ចាប់តាំងពីរុស្ស៊ី ចាប់ផ្តើមប្រតិបត្តិការយោធាពិសេសនៅអ៊ុយក្រែន ពាក្យចចាមអារ៉ាមអំពីសុខភាពរបស់ប្រធានាធិបតី វ្ល៉ាឌីមៀ ពូទីន តែងតែក្លាយជាប្រធានបទនៃការចាប់អារម្មណ៍ នៅក្នុងប្រព័ន្ធផ្សព្វផ្សាយលោកខាងលិច។ ទោះជាយ៉ាងណាក៏ដោយ នាយក CIA លោក William Burns កាលពីថ្ងៃទី២០ ខែកក្កដា បានចេញមុខច្រានចោលពាក្យចចាមអារ៉ាមទាំងនេះ ដោយលោកបានលាតត្រដាងថា តាមពិតទៅ លោកពូទីន “មានសុខភាពល្អណាស់” ។
យោងតាមសារព័ត៌មាន Politico (សហរដ្ឋអាមេរិក) លោក Burns បានធ្វើអត្ថាធិប្បាយខាងលើនៅក្នុងវេទិកាសន្តិសុខ Aspen ដែលធ្វើឡើងនៅរដ្ឋ Colorado សហរដ្ឋអាមេរិក។
ទាក់ទងពាក្យចចាមអារ៉ាមនេះ គឺមួយថ្ងៃមុននេះ វីដេអូមួយដែលបង្ហាញពីលោកប្រធានាធិបតី ពូទីន វ័យ ៦៩ ឆ្នាំ ចុះពីយន្តហោះក្នុងប្រទេសអ៊ីរ៉ង់គឺបានទាក់ទាញការចាប់អារម្មណ៍ពីប្រព័ន្ធផ្សព្វផ្សាយលោកខាងលិច។ វីដេអូដែលចេញផ្សាយដោយទីភ្នាក់ងារសារព័ត៌មាន Russia Today (រុស្ស៊ី) បង្ហាញថា នៅពេលដែលគាត់ចុះពីយន្តហោះ ជំហានរបស់គាត់មិនស្មើគ្នា ហាក់ដូចជាស្ពឹក។
បន្ទាប់ពីនោះ កាសែត Washington Post (សហរដ្ឋអាមេរិក) Daily Mail (ចក្រភពអង់គ្លេស) ក៏បានរាយការណ៍ថា លោកប្រធានាធិបតី ពូទីន បាន “ផ្អៀងមួយចំហៀង និងហាក់យួរដៃឆ្វេង” នៅពេលដើរលើកំរាលព្រំក្រហម។
ចំណែកអ្នកកាសែតទួរគី Ragip Soylu ថែមទាំងបានចែករំលែកវីដេអូដែលពាក់ព័ន្ធនៅលើគណនី Twitter ផ្ទាល់ខ្លួនរបស់គាត់ ហើយបានបញ្ចេញមតិថា “មានអ្វីមួយមិនប្រក្រតីចំពោះ [ប្រធានាធិបតី] Putin] គឺចលនា” នេះបើយោងតាម Newsweek ។
ប៉ុន្តែទីភ្នាក់ងារស៊ើបការណ៍សម្ងាត់កណ្តាលអាមេរិក (CIA) បាននិយាយថា គ្មានភស្តុតាងណាមួយដែលថាលោកពូទីនមានបញ្ហានោះទេ។ យោងតាម BBC នាយក CIA លោក William Burns ថែមទាំងនិយាយលេងសើចថា “ប្រសិនបើមានអ្វីកើតឡើងចំពោះលោកពូទីន នោះវាហាក់ដូចជាគាត់មានសុខភាពល្អពេកហើយ”។
ភាគីរុស្ស៊ីក៏បានបញ្ជាក់ម្តងហើយម្តងទៀតអំពីបញ្ហាទាក់ទងនឹងសុខភាពប្រធានាធិបតីពូទីន។ កាលពីថ្ងៃទី២៩ ឧសភា រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយនៅក្នុងបទសម្ភាសន៍ជាមួយប្រព័ន្ធផ្សព្វផ្សាយបារាំងថា លោកពូទីនមានសុខភាពល្អទាំងស្រុង។
ទីភ្នាក់ងារសារព័ត៌មាន Tass ( រុស្ស៊ី) ដកស្រង់សម្តីរដ្ឋមន្ត្រីការបរទេសរុស្ស៊ី លោក Sergei Lavrov ដោយនិយាយថា៖ “អ្នកអាចមើលឃើញប្រធានាធិបតីនៅលើកញ្ចក់ទូរទស្សន៍ និងស្តាប់សុន្ទរកថារបស់គាត់ជារៀងរាល់ថ្ងៃ។ ខ្ញុំមិនគិតថាមនុស្សឆ្លាតនឹងឃើញសញ្ញានៃជំងឺ ឬភាពមិនប្រក្រតីខាងរាងកាយរបស់ប្រធានាធិបតីពូទីននោះទេ។ អ្នកដែលផ្សព្វផ្សាយពាក្យចចាមអារ៉ាមបែបនេះ គួរតែពិនិត្យមើលមនសិការរបស់ពួកគេផង”។
ចាប់តាំងពីខែកុម្ភៈមក ពាក្យចចាមអារាមនៅក្នុងប្រព័ន្ធផ្សព្វផ្សាយលោកខាងលិច អំពីសុខភាពរបស់លោកពូទីន គឺមិនដែលឈប់ឈរនោះទេ។ ពាក្យចចាមអារាមទាំងនោះរួមមានថា លោកពូទីនមានជំងឺមហារីកឈាម ហើយអាចរស់នៅបានអតិបរមា ៣ ឆ្នាំ; លោកពូទីនទទួលរងពីជំងឺផ្សេងៗដូចជា ផាកឃីនសុន និងជំងឺក្រិនច្រើនសរសៃ ញ័រដៃជើង មិនអាចគ្រប់គ្រងបាន។ល។ តែទោះជាយ៉ាងណា គ្មានប្រភពណាមួយក្នុងចំណោមប្រភពទាំងនោះ ផ្តល់ភស្តុតាងដែលអាចទុកចិត្តបាននោះទេ៕ រក្សាសិទ្ធិដោយ៖ លឹម ហុង
