នេះជាវេលាដ៏រន្ធត់ខ្លាំងណាស់ នៅពេលដែលបានឃើញក្មេងៗប្រុសស្រីតូចធំប្រមាណជិត ១០ នាក់ ត្រូវជាប់គាំងនៅក្នុងជំនន់ទឹកភ្លៀង ដោយសារទឹកធ្លាក់មកពីខាងលើកើនឡើងយ៉ាងលឿនភ្លាមៗ មិនអាចរត់ឡើងគោកទាន់ពេលបាន។ ប៉ុន្តែ សំណាងណាស់ ដែលបានដើមឈើរជួយសង្រ្គោះជីវិត ពុំនោះទេ សប្បាយក្លាយជាសោនាដកម្មជាក់ជាមិនខាន។
ហេតុការណ៍រន្ធត់នេះ បានកើតឡើងនៅមណីយដ្ឋានទឹកធ្លាក់ថ្មក្រាល ស្ថិតនៅក្នុងភូមិកោះខ្ទុម្ព ឃុំជៀប ស្រុកទឹកផុស ខេត្តកំពង់ឆ្នាំង នៅថ្ងៃទី១៧ ខែកក្កដា ឆ្នាំ ២០២២។
បើតាមស្រ្តីម្នាក់ ដែលបានថតវីដេអូនៃទិដ្ឋភាពក្រុមសង្គ្រោះជួយរំដោះក្មេងៗទាំងនោះ បានប្រាប់ឲ្យដឹងថា ក្មេងៗទាំងនោះកំពុងលេងទឹក ប៉ុន្តែ ដោយសារ នៅខាងក្រោមកំពុងភ្លៀងតិចៗ ក៏គិតថាមិនអី ឪពុកម្តាយក៏បន្តឲ្យកូនៗលេង និងខ្លះក៏ដេកយោលអង្រឹង ប៉ុន្តែ អ្វីដែលមិននឹកស្មានដល់នោះ គឺស្រាប់តែទឹកហូរបុកមកយ៉ាងសន្ទាប់ និងកើនឡើងខ្លាំងក្លាតែម្តង ដែលជាហេតុធ្វើឲ្យពួកគេមិនអាចមានពេលរត់គេចចេញទាន់។
តែទោះជាយ៉ាងណា ពិតជាសំណាងហើយ ដែលបានដើមឈើ១ដើមការពារ ដោយក្មេងៗទាំងនោះ បានឡើងទៅខាងលើ ម្នាក់ៗភ័យមុខឡើងស្វាយអស់ហើយ។ តែយ៉ាងណា ក៏សូមអរគុណយ៉ាងខ្លាំង ចំពោះក្រុមសង្គ្រោះដែលបានប្រថុយគ្រោះថ្នាក់ខ្លួនឯងពួកគាត់ ឆ្លងកាត់ទឹកកំពុងហូរបុកខ្លាំង ដើម្បីរំដោះក្មេងៗទាំងនោះ មកកាន់លើគោកវិញដោយសុវត្ថិភាព៕ រក្សាសិទ្ធិដោយ៖ លឹម ហុង
