ថ្មីៗនេះ (ថ្ងៃទី១២ ខែកក្កដា ឆ្នាំ ២០២២) គេហទំព័រ ETtoday បានបង្ហាញពីរឿងរ៉ាវដ៏សោកសៅរបស់គូស្នេហ៍មួយគូ មកពីតៃវ៉ាន់ ដោយខាងប្រុសបានសម្រេចចិត្តបែកគ្នាជាមួយនារីជាគូស្នេហ៍ទាំងបង្ខំ ព្រោះតែគាត់ និងគ្រួសារ មិនអាចទទួលយកបាន ចំពោះការទាមទារថ្លៃបណ្ណាការ ពីសំណាក់ឪពុករបស់នាង រហូតជិត ១០ ម៉ឺនដុល្លារ ឯណោះ បន្ទាប់ពីបានដឹងថា គ្រួសាររបស់គាត់មានដីធ្លីច្រើន ដែលធ្វើឲ្យអ្នកលេងអុីនធើរណែត ហួសចិត្តយ៉ាងខ្លាំងតែម្តង។
អ្នកបង្ហោះ បានបង្ហើបឱ្យដឹងថា មិត្តភក្តិរបស់គាត់ទាំងពីរ បានទាក់ទងគ្នាអស់រយៈពេល៥ឆ្នាំមកហើយ ខាងប្រុសអាយុ ៣៣ ឆ្នាំ ខណៈខាងស្រីអាយុ ៣០ ឆ្នាំ។ អ្នកទាំងពីរធ្វើការ និងរកចំណូលបាន ៤៥ ម៉ឺនដុល្លារតៃវ៉ាន់ (ប្រហែល ១៥០០០ ដុល្លារ)។ គូស្នេហ៍មួយគូនេះ បានសម្រេចចិត្តថា ដល់ពេលត្រូវចាប់ផ្តើមបង្កើតគ្រួសារយ៉ាងហ្មត់ចត់។ ដូច្នេះ ពួកគេក៏បានគិតគូរអំពីអាពាហ៍ពិពាហ៍។
ប៉ុន្តែ ដោយសារតែស្ថានភាពដ៏លំបាកពីសម័យកូវីដរាតត្បាត ពួកគេទាំងពីរសម្រេចមិនធ្វើពិធីបុណ្យមង្គលការធំដុំនោះទេ។ ពួកគេបានយល់ស្របថា នឹងមានតែការទិញសម្លៀកបំពាក់អាពាហ៍ពិពាហ៍ និងទៅចុះឈ្មោះអាពាហ៍ពិពាហ៍ ជាការស្រេច ដោយមិនចាំបាច់មានការរៀបការ និងរួមទាំងមិនមានថ្លៃបណ្ណាការអ្វីទាំងអស់។
បន្ទាប់មក គ្រួសាររបស់អ្នកទាំងពីរបានមកជួបគ្នានៅភោជនីយដ្ឋានមួយ។ ឪពុកម្តាយរបស់គូស្នេហ៍នេះ ក៏បានដឹងយ៉ាងច្បាស់នូវអ្វីដែលកូនៗរបស់ពួកគេបានព្រមព្រៀងគ្នា ប៉ុន្តែ ភ្លាមៗនោះ ឪពុករបស់នាង បាននិយាយនៅកណ្តាលតុអាហារដែលលឺហើយស្ទើរធ្លាក់ថ្លើមក្ឌុក ដោយទាមទារថ្លៃបណ្ណាការចំនួន ២.១៦ លានដុល្លារតៃវ៉ាន់ (ស្មើជាង ៧០,០០០ ដុល្លារ) និងរួមទាំងគ្រឿងអលង្ការមួយផ្នែកទៀត។ នៅពេលនោះ បរិយាកាសតុអាហារកំពុងឆ្ងាញ់ ត្រូវបានស្ងាត់ បន្ទាប់ឪពុករបស់ខាងស្រី បានទទូចយ៉ាងម៉ឺងម៉ាត់ថា “បាទ ខ្ញុំត្រូវការប្រាក់នេះ ប្រើសិនបើអ្នកចង់បានកូនស្រីរបស់ខ្ញុំ”។
បន្ទាប់ពីបរិយាកាសរាងធូរស្រាល នារីរូបនោះ បានប្រាប់ទៅមិត្តប្រុសថា រឿងនេះបានប្រែប្រួល គឺដោយសារឪពុករបស់នាង បានដឹងថា ឪពុកម្តាយរបស់គាត់មានដីច្រើន។ ហើយនាងបានប្រាប់ឪពុកអំពីរឿងនេះ គឺដោយសារឪពុកម្តាយរបស់គាត់ មានគម្រោងលក់ដី ដើម្បីយកលុយទិញផ្ទះសម្រាប់ពួកនាងនៅពេលខាងមុខ ប៉ុន្តែ នាងមិននឹកស្មានថា ឪពុករបស់នាង បែរជាទារលុយច្រើនបែបនេះសោះឡើយ។
ដោយសារតែបញ្ហាថ្លៃបណ្ណាការដ៏កប់ពពកនេះ ទីបំផុតបុរសនោះ ក៏បានសម្រេចចិត្តបញ្ចប់ទំនាក់ទំនងជាមួយមិត្តស្រី យ៉ាងសោកសៅ។
ក្រោយពីបានលឺបែបនេះ មហាជនជាច្រើន បានសម្តែងការហួសចិត្តយ៉ាងខ្លាំង។ ក្នុងនោះ មានមតិខ្លះបានរិះគន់ថា៖ «ឪពុករូបនេះ ធ្វើជ្រុលពេកហើយ, សម័យនេះជាសម័យណាហើយ ឬជាការលក់កូនស្រី?»៕ រក្សាសិទ្ធិដោយ៖ លឹម ហុង
