុំតាន់ឡូយ ក៏បានបុកជាមួយម៉ូតូ១គ្រឿង ដែលជនរងគ្រោះមានឈ្មោះ Dieu Lam អាយុ ៣៣ ឆ្នាំ រស់នៅឃុំ An Khuong ស្រុក Hon Quan)។
គ្រោះថ្នាក់នេះ បានបណ្តាលឱ្យរថយន្ត និងម៉ូតូ រងការខូចខាតទាំងពីរខណៈម្ចាស់ម៉ូតូលោក Dieu Lam រងរបួសស្រាល ។ ក្រោយពេលកើតហេតុ នារីអ្នកបើកបររថយន្តពុំបានឈប់ធ្វើការដោះស្រាយទេ ដោយបានព្យាយាមបើករត់គេចតែម្តង។ ដោយមិនពេញចិត្តចំពោះទង្វើនេះ ប្រជាពលរដ្ឋបានដេញតាម និងប្រើឧបករណ៍រារាំងរថយន្ត។
វីដេអូឃ្លីប ដែលកំពុងត្រូវបានគេចែកចាយលើបណ្ដាញសង្គម បានបង្ហាញមនុស្សជាច្រើន ជិះម៉ូតូដេញតាមពីក្រោយ ដោយកាន់ទូរស័ព្ទថតរូប និងផ្តល់សញ្ញាសុំឱ្យអ្នកបើកបរឈប់។ ក្នុងនោះ អ្នកខ្លះបានប្រើមែកឈើ និងដុំថ្ម ដាក់នៅលើផ្លូវ ដើម្បីរេរាំង ប៉ុន្តែ នារីរូបនេះនៅតែបើករថយន្តបន្តដំណើរ រហូតជួបសមត្ថកិច្ច ទើបឈប់រថយន្ត។
លោក Phan Thanh Trong អាយុ ៣៤ ឆ្នាំ មកពី Binh Phuoc ដែលបានបង្ហោះឃ្លីបបាននិយាយថា គាត់គឺជាមនុស្សម្នាក់ក្នុងចំណោមមនុស្សដែលបានចូលរួមក្នុងការដេញនារីអ្នកបើកបរនោះ នៅរសៀលថ្ងៃទី១០ ខែកក្កដា នៅពេលដែលគាត់ឃើញអ្នកបើកបរ បានចាកចេញពីកន្លែងកើតហេតុបន្ទាប់ពីគ្រោះថ្នាក់។ លោកនិងមនុស្សមួយក្រុមផ្សេងទៀតបានដេញតាមរថយន្តនិងបានប្រើទូរស័ព្ទ ដើម្បីកត់ត្រាហេតុការណ៍។
លោក Thanh Trong ក៏បានឲ្យដឹងថា «ខ្ញុំទៅជាមួយអ្នកផ្សេងខ្លះទៀតដេញបានប្រហែល ១០ គីឡូម៉ែត្រតែអ្នកបើកបរនៅតែមិនព្រមឈប់។ លុះទៅដល់ចំណុចផ្លូវក្បែរផ្សារពាណិជ្ជកម្មក្រុងប៊ិញឡុង បានជួបប៉ូលិសចរាចរណ៍ទើបស្ត្រីនោះព្រមឈប់»។
ទាក់ទិននឹងករណីនេះនេះ ក្រុមប៉ូលីសចរាចរណ៍ Hon Quan (Binh Phuoc) បានប្រាប់កាសែតថា នារីអ្នកបើករថយន្តនៅក្នុងឃ្លីបខាងលើមានឈ្មោះ NTML (អាយុ ២៦ ឆ្នាំ រស់នៅ Hon Quan)។ ក្រោយពេលបុកម៉ូតូហើយ ML បានបើកគេចចាកចេញពីកន្លែងកើតហេតុ ទាំងកង់ខាងមុខរបស់រថយន្តបែកធ្លាយសំបកចេញក្រៅថាស ហើយទោះបីជាមានមនុស្សម្នាដេញតាមឃាត់ឲ្យឈប់ក៏ដោយ។
ក្រោយទទួលបានព័ត៌មានភ្លាម នគរបាលចរាចរណ៍ខេត្តក៏បានរាយការណ៍ទៅកម្លាំងសម្របសម្រួលដើម្បីចាប់ខ្លួនស្ត្រីអ្នកបើកបររថយន្ត។ តាមរយៈការធ្វើតេស្តរកជាតិអាល់កុល សមត្ថកិច្ចបានរកឃើញថា ស្ត្រីរូបនោះមានកំហាប់ជាតិអាល់កុលលើសពី 0.4 មីលីក្រាម ក្នុងមួយលីត្រ នៃខ្យល់ដកដង្ហើម៕ រក្សាសិទ្ធិដោយ៖ លឹម ហុង
