បុរសអាយុ ២៧ ឆ្នាំម្នាក់ រស់នៅក្នុងទីក្រុង Dongguan ប្រទេសចិន បានជួបបញ្ហាក្នុងការស្វែងរកការងារ ដោយសារតែគាត់មើលទៅដូចកូនក្មេងអាយុ ៧-៨ ឆ្នាំ អុីចឹង។
ក្រោយពីមានមនុស្សគ្រប់គ្នា បានសន្មត់ថាជាកូនក្មេងមានអាយុមិនលើស ១០ ឆ្នាំ បុរសដ៏អ័ភព្វជាមួយរូបរាងដែលមានឈ្មោះថា Mao Sheng បានអះអាងថា គាត់មានអាយុ ២៧ ឆ្នាំ ហើយ។ ហើយខណៈពេលដែលអ្នកខ្លះគិតថាជាពរជ័យនោះ តែយុវជនមកពីទីក្រុង Dongguan រូបនេះ បានអះអាងថាវាជាបណ្តាសា ព្រោះវារារាំងរូបគេមិនអាចទទួលការងារធ្វើបាន។ ព្រោះថា និយោជកភាគច្រើនមិនជឿថា គាត់មានអាយុដូចគាត់អះអាងនោះទេ។ ហេតុនេះ ពួកគេមិនចង់ឱ្យអាជ្ញាធរចោទប្រកាន់ប្រើកម្លាំងពលកម្មកុមារ។
Mao Sheng បានទទួលការចាប់អារម្មណ៍ពេញមួយប្រទេសចិន កាលពីសប្តាហ៍មុន បន្ទាប់ពីវីដេអូដែលបានថតរូបគេនៅតាមដងផ្លូវនៃទីក្រុង Dongguan បានរីករាលដាលនៅលើ Douyin (TikTok) ។ នៅក្នុងនោះ យុវជនរូបនេះបានបង្ហាញពីអាយុរបស់គាត់ ហើយបានត្អូញត្អែរថា គាត់មិនអាចរកការងារធ្វើដើម្បីផ្គត់ផ្គង់ឪពុករបស់គាត់ ដែលកំពុងមានជំងឺដាច់សរសៃឈាមខួរក្បាល។ គាត់បានសុំការងារនៅរោងចក្រក្នុងស្រុកជាមួយមិត្តភ័ក្តិម្នាក់ ប៉ុន្តែខណៈដែលពួកគេរកការងារបានលឿន តែគាត់វិញបែរជាមិនសំណាងនោះទេ។
រឿងរ៉ាវរបស់ Sheng បានទាក់ទាញបេះដូងមនុស្សរាប់លាននាក់នៅជុំវិញប្រទេសចិន ដែលភាគច្រើនបានចោទប្រកាន់និយោជកថា មិនផ្តល់ឱកាសឱ្យគាត់ ដោយសារតែមុខមាត់ក្មេងខុសពីធម្មតា។ តែសំណាងហើយ បន្ទាប់ពីគាត់ល្បីតាមអនឡាញ សហគ្រិនជាច្រើនបានទាក់ទង និងផ្តល់ការងារឱ្យគាត់។
វីដេអូមួយទៀតដែលបង្ហោះនៅលើ Douyin កាលពីប៉ុន្មានថ្ងៃមុន បានបង្ហាញថា Mao ទទួលបានការងារមួយ ហើយសង្ឃឹមថា នឹងទទួលបានប្រាក់ខែគ្រប់គ្រាន់ ដើម្បីជួយឪពុករបស់គាត់ឱ្យជាសះស្បើយឡើងវិញ។ ពេលឡើងលើភ្នំគាត់សង្ឃឹមថានឹងរកមិត្តស្រី ហើយបង្កើតគ្រួសារមានគ្នីគ្នាដូចគេដែរ។
ទោះបីជារឿងរ៉ាវរបស់ Mao Sheng ត្រូវបានសារព័ត៌មានជាច្រើនក្នុងប្រទេសចិន យកមកចុះផ្សាយក៏ដោយ ប៉ុន្តែគ្មានព័ត៌មានណា និយាយអំពីហេតុផលវេជ្ជសាស្រ្តណាមួយ សម្រាប់រូបរាងក្មេងជាងវ័យ របស់យុវជនវ័យ ២៧ ឆ្នាំ រូបនោះទេ៕ រក្សាសិទ្ធិដោយ៖ លឹម ហុង
