Thursday, March 28, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

ឧនាយករដ្ឋមន្ត្រីហោ ណាំហុង​៖ India-CLMV ជា​ផែនការ​ចង្អុល​ផ្លូវ​យ៉ាង​សំខាន់ សម្រាប់​ការអភិវឌ្ឍ​សេដ្ឋកិច្ច រវាង​ឥណ្ឌា និង​ប្រទេស CLMV

spot_img

​​រាជធានី​ភ្នំពេញ​៖​ថ្ងៃ​ចន្ទ ថ្ងៃទី​២១ ខែ​ឧសភា ឆ្នាំ​២០១៨ ក្រសួង​ពាណិជ្ជកម្ម​កម្ពុ​ជា​ឥណ្ឌា​បាន​ឯកភាព​រួម​គ្នា​ចេញ​សេចក្ដីប្រកាស​ព័ត៌មាន ស្ដី​ពី​វេទិកា​ជំនួប​ពាណិជ្ជកម្ម​លើក​ទី​៥ ឥណ្ឌា កម្ពុជា ឡាវ មី​យ៉ាន់​ម៉ា និង​វៀតណាម ក្រោម​ប្រធានបទ “​កិច្ចសហប្រតិបត្តិការ​សម្រាប់​សមាហរណកម្ម​តំបន់​” ដែល​ប្រព្រឹត្ត​ទៅ​នៅ​ថ្ងៃ​ទី​២១-២២ ខែ​ឧសភា ឆ្នាំ​២០១៨​។​


​ក្រសួង​ពាណិជ្ជកម្ម​នៃ​ព្រះរាជាណាចក្រ​កម្ពុជា និង​ក្រសួង​ពាណិជ្ជកម្ម​នៃ​សាធារណរដ្ឋ​ឥណ្ឌា បាន​សហការ​គ្នា​រៀបចំ​វេទិកា​ជំនួប​ពាណិជ្ជកម្ម​លើ​ក​ទី​៥ ឥណ្ឌា កម្ពុជា ឡាវ មី​យ៉ាន់​ម៉ា និង​វៀតណាម ក្រោម​ប្រធានបទ “​កិច្ចសហប្រតិបត្តិការ​សម្រាប់​សមាហរណកម្ម​តំបន់​” ដែល​ប្រព្រឹត្ត​ទៅ​នៅ​ថ្ងៃ​ទី​២១-២២ ខែ​ឧសភា ឆ្នាំ​២០១៨​។​

​វេទិកា​ជំនួប​ពាណិជ្ជកម្ម​នេះ បាន​ធ្វើឡើង​ក្រោម​អធិបតីភាព​លោក ហោ ណាំហុង ឧបនាយករដ្ឋមន្ត្រី និង​ជា​តំណាង​ដ៏​ខ្ពង់ខ្ពស់​របស់ សម្ដេច​អគ្គមហាសេនាបតី​តេជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា និង​មាន​ចូលរួម​ពី លោក ប៉ាន សូរ​ស័ក្ដិ រដ្ឋមន្ត្រី​ក្រសួង​ពាណិជ្ជកម្ម​កម្ពុជា លោក Suresh Prabhu រដ្ឋមន្ត្រី​ក្រសួង​ពាណិជ្ជកម្ម ឧស្សាហកម្ម និង​អាកាសចរណ៍​ស៊ីវិល​ឥណ្ឌា លោក Than Myint រដ្ឋមន្ត្រី​ក្រសួង​ពាណិជ្ជកម្ម​មី​យ៉ាន់​ម៉ា លោក Cao Quoc Hung អនុ​រដ្ឋមន្ត្រី​ឧស្សាហកម្ម និង​ពាណិជ្ជកម្ម​វៀតណាម លោក Naushad Forbes ប្រធាន​សហព័ន្ធ​ឧស្សាហកម្ម​ឥណ្ឌា និង លោក Chandrajit Banerjee អគ្គនាយក​សហព័ន្ធ ឧស្សាហកម្ម​ឥណ្ឌា​។ ក្រៅពីនេះ វេទិកា​នេះ​ក៏​មាន​ការចូលរួម​ពី​មន្ត្រី និង​ធុរជន​ជាន់​ខ្ពស់​មក​ពី​បណ្ដា​ប្រទេស​ទាំង​ប្រាំ សរុប​ប្រមាណ ៤០០ នាក់​។​

