មនុស្សជាច្រើនបានផុងខ្លួនក្លាយជាជនរងគ្រោះ នៅក្នុងល្បិចឆបោកដាក់លុយចូលជាសមាជិកភាគហ៊ុន (រកសុីតាមបណ្តាញ ហៅថា Network) ដែលមានទឹកប្រាក់ខាតបង់សរុបជាង ៣០ លានបាត (ស្មើនឹងជិត១លានដុល្លារ)។ ជាមួយគ្នានេះ មេធាវីដ៏ល្បីល្បាញក្នុងប្រទេសថៃឈ្មោះ Nobi រួមជាមួយតំណាងក្រុមជនរងគ្រោះ បានទៅដាក់ពាក្យបណ្តឹង នៅឯការិយាល័យស៊ើបអង្កេតកណ្តាលនៅថ្ងៃទី២០ ខែកក្កដា ឆ្នាំ ២០២២។
ជនរងគ្រោះម្នាក់បានបង្ហើបថា នាងអស់លុយ ហើយគ្មានប្រាក់សល់ក្នុងខ្លួនសម្រាប់ព្យាបាលជំងឺម្តាយទេ ហើយជាលទ្ធផលម្តាយនាងក៏បានស្លាប់ ដែលធ្វើឲ្យរូបនាងខ្លោចចិត្តបំផុត។ ជនរងគ្រោះជាង១០នាក់ បានទៅជួបលោកវរសេនីយ៍ទោ Woradej Chompoopan ។ ពួកគេទាំងអស់បានយកលុយទៅបណ្តាក់ទុន ក្នុងឱកាសវិនិយោគដែលហៅថា ការវិនិយោគភាគហ៊ុន។
មេធាវីបានបញ្ជាក់ឲ្យដឹងថា ជនរងគ្រោះជាអ្នកភូមិមកពីខេត្ត Udon Thani ។ ពួកគេត្រូវបានអូសទាញឱ្យដាក់លុយចូលភាគហ៊ុនដែលមានឈ្មោះខុសៗគ្នា ប៉ុន្តែ នៅពេលទទួលបានលុយច្រើនរាប់ម៉ឺនដុល្លារ ស្រាប់តែអ្នកដឹកនាំលេងភាគហ៊ុន បានប្រកាសថាក្រុមភាគហ៊ុនបានដួលរលំ។ បច្ចុប្បន្ន ការខាតបង់មានទឹកប្រាក់យ៉ាងហោចណាស់ ៣០ លានបាត។
ជនរងគ្រោះជាច្រើនដែលជាអ្នកក្រីក្រ បច្ចុប្បន្នកំពុងរស់នៅកាន់តែលំបាក បន្ទាប់ពីបានវិនិយោគប្រាក់ទាំងអស់របស់ពួកគេ ទៅក្នុងភាគហ៊ុន។ ជនរងគ្រោះម្នាក់មានកូនឈឺដេកលើគ្រែ ហើយសម្រេចចិត្តវិនិយោគលុយ ដោយសង្ឃឹមថា នឹងអាចរកប្រាក់បានបន្ថែមទៀត ដើម្បីជួយចំណាយលើការព្យាបាលកូនរបស់គាត់។ ជនរងគ្រោះខ្លះគ្មានប្រាក់សូម្បីសម្រាប់ធ្វើបុណ្យសពបន្ទាប់ពីមនុស្សជាទីស្រឡាញ់ទទួលមរណភាព។
ចំណែកដើមទុន (ហ៊ុន) បានចាប់ផ្តើមឡើងតិចតួច ដោយបានអូសទាញមិត្តភក្តិជិតស្និទ្ធ មកចូលរួមបណ្តាក់ទុនតៗគ្នា។ ក្រុមបានចាប់ផ្តើមពង្រីក ហើយបានពង្រីកទៅជា ២ ភាគហ៊ុនសំខាន់ៗ។ ភាគហ៊ុននីមួយៗនឹងត្រូវបានគេហៅថាជាផ្ទះ, ផ្ទះទីមួយមានអ្នកចូលរួមវិនិយោគប្រហែល ៣០០ នាក់ និងទីពីរមានប្រហែល ២០០ ។
អ្នកដឹកនាំភាគហ៊ុន នឹងផ្តល់ប្រាក់ជាថ្នូរសម្រាប់អ្នកដែលនឹងស្វែងរកអ្នកវិនិយោគថ្មី។ តែទោះជាយ៉ាងណា ស្រាប់តែនៅខែមីនា ឆ្នាំ២០២២ អ្នកដឹកនាំភាគហ៊ុនថាបានដួលរលំ។ មានជនរងគ្រោះយ៉ាងតិច ៣០ នាក់ដែលសម្រេចចាត់វិធានការផ្លូវច្បាប់លើមេដឹកនាំភាគហ៊ុន។ ជនរងគ្រោះបញ្ជាក់ថា មេភាគហ៊ុនកំពុងរស់នៅធម្មតា និងជាម្ចាស់ភោជនីយដ្ឋានមួយនៅខេត្ត Udon Thani ៕ រក្សាសិទ្ធិដោយ៖ លឹម ហុង
