តាមរយៈគណនីហ្វេសប៊ុកឈ្មោះ Torfan Worachotthanan ឬ ហៅថា Khun Jean នៅថ្ងៃទី២២ ខែកក្កដា ឆ្នាំ២០២២ បានប្រាប់អំពីបទពិសោធន៍បរិភោគនំប្រោននីកញ្ឆា ដោយមិនដឹងខ្លួន ដែលធ្វើឲ្យរូបនាងស្ទើរបាត់បង់ជីវិត។ ហេតុការណ៍នេះបានកើតឡើងនៅឯព្រឹត្តិការណ៍បាញ់ត្រី នៅក្នុងតំបន់ Chatuchak ដោយមានស្រីស្អាតចំនួន ២០ នាក់ ត្រូវបានគេជួលមកហែលទឹកក្នុងឈុតប៊ីគីនី នៅក្នុងអាងត្រីដ៏ធំ មុនពេលសម្តែងរាំបញ្ចេញភាពសិចស៊ី ទៅកាន់ទស្សនិកជនយ៉ាងពេញទំហឹង។
នារីរងគ្រោះបានឲ្យដឹងថា នៅពេលនោះ ពួកនាង គ្មាននរណាម្នាក់បានទទួលអាហារចូលពោះនោះទេ ហើយមិនយូរប៉ុន្មាន ក៏បានឃើញបុរសម្នាក់ស្ថិតក្នុងសម្លៀកបំពាក់អាវយឺតពណ៌ខ្មៅ ដែលមើលទៅទំនងជាក្រុមការងារនៅក្នុងព្រឹត្តិការណ៍ បានមកចែកអាហារសម្រន់ដល់ពួកនាង។ ដោយសារតែភាពស្រេកឃ្លាន ពួកនាងមិនចាំយូរនាំគ្នាញ៉ាំអស់យ៉ាងច្រើន ប៉ុន្តែ អ្វីដែលមិននឹកស្មានដល់នោះ គឺអាហារសម្រេន់ទាំងនោះ ក្នុងនោះបែរមាននំប្រោននីកញ្ឆា សោះឡើយ។
Jean បាននិយាយថា ញ៉ាំរួចមិនដល់ ១០ នាទី នាងក៏ចាប់ផ្តើមមានអារម្មណ៍ពិបាកក្នុងខ្លួនយ៉ាងខ្លាំង ដោយងិតមុខ ឈឺក្បាល រហូតមិត្តភក្តិប្រញាប់ប្រញាល់នាំទៅបន្ទប់ទឹក។ ប៉ុន្តែ ដោយសារស្ថានភាពកាន់តែធ្ងន់ទៅៗ ជាមួយអាការចាប់ផ្ដើមថប់ដង្ហើម តឹងទ្រូង រមួលសាច់ដុំ រហូតប្រកាច់ នាងក៏ត្រូវបានគេបញ្ជូនទៅសង្គ្រោះនៅមន្ទីរពេទ្យភ្លាមៗ។ នៅក្នុងបន្ទប់ ICU នាងបានសារភាពថា នាងបានលឺអ្វីៗទាំងអស់ ប៉ុន្តែមិនអាចកម្រើកបាន ស្ពឹកពេញខ្លួន។
Jean និយាយថា «ឧបទ្ទវហេតុនេះ បានធ្វើឲ្យខ្ញុំយល់ពាក្យថា ចិត្តចាកចេញពីកាយ។ វាហាក់ដូចជាខ្ញុំឃើញខ្លួនឯងដេកលក់ ហើយបន្ទាប់មកមានម្តាយ និងក្រុមគ្រួសារឈរក្បែរគ្រែ។ ក្នុងខួរក្បាលមានតែការព្រួយបារម្ភ ខ្វល់ពីរឿងច្រើន យល់ថាមនុស្សជិតស្លាប់។