​ថ្លែង​នៅក្នុង​ពិធី​បើក​វេទិកា​នេះ លោក​ឧបនាយករដ្ឋមន្ត្រី បាន​សម្ដែង​នូវ​ការកោតសរសើរ​ចំពោះ​ក្រសួង​ពាណិជ្ជកម្ម និង​ឧស្សាហកម្ម​ឥណ្ឌា និង​សហព័ន្ធ​ឧស្សាហកម្ម​ឥណ្ឌា ដែល​បាន​ផ្ដួចផ្ដើម​គំនិត និង​សហការ​ជាមួយ​ក្រសួង​ពាណិជ្ជកម្ម​កម្ពុជា ឡាវ មី​យ៉ាន់​ម៉ា និង​វៀតណាម ក្នុង​ការរៀបចំ​វេទិកា​ជំនួប​ពាណិជ្ជកម្ម​នេះ​។ “​ខ្ញុំ​យល់​ថា វេទិកា​ធុរកិច្ច India-CLMV នេះ ជា​ផែនការ​ចង្អុល​ផ្លូវ​យ៉ាង​សំខាន់ សម្រាប់​ការអភិវឌ្ឍ​សេដ្ឋកិច្ច រវាង​ឥណ្ឌា និង​ប្រទេស CLMV”​លោក​ថ្លែង​បញ្ជាក់​។ ឯកឧត្តម​ឧបនាយករដ្ឋមន្ត្រី បាន​រំលឹក​ជូន​អង្គពិធី​ថា “​ការអភិវឌ្ឍ​ដ៏​សំខាន់​នៃ​សេដ្ឋកិច្ច​-​សង្គម ដ៏​ធំធេង នៅ​កម្ពុជា​សព្វថ្ងៃ​នេះ ក៏​ដោយសារ​កម្ពុជា បាន​ទទួល​នូវ​សន្តិភាព​ពេញលេញ សន្តិសុខ សង្គម និង​ស្ថេរភាព​នយោបាយ ដែល​សម្ដេច​អគ្គមហាសេនាបតី​តេជោ បាន​ពុះពារ​កសាង​ជូន​ប្រទេស​ជាតិ​”​។ ក្រៅពីនេះទៀត លោក​ឧបនាយករដ្ឋមន្ត្រី ក៏​បាន​អំពាវនាវ​ឲ្យ​ប្រទេស CLMV ប្រឹងប្រែង​សហការ​ជិតស្និទ្ធ​បន្ថែមទៀត​ជាមួយ​ប្រទេស​ឥណ្ឌា ដើម្បី​ចាប់​យក​កាលានុវត្តភាព​ដែលមាន​យកមក​អនុវត្តឲ្យ​អស់ពីសម​ត្ថភាព​សម្រាប់​ការអភិវឌ្ឍ​ប្រកបដោយ​ចីរភាព នៅក្នុង​ប្រទេស​នីមួយៗ និង​នៅក្នុង​តំបន់​។​

​ជាមួយនឹង​សុន្ទរកថា​ដ៏​មាន​តម្លៃ​របស់ លោក​ឧបនាយករដ្ឋមន្ត្រី ដែល​បាន​ថ្លែង​ក្នុង​ពិធី​នោះ លោក ប៉ាន សូរ​ស័ក្ដិ រដ្ឋមន្ត្រី​ក្រសួង​ពាណិជ្ជកម្ម បាន​ជម្រាបជូន​ឲ្យដឹង​បន្ថែម​ទៀត​ថា ការរៀបចំ​ជំនួប​ពាណិជ្ជកម្ម India-CLMV នេះ គឺ​មាន​គោលបំណង​ពង្រឹង​កិច្ចសហប្រតិបត្តិការ​សេដ្ឋកិច្ច​-​ពាណិជ្ជកម្ម ឲ្យ​រឹតតែ​ខ្លាំង​បន្ថែមទៀត ដើម្បី​ជំរុញ​កំណើន និង​ពង្រីក​ការធ្វើ​ពាណិជ្ជកម្ម​រវាង​ប្រទេស​ឥណ្ឌា និង​ប្រទេស​កម្ពុជា ឡាវ មី​យ៉ាន់​ម៉ា និង​វៀតណាម​។ គំនិត​ផ្ដួចផ្ដើម​នេះ ជា​ការចាប់ផ្ដើម ក្រោយពី​បាន​បញ្ចប់​ការចរចា​កិច្ចព្រមព្រៀង​ពាណិជ្ជកម្ម​សេរី​រវាង​ឥណ្ឌា និង​អាស៊ាន​លើ​ទំនិញ​ក្នុង​ឆ្នាំ​២០០៩ និង​លើ​សេវាកម្ម និង​វិនិយោគ ក្នុង​ឆ្នាំ​២០១៤ ហើយ​ជា​លទ្ធផល​នៃ​កិច្ច​ពិភាក្សា​ស៊ី​ជំរៅ តាមរយៈ​វេទិកា​នេះ ឃើញ​ថា​លំហូរ​នៃ​វិនិយោគ​បរទេស​ដោយ​ផ្ទាល់ (FDI) ពី​ឥណ្ឌា​មក​អាស៊ាន បាន​កើនឡើង​ប្រមាណ ៩,៤​ភាគរយ ពី ៩៦០ លាន​ដុល្លារ​អាមេរិក ក្នុង​ឆ្នាំ​២០១៥ មក ១,០៥ ប៊ី​លាន​ដុល្លារ​អាមេរិក ក្នុង​ឆ្នាំ​២០១៦​។ លោក បាន​បន្ត​មាន​ប្រសាសន៍ថា ដោយសារ​ចរន្ត​នៃ​ការផ្លាស់ប្ដូរ​របត់​ពាណិជ្ជ​កម្ម ឥណ្ឌា និង​កម្ពុជា ឡាវ មី​យ៉ាន់​ម៉ា និង​វៀតណាម ត្រូវ​ខិតខំ​ប្រឹងប្រែង​បន្ថែមទៀត​ក្នុងការ​ធ្វើ​សេរីភាវូបនីយកម្ម​សេដ្ឋកិច្ច​របស់​ខ្លួន ធានា​ទប់ស្កាត់​គោលនយោបាយ និង​សកម្មភាព​គាំពារ​និយម ពង្រឹង​ប្រព័ន្ធ​ពាណិជ្ជកម្ម​ពហុភាគី និង​លើកកម្ពស់​អាជីវកម្ម និង​សហគ្រាស​ធុន​តូច និង​មធ្យម វិស័យ​សុខាភិបាល កម្មន្តសាល កសិកម្ម កែច្នៃ​នៃ​ចំណីអាហារ វាយនភ័ណ្ឌ ថាមពល ទេសចរណ៍ និង​ការអប់រំ​បន្ថែមទៀត​។​

