ថ្មីៗនេះ អ្នកលក់ឡេអនឡាញមួយរូប ដែលមានគណនីហ្វេសប៊ុកឈ្មោះ «Mo lika» បានធ្វើឲ្យភ្ញាក់ផ្អើលអស់បណ្តាញសង្គម បន្ទាប់ពីបានបង្ហោះរូបថតសម្ញែងជាមួយគំនរលុយទាំងដុំៗក្រាលពេញលើតុរាប់ម៉ឺនរាប់លានដុល្លារ និងព្រមទាំងអួតប្រាប់ថាមានបានបែបនេះ គឺដោយសាររកសុីមុខរបរជាច្រើនមុខ មិនមែនត្រឹមតែលក់ឡេ ឬធ្វើជាមេតុងទីនប៉ុណ្ណោះទេ។
តែអ្វីដែលគួរឲ្យភ្ញាក់ផ្អើលខ្លាំងនោះ គឺបន្ទាប់ពីអួតសម្ញែងលុយ ដើម្បីទាក់ទាញអ្នកលោភលន់ចង់មានបានលឿនដោយអត់គិតពិចារណា មិនបានប៉ុន្មានម៉ោងផង ស្រាប់តែពេលនេះ គេបានទម្លាយការពិតស្ថិតនៅពីក្រោយសកម្មភាពអួតសម្ញែងនេះ គឺតាមការពិតជាលុយជួលគេថតសម្តែងប៉ុណ្ណោះ។ ជាក់ស្តែង អ្នកដែលបានដឹងការពិត បានទម្លាយរូបភាព២សន្លឹក ថតកន្លែងតែមួយ គឺនៅផ្ទះបុរសម្នាក់ដែលជាម្ចាស់លុយ។
នេះបើតាមគណនីហ្វេសប៊ុកឈ្មោះ Kong Naknin បានបញ្ចេញរូបភាព២សន្លឹក ថតនៅទីតាំងតែមួយរវាងអ្នកលក់ឡេ ម៉ូលីកា និងបុរសជាម្ចាស់លុយ ដោយបានលាន់មាត់អស់សំណើចថា៖ «ចាប់បានស្រេច ប្រអប់ដូចគ្នា លេងខូចគេខំតែតាមដាន»។
យ៉ាងណាមិញ ទាក់ទងរឿងសេវាជួលថតអួតសម្ញែងលុយនេះផងដែរ គណនីហ្វេសប៊ុកឈ្មោះ Rakya Long បានចែករំលែកឲ្យដឹង និងនិយាយចំៗថា៖ មានសេវាជួលលុយយកមកថត, 1=ថតម្តង 500$ បាន២សន្លឹក 2=ថតជាវីដេអូ អាចកាន់លុយបាន អោបលុយ ថើបលុយ និយាយប្រម៉ូតក្រេឌីតជាមួយលុយបាន មួយ Clip 1000$! បើបងប្អូនណាចង់ថត លេងជាមួយលុយ ដើម្បីទុកអួត ឬទុកបន្លំភ្នែកមហាជនអោយគេមើលមកថាយើងមាន ជាសេដ្ឋី ជាអ្នករកស៊ីជោគជ័យក្នុងសង្គម គឺអាចទាក់ទងមកបាន ទីតាំង…»។
ក្រោយពីបានឃើញរូបភាពដ៏គួរឲ្យអស់សំណើចនេះរួចហើយ អ្នកលេងបណ្តាញសង្គម បានបញ្ចេញមតិហួសចិត្ត និងណែនាំអ្នកចង់ចូលធ្វើជាតំណាងមេលេងតុងទីនថា៖ «យកលុយគេថតថារបស់ខ្លួនដើម្បីបង្អួតគេដើម្បីទាក់ទាញអ្នកលោភលន់ចង់មានបានលឿនដោយអត់គិតពិចារណា, ថាអីចេះខុសអោយតែអ្នករកសុីយកលុយមកបង្អួតគេមិនដែលធ្វើរឿងល្អទេ, អ្នកលោភលន់ប្រយត្ន័ខ្លួនផងល្បិចបោកមកទៀតហើយ ខ្ញុំថាមិនយូទេមេតុងទីនទាំងអស់នេះនឹងប្រមូលលុយរត់ទៅអាមេរិចហើយ, បើខ្ញុំទោះលុយច្រើនជាងនេះក៏មិនហ៑ានលេងដែរ ព្រោះសង្គមឥឡូវ អ្នកមានមុខមាត់ល្បីមួយចំនួនបោកគេសាហាវណាស់, ជឿម្នាក់ហ្នឹងចប់ហើយ អួតកំរិត ISO9009 ត្រឹមលក់ឡេលុយរយៗនៅបោកគេបាន ចុះទម្រាំ…»៕ រក្សាសិទ្ធិដោយ៖ លឹម ហុង