ក្នុងអំឡុងពេលព្យាបាល បេះដូងស្ទើរតែឈប់លោតច្រើនដង ខ្ញុំបានលឺម្តាយខ្ញុំយំ គិលានុបដ្ឋាយិកាហៅគ្រូពេទ្យ បន្ទាប់មកគ្រប់គ្នាឈរជុំវិញគ្រែយ៉ាងខ្លាំង ដោយស្រែកថា “កុំដេក អត់ធ្មត់ រក្សាភាពស្ងប់ស្ងាត់”។ ពេលនោះ ខ្ញុំគិតថា «កុំដេក បើយើងដេក យើងប្រហែលមិនភ្ញាក់ទេ»។
Jean នៅបានឲ្យដឹងទៀតថា «ខ្ញុំបានដេកសន្លប់ជាង១ថ្ងៃ ហើយពេលដឹងខ្លួន ខ្ញុំវិលមុខខ្លាំង។ ខ្ញុំពិតជាសោកស្តាយ ដោយសារលុបចោលការងារ ៤ ដែលត្រូវធ្វើ។ ក្នុងនោះ ការងារទូរស័ព្ទ និងអ្វីៗជាច្រើនទៀត។ តើយកអាហារសម្រន់បែបនេះមកញ៉ាំក្នុងគោលបំណងអ្វី?»។
Jean បានប្រាប់ឲ្យដឹងថា ក្រៅពីរូបនាង គឺនៅមានមិត្តភក្តិរបស់នាង ៣, ៤ នាក់ ទៀត ក៏រងគ្រោះ ពីការទទួលទានអាហារសម្រន់ ពីជនចម្លែកនោះដែរ។ ដោយថ្លៃសេវាព្យាបាលគឺខ្ពស់ណាស់ ក្នុងមួយថ្ងៃជាង២ម៉ឺនបាតពួកនាងនាងក៏សុំចេញពីមន្ទីរពេទ្យ ទៅព្យាបាលខ្លួនឯងនៅផ្ទះវិញ ព្រោះម្ចាស់កម្មវិធី បានឆ្លើយថា ពួកគេពុំបានដឹងថាពួកនាងញ៉ាំអ្វីនោះទេ។
យ៉ាងណាមិញ ក្រោយឃើញ មនុស្សជាច្រើនបានស្តីបន្ទោសថា ហេតុអ្វីបានជាញ៉ាំអាហារសម្រន់ពីមនុស្សចម្លែកដោយមិនប្រុងប្រយ័ត្ន នាងក៏បានពន្យល់ថា វាជាការពិតដែលនាងបានញ៉ាំអាហារពីមនុស្សចម្លែក។ ប៉ុន្តែ នាងគិតថា បុរសនោះជាបុគ្គលិកនៃព្រឹត្តិការណ៍នេះ ដោយសារតែគាត់យកចិត្តទុកដាក់ចំពោះពួកនាង សូម្បីឃើញអង្គុយតុជាមួយម្ចាស់ភោជនីយដ្ឋានទៀតផង ហេតុនេះ នាងយកអាហារសម្រន់មកញ៉ាំដោយមិនស្ទាក់ស្ទើរ។
តែទោះជាយ៉ាងណា នាងគ្រាន់តែចង់ព្រមានអ្នកដែលនឹងចង់សាក ឬអ្នកដែលមិនស្គាល់អាហារសម្រន់កញ្ឆា ព្រោះវាពិតជាគ្រោះថ្នាក់ណាស់។ សំណាងល្អដែលនាងបានជាសះស្បើយ។ បើសំណាងអាក្រក់បានកើតឡើង នោះនាងនឹងបានទៅឋានសួគ៌បាត់ហើយ។ ជាមួយគ្នានេះ នាងក៏បានបញ្ជាក់ថា នាងមិនបានលេងកញ្ឆា ដូចដែលមនុស្សមួយចំនួនចោទប្រកាន់នោះទេ៕ រក្សាសិទ្ធិដោយ៖ លឹម ហុង
