ថ្មីៗនេះ នារី Youtuber ដ៏ល្បីដែលមានឈ្មោះថា Ti Zi មកពីប្រទេសចិន ត្រូវបានសមត្ថកិច្ច ធ្វើការឃាត់ខ្លួន បន្ទាប់ពីបានថតធ្វើវីដេអូយកត្រីឆ្លាម មកធ្វើម្ហូបយ៉ាងសប្បាយ។
ក្នុងវីដេអូ នាងបានណែនាំថា នាងបានទិញត្រីឆ្លាមបង្កាត់ពូជពីហាងមួយក្នុងស្រុកមួយ ហើយបន្ទាប់មកនាងបានយកត្រីឆ្លាមនោះ មកកន្លែងផ្ទះសាច់ញាតិរួចកាត់វាជាពីរចំណែក ដើម្បីចម្អិនអាហារ។
នាងបានសម្រេចចិត្តចម្អិនត្រីឆ្លាមតាម ២ វិធីផ្សេងគ្នា៖ ទី១- នាងបានយកពាក់កណ្តាលកន្ទុយត្រីឆ្លាម ដែលបានកាត់ ដាក់វាលើចង្អើភ្លើងដុត និងបន្ទាប់មក ចាប់ផ្តើមដាក់បន្ថែមគ្រឿងទេស។ ទី២ យកខ្ទះឆា ដាក់គ្រឿងទេស រួចយកពាក់កណ្តាលផ្នែកក្បាល មកឆាត្រឡប់ចូលគ្នាយ៉ាងទំនង។
ខណៈលើកខាំភ្លក់លើកដំបូង នាងបាននិយាយថា៖ «នេះគឺជាត្រីដែលមានរសជាតិឆ្ងាញ់បំផុតដែលខ្ញុំមិនធ្លាប់ញ៉ាំពីមុនមក។ សាច់វាស្រួយហើយឆ្ងាញ់ណាស់!»។
តែទោះជាយ៉ាងណា ក្រោយវីដេអូបានផ្ទុះល្បី នាងស្រាប់តែត្រូវបានសមត្ថកិច្ចចាប់ខ្លួន ពីបទបង្កគ្រោះថ្នាក់ដោយចេតនាលើសត្វព្រៃដែលត្រូវបានការពារ។ គណនីរបស់នាងនៅលើ Douyin ក៏ត្រូវបានផ្អាកតាំងពីពេលនោះមក ហើយប្រសិនបើរកឃើញថាមានកំហុស នាងនឹងត្រូវប្រឈមមុខនឹងការចោទប្រកាន់ដាក់ពន្ធនាគាររយៈពេល ១០ ឆ្នាំ។
នេះជាការដាស់តឿនមួយដែលអ្នកដទៃត្រូវតែគិតមុននឹងធ្វើអ្វីមួយដែលបង្កការប៉ះពាល់ដល់សម្បត្តិធម្មជាតិសត្វជាទូទៅ៕ រក្សាសិទ្ធិដោយ៖ លឹម ហុង