មូសងាប់មួយក្បាលដែលពោរពេញដោយឈាម ដែលត្រូវបានរកឃើញនៅក្នុងផ្ទះល្វែងមួយក្នុងខេត្ត Fujian ប្រទេសចិន ត្រូវបានគេបញ្ជាក់ថា បានជួយដល់អ្នកស៊ើបអង្កេតតាមចាប់ចោរម្នាក់ ស្ទើរតែមិនគួរឲ្យជឿ។
ស្តាប់ទៅដូចជារឿងកំប្លែង ប៉ុន្តែយោងទៅតាមប្រភពពត៌មានរបស់ប្រទេសចិន អាជ្ញាធរនៅទីក្រុង Fuzhou ខេត្ត Fujian ភាគខាងកើតប្រទេសចិន បានគ្រប់គ្រងដើម្បីនាំយកចោរម្នាក់ មកកាត់ទោស តាមរយៈការវិភាគស្នាមប្រឡាក់ឈាម ដែលបន្សល់នៅលើជញ្ជាំងដោយមូសខាំ។
ប៉ូលីសនិយាយថា ពេលចុះពិនិត្យកន្លែងកើតហេតុ -ផ្ទះល្វែងមួយកន្លែង ដែលត្រូវចោរចូលលួចស្ថិតក្នុងអគារខ្ពស់កប់ពពក ពួកគេបានសង្កេតឃើញថា ចោរបានលួចចូលផ្ទះនោះដោយឡើងតាមយ៉រខាងមុខ និងប្រហែលជាបានចូលស្នាក់នៅទីនោះមួយយប់។ ហើយបន្ទាប់ពីរកឃើញប្រឡាក់ឈាមដោយមូសខាំនៅលើជញ្ជាំង ពួកគេក៏បានសម្រេចចិត្តធ្វើតេស្តឈាមរក DNA ។
យោងតាមសារព័ត៌មាន Global Times អ្នកស៊ើបអង្កេតបានរកឃើញគុយទាវដែលនៅសល់ និងស៊ុតឆ្អិននៅក្នុងផ្ទះបាយ ភួយ និងខ្នើយដែលយកចេញពីទូខោអាវ ហើយទុកនៅលើគ្រែ ដុតធូប។ តម្រុយទាំងអស់នេះបានបង្ហាញថា អ្នកដែលលួចចូលផ្ទះល្វែង បានចំណាយពេលស្នាក់នៅទីនោះ។ ដូច្នេះពេលឃើញមូសងាប់មួយក្បាល និងប្រឡាក់ឈាមពីរនៅលើជញ្ជាំងពួកគេបានសម្រេចថា ឈាមគឺគួរវិភាគ។
ជាក់ស្តែង លទ្ធផលនៃការធ្វើតេស្ត DNA បានបង្ហាញថា ឈាមជារបស់បុរសឈ្មោះ Chai ដែលធ្លាប់មានប្រវត្តិប្រព្រឹត្តបទល្មើសយ៉ាងច្រើន។ ហើយ ១៩ ថ្ងៃក្រោយការលួច Chai ត្រូវបាននាំមកសាកសួរ ហើយបានសារភាពចំពោះទង្វើរចោរកម្មរបស់ខ្លួន និងក៏ដូចជាបីករណីប្លន់ផ្សេងទៀតផងដែរ៕ រក្សាសិទ្ធិដោយ៖ លឹម ហុង
