កសិករម្នាក់ក្នុងប្រទេសអង់គ្លេស ត្រូវបានគេកោតសរសើរហៅថាជា «វីរបុរស» បន្ទាប់ពីបានប្រើវិធីដ៏ឆ្លាតទប់ទល់នឹងភ្លើងឆេះដ៏ធំមួយដោយខ្លួនឯង ដោយភ្ជួរស្រែរបស់គាត់ ដើម្បីបង្កើតជាជញ្ជាំង “លេណដ្ឋាន” ការពារភ្លើងដ៏ធំមិនអោយឆេះរាលដាលចូលផ្ទះរបស់គាត់។
កាសែត Daily Mail បានរាយការណ៍ថា អ្នកពន្លត់អគ្គីភ័យត្រូវបានហៅទៅកាន់កន្លែងកើតហេតុ ដើម្បីដោះស្រាយភ្លើងដ៏ធំមួយ ដែលបានកំពុងឆាបឆេះនៅវាលស្រែមួយ ក្នុងទីក្រុង Lenham Heath ចន្លោះតំបន់ Maidstone និង Ashford រដ្ឋ Kent County ប្រទេសអង់គ្លេស នៅមុនម៉ោង ៣ និង ១៥ នាទីរសៀល ថ្ងៃទី២៣ ខែកក្កដា (ម៉ោងក្នុងស្រុក)។
អគ្គិភ័យបានលេបត្របាក់ផ្ទៃដីប្រមាណ ៨ ហិកតា។ តែទោះជាយ៉ាងណា កសិករម្នាក់ឈ្មោះ Bill Alexander បានប្រើត្រាក់ទ័រភ្ជួរជាផ្លូវដ៏ធំមួយក្នុងវាលស្រែ ដើម្បីរារាំងភ្លើងដែលកំពុងឆេះ។
Andy Barr ដែលជាម្ចាស់កសិដ្ឋាននៅ Kent បានសរសើរអ្នកជិតខាងដ៏ល្អរូបនេះ សម្រាប់សកម្មភាពវីរភាពរបស់គាត់ ហើយបានចែករំលែករូបភាពនៃត្រាក់ទ័រដែលកំពុងប្រយុទ្ធនឹងភ្លើងនៅលើ Twitter។ វីដេអូបានបង្ហាញទិដ្ឋភាពត្រាក់ទ័រពណ៌បៃតងរបស់លោក Bill នៅចម្ងាយប៉ុន្មានម៉ែត្រពីភ្លើង ដែលហ៊ុំព័ទ្ធដោយផ្សែងយ៉ាងក្រាស់។
ទីបំផុតភ្លើងត្រូវបានពន្លត់ដោយប្រើពេលអស់រយៈពេល ៩០ នាទី ហើយអ្នកស្រុកក្បែរនោះ ត្រូវបានជម្លៀសទៅកាន់ទីសុវត្ថិភាពផងដែរ។ ពុំមានសេចក្តីរាយការណ៍ពីមនុស្សស្លាប់ និងមូលហេតុនៃការឆេះនេះទេ។
ភ្លើងឆេះព្រៃជាបន្តបន្ទាប់ត្រូវបានគេកត់ត្រា នៅទូទាំងចក្រភពអង់គ្លេសក្នុងសប្តាហ៍នេះ ចំពេលមានរលកកម្តៅដែលបានបញ្ជូនសីតុណ្ហភាពកើនឡើងដល់កម្រិត ៤០.៣ អង្សាសេ។
អ្នកពន្លត់អគ្គីភ័យ បានពណ៌នាការឆាបឆេះដែលបានបំផ្លាញផ្ទះនៅទីក្រុងឡុងដ៍ កាលពីដើមសប្តាហ៍នេះថាជា “នរក”។ ក្រៅពីប្រទេសអង់គ្លេស ភ្លើងឆេះព្រៃ ក៏កំពុងឆាបឆេះក្នុងប្រទេសវេលស៍ (Wales) និង ស្កុតឡែន ផងដែរដោយសារអាកាសធាតុក្តៅហួតហែង៕ រក្សាសិទ្ធិដោយ៖ លឹម ហុង