​លោក Suresh Prabhu រដ្ឋមន្ត្រី​ពាណិជ្ជកម្ម ឧស្សាហកម្ម និង​អាកាសចរណ៍​ស៊ីវិល​ឥណ្ឌា បាន​លើកឡើង​អំពី​សក្ដានុពល​នៃ​ប្រទេស CLMV ដែល​ជា​គោលដៅ​វិនិយោគ​មួយ​ដ៏​ធំ​របស់​ក្រុមហ៊ុន​ឥណ្ឌា​។ ក្រៅពីនេះ លោក បាន​សង្កត់ធ្ងន់​លើ​ការងារ​មួយចំនួន ដែល​ឥណ្ឌា​អាចរួមចំណែក​ក្នុង​ការជួយ​ជ្រោមជ្រែង ដូច​ជា​ការ ត​ភ្ជាប់​ពាណិជ្ជកម្ម ការធ្វើសមាហរណកម្ម​ទៅក្នុង​ខ្សែសង្វាក់​ផ្គត់ផ្គង់​ក្នុង​តំបន់ និង​លើ​ពិភពលោក ការអភិវឌ្ឍ​វិស័យ ឧស្សាហកម្ម ការកសាង​សមត្ថភាព និង​ជំនាញ ដោយ​ការងារ​ទាំងនោះ​សុទ្ធតែ​ជា​ការងារ​ដែល​ឥណ្ឌា មានបទពិសោធន៍​ស្រាប់​។ លោក Naushad Forbes ប្រធាន​សហព័ន្ធ​ឧស្សាហកម្ម​ឥណ្ឌា បាន​គាំទ្រ​មតិ​របស់ លោក Suresh Prabhu ដោយ​បន្ថែម​ទៀត​ថា ឥណ្ឌា និង​ប្រទេស CLMV អាច​ពង្រឹង​កិច្ចសហប្រតិបត្តិការ​ជាមួយ​គ្នា​បន្ថែមទៀត​លើ​វិស័យ​ទេសចរណ៍ ដោយ​បង្កើតឲ្យមា​ន​ការហោះហើរ​ត្រង់ ផ្លាស់ប្ដូរ​បទពិសោធន៍ និង​ជំនាញ​លើ​វិស័យ​កែច្នៃ​នៃ​ចំណីអាហារ កសិកម្ម​។ លោក​ក៏​បាន​បញ្ជាក់ថា ក្រុមហ៊ុន​ឥណ្ឌា​មាន​សមត្ថភាព​គ្រប់គ្រាន់​ក្នុង​ការជួយ​ជ្រោមជ្រែង​ការងារ​ទាំងនោះ ហើយ​តាមរយៈ​កិច្ចសហការ​ដ៏​ជិតស្និត​នៅពេល​ខាងមុខ លោក​សង្ឃឹមថា​នឹង​មាន​វត្ត​មាន​ក្រុមហ៊ុន​ឥណ្ឌា​ច្រើន​ថែម​ទៀត មក​ធ្វើ​ធុរកិច្ច​នៅ​កម្ពុជា​។​

​ក្នុង​ស្មារតី​យោគយល់​គ្នា​ខ្ពស់ រដ្ឋ​មន្ត្រី​ប្រទេស​មី​យ៉ាន់​ម៉ា និង​អនុរដ្ឋមន្ត្រី​ប្រទេស​វៀតណាម ក៏​បាន​ឯកភាព​លើ​ចំណុច​ដែល​បាន​លើកឡើង​នៅក្នុង​អង្គពិធី​បើក ហើយ​ប្រទេស​ទាំង​ប្រាំ បាន​តាំងចិត្ត​បន្ត​កិច្ចសហប្រតិបត្តិការ​ល្អ​រវាង​គ្នា​និង​គ្នា​បន្ត​ទៀត ដើម្បី​ទទួលយក​នូវ​ផលប្រយោជន៍​រួម​៕ ​ដោយ​៖​បញ្ញា​ស័ក្តិ​

     

spot_img
×