បុរសអាយុ ៦២ ឆ្នាំម្នាក់ មកពី Bihar ប្រទេសឥណ្ឌា កំពុងទទួលបានការចាប់អារម្មណ៍យ៉ាងខ្លាំង នៅក្នុងប្រទេសកំណើតរបស់គាត់ បន្ទាប់ពីត្រូវបានគេបញ្ចេញឲ្យដឹងថា គាត់មិនបានងូតទឹកអស់រយៈពេលជាង ២ ទសវត្សរ៍មកហើយ។
លោក Dharamdev Ram បានកំពុងល្បីល្បាញនៅក្នុងភូមិកំណើតរបស់គាត់ Baikunthpur ។ គ្រប់គ្នាបានដឹងថា គាត់មិនបានងូតទឹក ក្នុងរយៈពេល ២២ ឆ្នាំ មកហើយ ប៉ុន្តែគ្មាននរណាម្នាក់ចំអកឱ្យគាត់ទេ ផ្ទុយទៅវិញគាត់ទទួលបានការគោរពយ៉ាងខ្លាំង ចំពោះការសម្រេចចិត្តរបស់គាត់ នោះក៏ព្រោះតែបុរសវ័យ៦២ឆ្នាំរូបនេះ បានស្បថថានឹងមិនងូតទឹកដាច់ខាត ដរាបណាទាល់តែអំពើហិង្សាលើស្ត្រី ជម្លោះដីធ្លីក្នុងចំណោមបុរស និងការសម្លាប់សត្វស្លូតត្រង់ ត្រូវបានបញ្ឈប់។ ដោយសារតែរឿងនេះមិនទាន់អាចធ្វើបាននៅឡើយទេ ដូច្នេះលោក Dharamdev បន្តរក្សាការសច្ចារបស់គាត់រហូតមកទល់ពេលនេះ។
លោក Ram ថ្មីៗនេះបានប្រាប់ ETV Bharat ថា “នៅឆ្នាំ ១៩៧៥ ខ្ញុំបានធ្វើការនៅក្នុងរោងចក្រមួយនៅ Jagdal រដ្ឋ Bengal ហើយបានរៀបការនៅឆ្នាំ១៩៧៨ និងបានដឹកនាំជីវិតធម្មតា” ។ ប៉ុន្តែនៅឆ្នាំ១៩៨៧ ខ្ញុំបានដឹងភ្លាមៗថា ជម្លោះដីធ្លី ការសម្លាប់សត្វ និងអំពើឃោរឃៅលើស្ត្រីបានចាប់ផ្តើមកើនឡើង ដូច្នេះ ដើម្បីស្វែងរកចម្លើយ ខ្ញុំបានចូលទៅជិត ‘គ្រូ’ ម្នាក់ដែលយកខ្ញុំធ្វើជាសិស្សរបស់គាត់ ហើយបំផុសគំនិតដល់ខ្ញុំឱ្យដើរតាមមាគ៌ានៃការលះបង់មួយនេះ។ ហើយតាំងពីពេលនោះមក ខ្ញុំបានធ្វើដំណើរទៅលើផ្លូវនៃការលះបង់ ហើយចាប់ផ្ដើមធ្វើសមាធិថ្វាយព្រះរ៉ាម៉ា»។
នៅឆ្នាំ ២០០០ នៅពេលដែលគាត់បានស្បថថា មិនងូតទឹករហូតដល់អំពើខុសឆ្គងដែលបានរៀបរាប់ខាងលើបានឈប់ លោក Ram ក៏បានលាឈប់ពីការងារនៅរោងចក្រដែលគាត់កំពុងធ្វើការ ប៉ុន្តែត្រឡប់មកវិញយ៉ាងឆាប់រហ័សដោយសារតែសម្ពាធពីគ្រួសាររបស់គាត់។ ទោះបីជាយ៉ាងណាក៏ដោយ នៅពេលដែលមានការផ្សព្វផ្សាយអំពីការសន្យាមិនធម្មតារបស់គាត់ គាត់ត្រូវបានគេបណ្តេញចេញ ហើយគាត់នៅតែគ្មានការងារធ្វើតាំងពីពេលនោះមក។
ភរិយារបស់ Ram ឈ្មោះ Maya Devi បានទទួលមរណៈភាពក្នុងឆ្នាំ ២០០៣ ប៉ុន្តែ ទោះជាពេលនោះ ក៏គាត់មិនព្រមងូតទឹកទេ។ ជាច្រើនឆ្នាំក្រោយមក កូនប្រុសរបស់គាត់ម្នាក់បានស្លាប់ ប៉ុន្តែគាត់មិនបានក្បត់ពាក្យសច្ចារបស់គាត់ដដែល ហើយគាត់នៅតែបន្តធ្វើដូច្នេះ ទោះបីជាកូនប្រុសរបស់គាត់ផ្សេងទៀតបានស្លាប់នៅក្នុងឆ្នាំតែមួយគ្នាក៏ដោយ។ ទោះបីជាវាអាចមានន័យថា មិនងូតទឹករហូតដល់ថ្ងៃគាត់ស្លាប់ក៏ដោយ ក៏បុរសវ័យ ៦២ ឆ្នាំរូបនេះ បានត្រៀមខ្លួនដើម្បីរក្សាពាក្យសច្ចាដែលគាត់បានធ្វើកាលពី ២២ ឆ្នាំមុន លុះត្រាតែគោលដៅដ៏ថ្លៃថ្លារបស់គាត់ត្រូវបានសម្រេច។
ប្រសិនបើអ្នកគិតថា ២២ ឆ្នាំ ដោយមិនងូតទឹក គឺជាពេលវេលាដ៏យូរ នោះអ្នកប្រហែលជាមិនធ្លាប់បានលឺអំពីបុរសដែលកខ្វក់បំផុតលើពិភពលោក ដែលជាជនជាតិអ៊ីរ៉ង់អាយុ ៨៧ ឆ្នាំ ដែលមិនបានងូតទឹកក្នុងរយៈពេល ៦៧ ឆ្នាំ ឯណោះ។ ដូចគាត់ដែរ Dharamdev Ram ហាក់ដូចជាមានសុខភាពល្អ ហើយបើគិតដល់អនាម័យមិនល្អរបស់គាត់ យ៉ាងហោចណាស់ ក៏តាមស្តង់ដារទំនើបដែរ៕ រក្សាសិទ្ធិដោយ៖ លឹម ហុង